រដ្ឋមន្ត្រីក្រសួងមហាផ្ទៃ ឯកភាពឲ្យបង្កើតច្បាប់សម្រាប់គ្រប់គ្រងសារធាតុគីមីទាំងឡាយដែលអាចផ្សំ ឬផលិតជាគ្រឿងញៀនបាន ដើម្បីទប់ស្កាត់គ្រឿងញៀននៅកម្ពុជា ខណៈរយៈពេល ៣ខែ សមត្ថកិច្ចចាប់បានគ្រឿងញៀនជាង ៣តោន និងបង្ក្រាបសារធាតុគីមីជាង ៣០០តោន។
ថ្លែងក្នុងកិច្ចប្រជុំបូកសរុបលទ្ធផលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ និងផ្សព្វផ្សាយផែនការបន្តលើកទី៧ នាថ្ងៃទី៣១ ខែមីនា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង ថាពួកក្រុមឧក្រិដ្ឋជនបានលួចបន្លំយកសារធាតុគីមីទាំងនោះទៅប្រើប្រាស់ ដើម្បីផ្សំចេញជាគ្រឿងញៀនសម្រាប់ប្រើប្រាស់នៅកម្ពុជា និងនៅប្រទេសទី៣ ឬទី៤ ជាដើម។
ស្របពេលសមត្ថកិច្ចបាននិងកំពុងបង្ក្រាបសារធាតុគីមីដែលអាចផ្សំធ្វើជាគ្រឿងញៀនបានជាបន្តបន្ទាប់នោះ លោក ស ខេង ថាមានក្រសួងស្ថាប័នពាក់ព័ន្ធខ្លះបានអនុញ្ញាតឱ្យនាំចូលសារធាតុគីមីមកផ្សំ និងផលិតជាគ្រឿងញៀនចូលដោយស្របច្បាប់មកកម្ពុជា ក្នុងរូបភាពសម្រាប់ប្រើប្រាស់ក្នុងវិស័យផ្សេងៗ និងអភិវឌ្ឍសេដ្ឋកិច្ច។
ករណីនេះ លោក ស ខេង ថារូបលោកកំពុងពិភាក្សាជាមួយក្រសួងយុត្តិធម៌ និងអគ្គស្នងការដ្ឋាននគរបាល ហើយបច្ចុប្បន្នស្ថាប័នទាំងនោះក៏បានឯកភាពគ្នាបង្កើតក្របខ័ណ្ឌច្បាប់មួយ ដើម្បីគ្រប់គ្រងសារធាតុទាំងឡាយដែលយកទៅកែច្នៃផលិតគ្រឿងផ្សំដើម្បីផលិតគ្រឿងញៀនបាន។
លោក ស ខេង ជំរុញទៅក្រសួងស្ថាប័នពាក់ព័ន្ធ ត្រូវខិតខំធ្វើការងារទាំងនេះ ដើម្បីទទួលបានជោគជ័យ ខណៈបច្ចុប្បន្ន គ្រឿងញៀនសារធាតុគីមីជាង ៣០០តោន និងគ្រឿងញៀនជាង ៣តោន ត្រូវបានសមត្ថកិច្ចចាប់បានក្នុងរយៈពេល ៣ខែឆ្នាំ២០២២។
កាលពីថ្ងៃទី២៨ ខែធ្នូ ឆ្នាំ២០២១ រដ្ឋមន្ត្រីក្រសួងមហាផ្ទៃ បង្ហាញការព្រួយបារម្ភចំពោះអនាគតអ្នកស្នងតំណែងប្រទេសជាតិ ដោយសារកុមារអាយុក្រោម ១៨ឆ្នាំមានចំនួនច្រើនត្រូវចាប់ឃុំខ្លួនជាប់ពាក់ព័ន្ធនឹងគ្រឿងញៀន។ លោកបន្តថា បច្ចុប្បន្នគ្រឿងញៀនកំពុងបំផ្លាញធនធានមនុស្សទាំងនេះដោយមិនទាន់មានថ្នាំព្យាបាលនៅឡើយ។
ក្រៅពីបារម្ភពីអនាគតយុវជននោះ រដ្ឋមន្ត្រីក្រសួងមហាផ្ទៃ លោក ស ខេង បារម្ភអំពីការគ្រប់គ្រងសន្តិសុខនៅក្នុងពន្ធនាគារ ដោយសារអ្នកទោសគ្រឿងញៀនមានការកើនឡើង ខណៈហេដ្ឋារចនាសម្ព័ន្ធក្នុងពន្ធនាគារមួយចំនួនមានសភាពចាស់ទ្រុឌទ្រោម។
ប្រធានអង្គការតម្លាភាពកម្ពុជា លោក ប៉ិច ពិសី បានប្រាប់សារព័ត៌មានក្នុងស្រុកថា ការសម្រេចរបស់រដ្ឋមន្ត្រីក្រសួងមហាផ្ទៃជាសញ្ញាវិជ្ជមានមួយ ដោយលោកថាកម្ពុជាគួរមានច្បាប់មួយក្នុងការគ្រប់គ្រងសារធាតុគីមី ដែលបានធ្វើឱ្យប៉ះពាល់សុខភាពសាធារណៈ ប៉ុន្តែបើសិនជាមានច្បាប់ហើយ ការអនុវត្តមិនមានប្រសិទ្ធភាពនោះ លោកថាក៏មិនអាចទប់ស្កាត់បញ្ហានេះបានដែរ។
លោក ប៉ិច ពិសី បន្តថា បច្ចុប្បន្នគ្រឿងញៀនកំពុងជះឥទ្ធិពលខ្លាំងដល់សង្គមកម្ពុជា ខណៈគ្រឿងញៀនបានរីករាលដាលពីទីក្រុងចូលទៅកាន់ជនបទ ដែលកំពុងបង្កផលប៉ះពាល់ដល់យុវជន។ លោកថា មួយរយៈពេលចុងក្រោយនេះ សមត្ថកិច្ចខិតខំប្រឹងប្រែងទប់ស្កាត់ផុសផុល ប៉ុន្តែនៅមិនទាន់គ្រប់គ្រាន់នោះទេ។
កាលពីថ្ងៃទី៣០ មីនា លោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន សម្ដែងការហួសចិត្តចំពោះករណីជនល្មើសបានយកគោយន្តដឹកគ្រឿងញៀនដែលមានទម្ងន់ជាង ៦០០គីឡូក្រាមពីព្រំដែនឡាវ បម្រុងដឹកចូលមកកម្ពុជា។
យោងតាមរបាយការណ៍របស់អង្គការសហប្រជាជាតិដើម្បីប្រយុទ្ធប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១ បង្ហាញថា កម្ពុជាគឺជាគោលដៅនៃក្រុមឧក្រិដ្ឋជនប្រើប្រាស់សម្រាប់ចរាចរគ្រឿងញៀន ផលិត និងចែកចាយបន្ត៕