អ្នកឃ្លាំមើលនិយាយថា អតីតប្រធានគណបក្សប្រឆាំង លោក សម រង្ស៊ី ប្រហែលជាកំពុងគប់គិតគ្នាស្ងាត់ៗជាមួយបុរសខ្លាំងកម្ពុជា លោក ហ៊ុន សែន ដើម្បីផលប្រយោជន៍រៀងៗខ្លួនរបស់ពួកគេក្នុងសំណុំរឿងឧក្រិដ្ឋកម្មបោកគ្រាប់បែកលើហ្វូងបាតុករ កាលពីថ្ងៃទី៣០ ខែមីនា ឆ្នាំ១៩៩៧ ជាជាងការស្វែងរកយុត្តិធម៌ឱ្យជនរងគ្រោះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនីហ្វេសប៊ុករបស់លោកកាលពីថ្ងៃទី៣០ មីនា ថា ប្រសិនបើបណ្ដឹងរបស់លោក សម រង្ស៊ី ធ្វើឡើងដើម្បីផលប្រយោជន៍នយោបាយនោះ គឺស្មើនឹងលោក សម រង្ស៊ី យកឈាមដាបធរណីរបស់ជនរងគ្រោះក្នុងព្រឹត្តិការណ៍គប់គ្រាប់បែកទៅដោះដូរឱកាសនយោបាយផ្ទាល់ខ្លួនពីលោក ហ៊ុន សែន ប៉ុណ្ណោះ។ ជាងនេះទៀត ការធ្វើបែបនេះ មិនមែនជាការចរចានយោបាយនោះទេ ប៉ុន្តែគឺជាការគប់គិតគ្នាស្ងាត់ៗរវាងលោក ហ៊ុន សែន និងលោក សម រង្ស៊ី ដើម្បីផលប្រយោជន៍រៀងខ្លួនរបស់ពួកគេសុទ្ធសាធ មិនមែនដើម្បីរកយុត្តិធម៌ឱ្យជនរងគ្រោះនោះឡើយ។
អ្នកវិភាគរូបនេះអះអាងថា កាលពីចុងឆ្នាំ២០០៥ លោក សម រង្ស៊ី ធ្លាប់បានដកពាក្យបណ្ដឹងពីតុលាការសហរដ្ឋអាមេរិក នៅទីក្រុង NEW YORK ម្តងរួចមកហើយពីការប្តឹងលោក ហ៊ុន សែន ចំពោះការគប់គ្រាប់បែកនេះ ជាថ្នូរនឹងការចូលស្រុករបស់គាត់ ដែលត្រូវគេរិះគន់ថាជាការដោះដូរដោយកេងចំណេញលើសាកសព និងព្រលឹងជនរងគ្រោះដែលត្រូវបានសម្លាប់ក្នុងព្រឹត្តិការណ៍កាលពីថ្ងៃទី៣០ ខែមីនា ឆ្នាំ១៩៩៧ កន្លងទៅនោះ។
លោក គឹម សុខ បញ្ជាក់ថា ល្បែងនយោបាយរកផលប្រយោជន៍ផ្ទាល់ខ្លួនរបស់លោក សម រង្ស៊ី និងលោក ហ៊ុន សែន ពីការស្លាប់របស់ហ្វូងបាតុករស្លូតត្រង់នេះ មិនត្រឹមតែធ្វើឲ្យជនរងគ្រោះមិនទទួលបានយុត្តិធម៌នោះទេ ថែមទាំងរុញកម្ពុជាឲ្យលង់ក្នុងអំណាចផ្ដាច់ការរបស់លោក ហ៊ុន សែន សម្លាប់ប្រជាធិបតេយ្យរហូតដល់សព្វថ្ងៃនេះថែមទៀត។
លោក គឹម សុខ អះអាងថា បើបណ្ដឹងរបស់លោក សម រង្ស៊ី និងភរិយារបស់គាត់ ពិតជាមានបំណងស្វែងរកយុត្តិធម៌ជូនជនរងគ្រោះប្រាកដមែន វានឹងមានឥទ្ធិពលអាចធ្វើឲ្យស្ទះផែនការផ្ទេរអំណាចរបស់គ្រួសារ ហ៊ុន ទាំងស្រុង។ ប៉ុន្តែជីវិតនយោបាយរបស់លោក សម រង្ស៊ី ក្នុងសមរភូមិនយោបាយកម្ពុជា ក៏ត្រូវជាប់គាំងដែរ ព្រោះថាលោក ហ៊ុន សែន នឹងនៅបន្តក្តោបក្តាប់អំណាចបន្តទៀត ត្បិតគាត់ខ្លាចចំណាត់ការរបស់តុលាការប្រទេសបារាំងលើរូបគាត់ក្រោយពេលអស់អំណាច។
ការអះអាងនេះ ធ្វើឡើងបន្ទាប់ពីអតីតមេដឹកនាំប្រឆាំង លោក សម រង្ស៊ី គាស់កកាយឡើងវិញនូវព្រឹត្តិការណ៍គប់គ្រាប់បែកឆ្នាំ១៩៩៧ ដែលថាមេដឹកនាំបក្សកាន់អំណាច លោក ហ៊ុន សែន ជាអ្នកបញ្ជាពីក្រោយខ្នង។
អតីតមេដឹកនាំប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី៣០ ខែមីនា ឆ្នាំ២០២២ ថា ថ្ងៃទី៣០ ខែមីនា ឆ្នាំ២០២២ នេះ គឺជាខួបលើកទី២៥ឆ្នាំនៃការវាយប្រហារដោយគ្រាប់បែកដៃនៅក្នុងទីក្រុងភ្នំពេញ កាលពីឆ្នាំ១៩៩៧ ដែលមានជនឧក្រិដ្ឋ ២នាក់ឈ្មោះ ហ៊ុយ ពិសិដ្ឋ និង ហ៊ីង ប៊ុនហៀង ដែលជាជនដៃដល់ ប៉ុន្តែជនឧក្រិដ្ឋទាំង ២នាក់នេះគ្រាន់តែធ្វើតាមបញ្ជាលោក ហ៊ុន សែន តែប៉ុណ្ណោះ។
ប៉ុន្តែកាលពីថ្ងៃទី៣ ខែកុម្ភៈ ឆ្នាំ២០០៦ លោក សម រង្ស៊ី ធ្លាប់បានផ្ញើលិខិតមួយច្បាប់ជូនមេដឹកនាំបក្សកាន់អំណាច លោក ហ៊ុន សែន ដែលមានខ្លឹមសារថា លោកពិតជាមានការសោកស្តាយខ្លាំងណាស់ដែលបានចោទប្រកាន់លើលោក ហ៊ុន សែន ថានៅពីក្រោយព្រឹត្តិការណ៍គប់គ្រាប់បែកលើហ្វូងបាតុករកាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ ដូច្នេះថ្ងៃក្រោយ លោកនឹងមិនឱ្យមានការចោទប្រកាន់បែបនេះលើលោក ហ៊ុន សែន បន្តទៀតនោះទេ។
គ្រាប់បែកដៃចំនួន ៤គ្រាប់ត្រូវបានជនមិនស្គាល់មុខគប់ចូលក្នុងហ្វូងបាតុករនៅខាងមុខរដ្ឋសភាជាតិកម្ពុជា ក្នុងទីក្រុងភ្នំពេញ កាលពីថ្ងៃទី៣០ ខែមីនា ឆ្នាំ១៩៩៧ កន្លងទៅ បណ្ដាលឲ្យមនុស្សយ៉ាងហោចណាស់ ១៦នាក់ស្លាប់ និងជាង ១៥០នាក់ផ្សេងទៀតរបួស ប៉ុន្តែរហូតមកទល់ពេលនេះ ជនដៃដល់មិនត្រូវបានចាប់ខ្លួនយកមកផ្ដន្ទាទោសតាមផ្លូវច្បាប់នៅឡើយទេ។
អង្គការឃ្លាំមើលសិទ្ធិមនុស្ស Human Rights Watch កាលពីថ្ងៃទី២៩ ខែមីនា ឆ្នាំ២០២២ បានអះអាងថា ខ្លួនគាំទ្រលើដីកាតុលាការប្រទេសបារាំង ដែលបង្គាប់ឲ្យមន្ត្រីយោធាជាន់ខ្ពស់ពីររូប គឺលោក ហ៊ុយ ពិសិដ្ឋ និងលោក ហ៊ីង ប៊ុនហៀង ដែលជាមេអង្គរក្សរបស់លោក ហ៊ុន សែន ចូលសវនាការទាក់ទិននឹងការវាយប្រហារដោយគ្រាប់បែកដៃនៅឆ្នាំ១៩៩៧ កន្លងទៅ។ អង្គការនេះក៏បានជំរុញឲ្យមានការស្នើទៅអឺរ៉ុប និងប៉ូលិស ចាប់ខ្លួនមន្ត្រីយោធាជាន់ខ្ពស់ទាំងពីររូបនោះផងដែរ៕