អ្នកនាំពាក្យក្រសួងការបរទេសកម្ពុជា ច្រានចោលចំពោះព័ត៌មានដែលបានចុះផ្សាយនៅក្នុងសារព័ត៌មាន NK News កាលពីថ្ងៃទី១៥ ខែកុម្ភៈ ឆ្នាំ២០២២ ថា «ចារកម្មកូរ៉េខាងជើងបានបើកដំណើរការសណ្ឋាគារ កាស៊ីណូ និងភ្នាក់ងារទេសចរណ៍នៅកម្ពុជា»។
សេចក្ដីបំភ្លឺរបស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១៧ ខែកុម្ភៈ ឆ្នាំ២០២២ បានលើកឡើងថា កម្ពុជាបានអនុវត្តស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយបានបិទគ្រប់អាជីវកម្ម និងគណនីធនាគាររបស់សាធារណរដ្ឋប្រជាមានិតប្រជាធិបតេយ្យកូរ៉េខាងជើង ក្នុងប្រទេសកម្ពុជា និងបញ្ឈប់ការផ្តល់ប័ណ្ណការងារដល់កម្មករមកពីសាធារណរដ្ឋប្រជាមានិតប្រជាធិបតេយ្យកូរ៉េខាងជើងផងដែរ។
អ្នកនាំពាក្យក្រសួងការបរទេសកម្ពុជា បញ្ជាក់ថា ក្នុងនាមជាសមាជិករបស់អង្គការសហប្រជាជាតិ កម្ពុជាបានបំពេញទាំងស្រុងនូវកាតព្វកិច្ចអន្តរជាតិក្រោមធម្មនុញ្ញអង្គការសហប្រជាជាតិ ហើយបានអនុវត្តយ៉ាងស្មោះត្រង់នូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ស្ដីពីការដាក់ទណ្ឌកម្មលើកូរ៉េខាងជើង។
អ្នកនាំពាក្យក្រសួងការបរទេសកម្ពុជា ផ្តល់ព័ត៌មានថា គណនីធនាគារចំនួន៧ របស់កូរ៉េខាងជើង នៅក្នុងស្ថាប័នហិរញ្ញវត្ថុ ២ផ្សេងគ្នា ត្រូវបានបិទតាំងពីឆ្នាំ២០១៧ មក។
ប្រភពដដែលបន្តថា កម្ពុជាថែមទាំងបានបិទគ្រប់អាជីវកម្ម ភោជនីយដ្ឋាន និងសារមន្ទីររបស់កូរ៉េខាងជើងនៅកម្ពុជាទៀតផង។
ចាប់តាំងពីឆ្នាំ២០១៧ មក ប្រទេសកម្ពុជាបានបញ្ឈប់ទាំងស្រុងនូវការផ្តល់ប័ណ្ណការងារដល់កម្មករមកពីកូរ៉េខាងជើង ហើយគិតត្រឹមចុងឆ្នាំ២០១៩ រដ្ឋាភិបាលកម្ពុជាបានសម្រេចមិនពន្យារទិដ្ឋាការដល់ប្រជាជនកូរ៉េខាងជើងដែលបានធ្វើការនៅកម្ពុជាទៀតទេ។
កាលពីថ្ងៃទី១២ ខែមិថុនា ឆ្នាំ២០១៩ ក្រសួងពាណិជ្ជកម្ម បានលុបឈ្មោះក្រុមហ៊ុន Glory Worldwide Glow Co., Ltd របស់កូរ៉េខាងជើង ចេញពីបញ្ជីពាណិជ្ជកម្ម។ ក្រសួងពាណិជ្ជកម្មបានស្រាវជ្រាវក្រុមហ៊ុននានាដែលបានចុះបញ្ជីក្នុងប្រព័ន្ធរបស់ខ្លួន និងបានរកឃើញក្រុមហ៊ុនចំនួន១២ រួមទាំងក្រុមហ៊ុន Mansudae New Tech Corporation Ltd. ផងដែរ ដែលបានជាប់ពាក់ព័ន្ធជាមួយកូរ៉េខាងជើង។ ក្រុមហ៊ុនទាំងនេះត្រូវបានលុបឈ្មោះចេញពីបញ្ជីកាលពីថ្ងៃទី៣០ ខែធ្នូ ឆ្នាំ២០១៩ ខណៈភោជនីយដ្ឋានចំនួន៨ ត្រូវបានដកហូតអាជ្ញាប័ណ្ណ និងបិទទ្វារកាលពីថ្ងៃទី៥ ខែធ្នូ ឆ្នាំ២០១៩។
កាលពីថ្ងៃទី១៥ ខែកុម្ភៈ ឆ្នាំ២០២២ ទីភ្នាក់ងារសារព័ត៌មានកូរ៉េខាងជើង NK News បានស្រង់របាយការណ៍បឋមមួយរបស់ក្រុមអ្នកជំនាញអង្គការសហប្រជាជាតិ មកចុះផ្សាយថា ចារកម្មកូរ៉េខាងជើងបានបើកដំណើរការអាជីវកម្មមួយចំនួននៅកម្ពុជា រួមមានសណ្ឋាគារ កាស៊ីណូ ភោជនីយដ្ឋាន រង្គសាល និងភ្នាក់ងារទេសចរណ៍ ជាដើម ចាប់ពីពាក់កណ្ដាលឆ្នាំ២០២០។
ប្រភពដដែលបន្តថា ក្រុមអ្នកជំនាញរបស់អង្គការសហប្រជាជាតិរកឃើញថា ភ្នាក់ងារចារកម្មម្នាក់ឈ្មោះ គឹម ចុលសុខ (Kim Chol Sok) បានបើកដំណើរការអាជីវកម្មដោយប្រើឈ្មោះហៅក្រៅថា សុខា (Sok Kha) តាមការបញ្ជារបស់ការិយាល័យស៊ើបអង្កេតទូទៅ (RGB) ដែលជាភ្នាក់ងារចារកម្មកំពូលរបស់កូរ៉េខាងជើង។
ប្រភពព័ត៌មានដដែលបានបន្តទៀតថា យោងតាមសេចក្ដីព្រាងនៃរបាយការណ៍ក្រុមអ្នកជំនាញរបស់អង្គការសហប្រជាជាតិ អាជីវកម្មមួយក្នុងចំណោមអាជីវកម្មដែលលោក គីម (Kim) បានបើកដំណើរការនោះ ក្រុមហ៊ុនទេសចរណ៍ C.H. World Travel Co., Ltd មានទីតាំងនៅក្នុងរាជធានីភ្នំពេញ ដែលសម្របសម្រួលការដើរលេងកម្សាន្តនៅតំបន់អាស៊ីបូព៌ា និងអាស៊ីអាគ្នេយ៍។
យោងតាមរបាយការណ៍របស់អង្គការសហប្រជាជាតិ លោក គីម គឺជាសហការីជំនួញរបស់លោក ទ្រី ភាព ដែលជាឧកញ៉ាកាប់ឈើដ៏ល្បីល្បាញនៅកម្ពុជា ដែលសហរដ្ឋអាមេរិកបានដាក់ទណ្ឌកម្មកាលពីឆ្នាំ២០១៩ ពីបទពុករលួយ។
លោក ទ្រី ភាព ខ្លួនឯងគឺជាសហការីជិតស្និទ្ធរបស់លោក ហ៊ុន សែន ហើយក្នុងទំនាក់ទំនងកម្រិតខ្ពស់ស្អិតល្មួតបែបនេះ លោកត្រូវបានអនុញ្ញាតឱ្យប្រើប្រាស់កម្លាំងយោធាកម្ពុជាដើម្បីការពារការដឹកជញ្ជូនផលិតផលខុសច្បាប់របស់លោក។ នេះបើយោងតាមរបាយការណ៍ស៊ើបអង្កេតស៊ីជម្រៅរបស់ក្រសួងហិរញ្ញវត្ថុអាមេរិក៕