នៅក្នុងជំនួបកំពូលតាមអនឡាញកាលពីថ្ងៃព្រហស្បតិ៍ ទី៣ ខែមីនា មេដឹកនាំនៃប្រទេសចតុភាគីហៅថា Quad បានសច្ចារួមគ្នាដោយប្រកាសថាត្រូវការពារតំបន់ឥណ្ឌូ-ប៉ាស៊ីហ្វិកឱ្យមានស្ថិរភាពរឹងមាំ ហើយប្រឆាំងកម្លាំងអនុត្តរភាពណាមួយដែលបង្កអសន្តិសុខក្នុងតំបន់ ខណៈមេដឹកនាំប្រទេស៤ នេះ ព្រួយបារម្ភអំពីដែនកោះតៃវ៉ាន់ ថាអាចនឹងរងការវាយប្រហារពីសំណាក់កងទ័ពចិន។
ក្រុមចតុភាគីហៅថា Quad មាន ៤ប្រទេស គឺសហរដ្ឋអាមេរិក ជប៉ុន អូស្ត្រាលី និងឥណ្ឌា។
ទីភ្នាក់ងារសារព័ត៌មាន Reuters បានធ្វើសេចក្ដីរាយការណ៍ថា ជំនួបកំពូលរបស់ក្រុមចតុភាគីនេះធ្វើឡើងបន្ទាប់ពីមានការព្រមានថា ចិនកំពុងសិក្សាអំពីសង្គ្រាមរុស្ស៊ីលើកទ័ពឈ្លានពានអ៊ុយក្រែន ហើយធ្វើការផ្ទៀងផ្ទាត់ប្រសិនបើចិនលើកទ័ពវាយកាន់កាប់កោះតៃវ៉ាន់ ដែលចិនចាត់ទុកថាជាអាណាខេត្តរបស់ក្រុងប៉េកាំង នោះ ថាតើអាចជះឥទ្ធិពលយ៉ាងណាមកលើប្រទេសចិន។
នាយករដ្ឋមន្ត្រីនៃប្រទេសជប៉ុន Fumio Kishida បាននិយាយប្រាប់អ្នកសារព័ត៌មានក្រោយពីជំនួបនេះថា ជំនួបនេះបានឈានដល់ការសម្រេចចេញនូវគោលដៅរួមគ្នា គឺការការពារប្រទេសសម្ពន្ធមិត្តនៅក្នុងតំបន់ឥណ្ឌូ-ប៉ាស៊ីហ្វិកទាំងមូល ដែលក្នុងនោះមានដែនកោះតៃវ៉ាន់ផងដែរ។
លោក Kishida ដែលបាននិយាយយោងទៅលើប្រទេសរុស្ស៊ី ដែលបានលើកទ័ពឈ្លានពានអ៊ុយក្រែនថា ចិនអាចសិក្សាអំពីពេលវេលាណាមួយដើម្បីឈ្លានពានកោះតៃវ៉ាន់ តែលោកបញ្ជាក់ថា កម្លាំងចតុភាគីមានជំហររួមគ្នាក្នុងការការពារដែនកោះមួយនេះ។
ជាមួយគ្នានេះ នាយករដ្ឋមន្ត្រីអូស្ត្រាលី Scott Morrison បានបញ្ជាក់នៅក្នុងសេចក្ដីថ្លែងការណ៍រួមនៃមេដឹកនាំទាំង ៤ប្រទេសនេះថា ប្រទេសទាំង៤នេះ នឹងមិនបណ្ដោយឲ្យស្ថានភាពនៅក្នុងតំបន់ឥណ្ឌូ-ប៉ាស៊ីហ្វិកអាចកើតមានឡើងទៅក្នុងប្រទេសអ៊ុយក្រែនជាដាច់ខាត។
លោកបញ្ជាក់ថា តំបន់អាស៊ីប៉ាស៊ីហ្វិកទាំងមូលត្រូវតែមានស្ថិរភាព ហើយប្រទេសណាមួយបង្កអសន្តិសុខ គឺត្រូវតែប្រឈមមុខនឹងការឆ្លើយតបយ៉ាងឆាប់រហ័សពីកម្លាំងសម្ពន្ធមិត្តក្នុងតំបន់ ជាពិសេសគឺពីក្រុមចតុភាគីនេះតែម្តង។
ជំនួបរបស់មេដឹកនាំនៃប្រទេស៤ នេះ ធ្វើឡើងបន្ទាប់ពីជំនួបថ្នាក់រដ្ឋមន្ត្រីការបរទេសនៃប្រទេស៤នេះ ដែលបានជួបប្រជុំគ្នានៅក្នុងប្រទេសអូស្ត្រាលី កាលពីខែកុម្ភៈ។
ចំណែកលោកប្រធានាធិបតីសហរដ្ឋអាមេរិក ចូ បៃដិន បានបញ្ជាក់ថា ជំនួបនៃមេដឹកនាំ ៤ប្រទេសនេះបាននាំឲ្យមានភាពប្ដេជ្ញាចិត្តរួមគ្នាជាថ្មីទៀតអំពីការជួយការពារអធិបតេយ្យពិភពលោក ដែលក្នុងនោះមានតំបន់ឥណ្ឌូ-ប៉ាស៊ីហ្វិកផងដែរ។
ជាមួយគ្នានេះ លោកនាយករដ្ឋមន្ត្រីឥណ្ឌា ណារិនឌ្រាមូឌី បានទទូចឱ្យក្រុមប្រទេសទាំង៤នេះបន្តឈរលើស្មារតីរួម គឺប្រឆាំងប្រទេសមួយដែលបង្កអសន្តិសុខតំបន់ ដែលលោកថាប្រឆាំងនឹងប្រទេសនេះគឺដូចនឹងជួយការពារសន្តិសុខតំបន់ឥណ្ឌូ-ប៉ាស៊ីហ្វិកផងដែរ។
លោក មូឌី មិនបាននិយាយចំឈ្មោះប្រទេសណានោះទេ តែទំនងលោកចង់សំដៅទៅលើប្រទេសចិន ដែលត្រូវបានចោទថាកំពុងធ្វើអនុត្តរភាពយោធាតាមរយៈកម្លាំងសេដ្ឋកិច្ចរបស់ខ្លួនទៅលើប្រទេសកូនបំណុល។
តាមសេចក្ដីថ្លែងការណ៍ គឺមេដឹកនាំប្រទេស៤នេះ នឹងជួបគ្នាផ្ទាល់នៅក្រុងតូក្យូ នៅប៉ុន្មានខែខាងមុខនេះ។ ក្រៅពីការលើកឡើងអំពីសន្តិសុខតំបន់អាស៊ីប៉ាស៊ីហ្វិក មេដឹកនាំបួនប្រទេសនេះក៏បានសន្យាផ្ដល់ជំនួយមនុស្សធម៌ទៅឲ្យជនភៀសខ្លួននៃប្រទេសអ៊ុយក្រែន ដែលភៀសខ្លួនដោយសារសង្គ្រាមឈ្លានពានពីសំណាក់ប្រទេសរុស្ស៊ីដែរ៕