លោកនាយករដ្ឋមន្ត្រី ហ៊ុន សែន បញ្ជាទៅសមត្ថកិច្ចឱ្យត្រៀមឧទ្ធម្ភាគចក្រសម្រាប់ដេញចាប់ឈ្មួញទុច្ចរិតដែលនេសាទត្រីខុសច្បាប់នៅលើបឹងទន្លេសាប ក្រោយពេលលោកមើលឃើញថា សមត្ថកិច្ចចាប់បានតែប្រជានេសាទតូចតាច ខណៈអ្នកប្រព្រឹត្តិបទល្មើសធំៗមិនដែលចាប់បាននោះ។
ប្រតិកម្មរបស់លោក ហ៊ុន សែន នេះធ្វើឡើងស្របពេលដែលប្រធានរាជបណ្ឌិត្យសភាកម្ពុជា បណ្ឌិត សុខ ទូច បានបង្ហោះសារនៅលើទំព័រហ្វេសប៊ុក ដោយរិះគន់ទូកនេសាទជនជាតិវៀតណាម ថាពួកគេមិនត្រឹមតែមករស់នៅលើទឹកដីកម្ពុជាទេ ហើយថែមទាំងកម្ទេចត្រីនៅក្នុងបឹងទន្លេសាបរបស់កម្ពុជាថែមទៀត។
ក្នុងពិធីបិទសន្និបាតបូកសរុបការងារឆ្នាំ២០២១ និងលើកទិសដៅអនុវត្តការងារឆ្នាំ២០២២ របស់ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៣ មីនា បុរសខ្លាំងកម្ពុជា លោក ហ៊ុន សែន បានបញ្ជាឱ្យចាប់ឈ្មួញទុច្ចរិតនេសាទត្រីខុសច្បាប់នៅលើបឹងទន្លេសាប។
មេដឹកនាំកម្ពុជារូបនេះបញ្ជាក់ថា ចាប់ពីពេលនេះទៅ អាជ្ញាធរគ្រប់ខេត្តទាំងអស់ដែលនៅជាប់ជុំវិញបឹងទន្លេសាប ត្រូវតែតាមចាប់ពួកឈ្មួញ និងពួកប្រព្រឹត្តិបទល្មើសនេសាទធំៗឱ្យទាល់តែបាន ទោះក្នុងវិធីណាក៏ដោយ។ លោក ហ៊ុន សែន ក៏បានបញ្ជាឱ្យចាប់ដាក់គុក ប្រសិនបើអ្នកណានៅតែហ៊ានប្រឆាំងចំពោះបទបញ្ជារបស់លោក។ លោកបានរិះគន់ចំពោះអាជ្ញាធរមួយចំនួនថា បានគប់គិតគ្នាជាមួយពួកប្រព្រឹត្តិបទល្មើសទាំងនោះ ដោយសារពេលចុះបង្ក្រាប ពួកអ្នកប្រព្រឹត្តិបទល្មើសនេសាទតែងតែដឹងមុន ហើយគេចខ្លួនបាត់។
លោក ហ៊ុន សែន ក៏បានណែនាំទៅកងកម្លាំងសមត្ថកិច្ចឱ្យប្រើឧទ្ធម្ភាគចក្រ ចុះប្រតិបត្តិការបង្ក្រាបពួកល្មើសនេសាទ និងបញ្ជាឱ្យវ៉ៃខ្នោះលើជនល្មើសនេសាទដោយមិនចាំបាច់មានគោលនយោបាយអ្វីនោះឡើយ។
បើតាម លោក ហ៊ុន សែន ថាការដាក់ចេញបទបញ្ជាបែបនេះ ដើម្បីកុំឱ្យផលត្រីនៅប្រទេសកម្ពុជាកាន់តែខ្សោយទៅៗពីមួយឆ្នាំទៅមួយឆ្នាំនោះ។
លោក សុខ ទូច ចោទថាជនជាតិវៀតណាមទាំងនោះបានប្រើប្រាស់ឧបករណ៍ឆក់ត្រីខុសច្បាប់ និងប្រើប្រាស់ទូកលឿនដើម្បីអូសយកត្រី ទាំងត្រីស្រកា ទាំងត្រីអត់ស្រកា រីឯត្រីតូចៗពួកគេប្រើការមិនកើត ពួកគេបានយកទៅធ្វើជាជីថែមទៀត។
បើតាមលោក សុខ ទូច បទល្មើសដែលបានរកឃើញបឋមមានរបាំងព្រួលជាច្រើនគីឡូម៉ែត្រ ដែលគេដាក់ស្កាត់ចាប់ត្រី ការដាក់ស្បៃមុងក្រឡាល្អិត រួមទាំងបទល្មើសឆក់ត្រីក្នុងទ្រង់ទ្រាយធំ ជាដើម។ លោកថា ២ឆ្នាំទៀត ត្រីនៅតំបន់បឹងទន្លេសាបនឹងត្រូវផុតពូជ បើគ្មានវិធានការទប់ស្កាត់ជាបន្ទាន់ទេនោះ។
នាយកប្រតិបត្តិអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ ធ្លាប់បានលើកឡើងកន្លងមកថា វិធានការទប់ស្កាត់បទល្មើសទ្រង់ទ្រាយធំយូរអង្វែងនៅតំបន់នេះ នឹងមិនអាចទៅរួចទេ បើប្រព័ន្ធគ្រប់គ្រងនៅតំបន់នេះធ្វើឱ្យការអនុវត្តច្បាប់លែងដំណើរការទៅហើយនោះ។ លោកថា បញ្ហានេះអ្នកចូលរួមទប់ស្កាត់បទល្មើសក្លាយជាជនល្មើសវិញ បើប្រព័ន្ធដែលអនុវត្តច្បាប់ជាប់គាំងនោះមិនត្រូវបានកែលំអ។
បើតាមសហគមន៍រស់នៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ប្រាប់សារព័ត៌មាន ឌឹ ខេមបូឌា ដេលី ថា ជនជាតិវៀតណាមតែងតែប្រើប្រាស់ឧបករណ៍ទំនើបៗខុសច្បាប់ដើម្បីឆក់ត្រីក្នុងបឹងទន្លេសាប ទើបធ្វើឱ្យត្រីនៅទន្លេសាបហិនហោចស្ទើរគ្មានសល់។ ពួកគេនិយាយថា ប្រសិនបើពួកគេត្រូវបានសមត្ថកិច្ច ឬអាជ្ញាធរចាប់បាន នោះពួកគេជាប់ឃុំមិនដល់ ៤៨ម៉ោងនោះទេ ត្រូវប្រធានសមាគមវៀតណាមប្រចាំកម្ពុជាមកធានាខ្លួនពួកគេ។ ករណីនេះហើយទើបបានជាជនជាតិវៀតណាម មិនខ្លាច ហើយបន្តប្រើឧបករណ៍នេសាទខុសច្បាប់កម្ទេចត្រីនៅក្នុងបឹងទន្លេសាបរបស់ខ្មែរបន្តទៀត៕