បុរសម្នាក់ដែលថ្លើមធំហ៊ានបោចពុកមាត់ខ្លា ហើយទះក្បាលនាគ ជាមហាបុរសម្នាក់ដែលពើងទ្រូងប្រកាសប្រាប់ពិភពលោកថា លោកមិនត្រូវការរថយន្តដើម្បីដឹកលោកគេចខ្លួនពីគ្រាប់កាំភ្លើងរបស់បច្ចាមិត្ត ហើយក៏មិនសុខចិត្តឱនក្បាលសុំសេចក្តីសុខ ឬសុំជីវិតរស់ពីសត្រូវនោះដែរ ប៉ុន្តែលោកត្រូវការគ្រឿងសត្រាវុធដើម្បីកម្ចាត់សត្រូវឈ្លានពានតែប៉ុណ្ណោះ។
តើបុរសរូបនោះជានរណា ហើយអាងអ្វីដែរ?
លោក វូឡូឌីមៀរ ហ្សេឡែនស្គី (Volodymyr Zelenskiy) ជាមេដឹកនាំអ៊ុយក្រែនដែលបានសន្យាចំពោះមុខប្រជាជាតិអ៊ុយក្រែន ថានឹងដឹកនាំប្រទេសទៅរកការបញ្ចប់សង្គ្រាមរវាងរុស្ស៊ី និងអ៊ុយក្រែន នៅតំបន់ដុនបាស់ តាមរយៈនៃការស្នើសុំចូលជាសមាជិកអង្គការយោធា North Atlantic Treaty Organization (NATO) និងសហភាពអឺរ៉ុប កាលពីពេលដែលលោកឈរឈ្មោះជាបេក្ខភាពប្រធានាធិបតីក្នុងឆ្នាំ២០១៨ ប៉ុន្តែត្រូវផ្ទុះសង្គ្រាមជាមួយរុស្ស៊ីដោយសារតែសំណើនេះ។
ការប៉ុនប៉ងចូលជាសមាជិកទី៣១ របស់អង្គការយោធាណាតូ និងចូលជាសមាជិកសហភាពអឺរ៉ុបរបស់លោក វូឡូឌីមៀរ ហ្សេឡែនស្គី ក្រោយពេលជាប់ឆ្នោតជាប្រធានាធិបតីអ៊ុយក្រែន ធ្វើឲ្យមហាអំណាចកុម្មុយនីស្តក្បែរខាង គឺប្រទេសរុស្ស៊ីមិនសប្បាយចិត្តយ៉ាងខ្លាំង ក្នុងនោះប្រទេសរុស្ស៊ីដែលដឹកនាំដោយប្រធានាធិបតីលោក វ៉្លាឌីមៀរ ពូទីន (Vladimir Putin) បានបញ្ជូនកងទ័ព និងសព្វាវុធគ្រប់ធុនរបស់ខ្លួនទៅតំបន់ដុនបាស់ជាបន្តបន្ទាប់ ក្រោមហេតុផលការពារសន្តិសុខព្រំដែន។
នៅព្រឹកព្រលឹមថ្ងៃទី២៤ ខែកុម្ភៈ ឆ្នាំ២០២២ គឺជាថ្ងៃប្រវត្តិសាស្ត្ររបស់ប្រទេសអ៊ុយក្រែននៃរដ្ឋាភិបាលរបស់ប្រធានាធិបតីលោក វូឡូឌីមៀរ ហ្សេឡែនស្គី ដែលមហាអំណាចកុម្មុយនីស្តរុស្ស៊ីប្រកាសប្រតិបត្តិការសឹកលើទឹកដីរបស់ខ្លួន ក្នុងនោះរុស្ស៊ីបានពង្រាយទ័ពប្រមាណជា ១០ម៉ឺននាក់ និងគ្រឿងសព្វាវុធទំនើបៗជាច្រើនមានទាំងកាំជ្រួច S-400 ដែលពិភពលោកខ្លាចរអាគ្រប់គ្នា ដើម្បីវាយលុកកាន់កាប់អ៊ុយក្រែនឱ្យបានក្នុងរយៈពេល ៤៨ម៉ោង ប៉ុន្តែការរំពឹងទុកនេះត្រូវបរាជ័យទាំងស្រុង។
គិតត្រឹមថ្ងៃទី២៣ ខែមីនា ឆ្នាំ២០២២ សង្គ្រាមឈ្លានពានរុស្ស៊ីលើប្រទេសអ៊ុយក្រែនមានរយៈពេលជាង ២០ថ្ងៃហើយ ប៉ុន្តែរុស្ស៊ីនៅមិនទាន់អាចវាយលុកកាន់កាប់ទីក្រុងធំៗ និងរដ្ឋធានីរបស់ប្រទេសអ៊ុយក្រែនបាននៅឡើយទេ ដូចជារដ្ឋធានីគៀវ ជាដើម ខណៈកងទ័ពរុស្ស៊ីបានស្លាប់ជាង ៧ពាន់នាក់ និងរបួសជាង ២ម៉ឺននាក់។
ភាពអង់អាច និងការប្តូរផ្តាច់របស់ប្រធានាធិបតីអ៊ុយក្រែន លោក វូឡូឌីមៀរ ហ្សេឡែនស្គី ដែលមិនរត់ចេញពីប្រទេសយករួចខ្លួនក្នុងពេលមានសង្គ្រាម ហើយសុខចិត្តចូលក្នុងសមរភូមិដោយផ្ទាល់ដើម្បីការពារទឹកដីជាមួយកងទ័ពអ៊ុយក្រែន គឺជាវីរភាពដ៏ក្លាហានដែលបានដាស់ស្មារតីឲ្យពលរដ្ឋអ៊ុយក្រែនទូទាំងប្រទេសងើបឡើងតស៊ូ ក្លាយជាកម្លាំងប្រយុទ្ធស្ម័គ្រស្លាប់ប្រឆាំងនឹងការឈ្លានពានដែលមហាអំណាចរុស្ស៊ីមិននឹកស្មានដល់។
ដោយសារតែវីរភាពរបស់លោក វូឡូឌីមៀរ ហ្សេឡែនស្គី នេះហើយ បាននាំឲ្យប្រទេសប្រមាណជិត ២០ បានប្រកាសជួយអ៊ុយក្រែនពេញទំហឹងតាមរយៈនៃការផ្តល់អាវុធយុទ្ធភណ្ឌ បញ្ជូនកងទ័ពរបស់ខ្លួន និងថវិកាយ៉ាងច្រើនសន្ធឹកសន្ធាប់។ លើសពីនេះ ពួកគេបានឯកភាពគ្នាដាក់ទណ្ឌកម្មលើមហាអំណាចរុស្ស៊ីជាបន្តបន្ទាប់ទៀតផង។
នៅថ្ងៃដំបូងនៃការវាយលុករបស់រុស្ស៊ីលើទឹកដីអ៊ុយក្រែន ប្រធានាធិបតីសហរដ្ឋអាមេរិក លោក ចូ បៃដិន បានអំពាវនាវឲ្យប្រធានាធិបតីអ៊ុយក្រែនភៀសខ្លួនចាកចេញពីប្រទេស ដើម្បីសុវត្ថិភាពផ្ទាល់ខ្លួន ប៉ុន្តែលោក វូឡូឌីមៀរ ហ្សេឡែនស្គី ឆ្លើយតបថា អ្វីដែលលោកត្រូវការនៅពេលនេះ គឺអាវុធសម្រាប់ប្រឆាំងការឈ្លានពានរបស់រុស្ស៊ី មិនមែនរថយន្តសម្រាប់ដឹកលោកគេចខ្លួននោះទេ។
ត្រង់ចំណុចនេះ គេដាក់សំណួរថា តើលោក វូឡូឌីមៀរ ហ្សេឡែនស្គី គឺជាមេដឹកនាំខ្លាំងប៉ុនណា ហ៊ានប្រឈមមុខជាមួយមហាអំណាចរុស្ស៊ី ដែលធ្វើឲ្យពិភពលោកកោតស្ញប់ស្ញែងចំពោះវីរភាពរបស់លោក ដែលហ៊ានប្រកាសវាយបកលើមហាអំណាចកុម្មុយនីស្តមួយនេះ ដែលសូម្បីតែប្រទេសធំៗមួយចំនួនក៏មានការខ្លាចរអាដែរនោះ។
លោក វូឡូឌីមៀរ ហ្សេឡែនស្គី កើតនៅថ្ងៃទី២៥ ខែមករា ឆ្នាំ១៩៧៨ ក្នុងទីក្រុងហ្រ្គីវ ហ្គីរី ប្រទេសអ៊ុយក្រែន ដែលជាអតីតដែនដីរបស់សហភាពសូវៀត។ លោកមានឪពុកឈ្មោះ អូឡិច សាន់ដ្រឺ ហ្សេឡែនស្គី និងម្តាយឈ្មោះ រីម៉ា ហ្សេឡែនស្គា។ ពួកគេសុទ្ធតែមានដើមកំណើតជាជនជាតិជ្វីហ្វ។
លោក វូឡូឌីមៀរ ហ្សេឡែនស្គី ជានិស្សិតផ្នែកច្បាប់នៅសាកលវិទ្យាល័យសេដ្ឋកិច្ចជាតិ ក្នុងទីក្រុងគៀវ ប៉ុន្តែក្រោយបញ្ចប់ការសិក្សានៅសាកលវិទ្យាល័យក្នុងឆ្នាំ២០០០ លោកបានជ្រើសរើសអាជីពក្នុងវិស័យសិល្បៈទៅវិញ ដោយសារតែសមត្ថភាពកំប្លែងរបស់លោក។
បន្ទាប់ពីប្រឡូកក្នុងវិស័យសិល្បៈអស់ជាច្រើនឆ្នាំ លោក វូឡូឌីមៀរ ហ្សេឡែនស្គី បានបង្កើតក្រុមកំប្លែងផ្ទាល់ខ្លួនមួយដែលមានឈ្មោះថា ខ្វា ថាល់ ណាញធីហ្វាយ (Kvartal 95) ដែលទទួលបានការពេញនិយមយ៉ាងខ្លាំងនៅក្នុងប្រទេសអ៊ុយក្រែន ហើយក្រុមនេះបានចូលរួមប្រកួតក្នុងកម្មវិធីល្បីៗជាច្រើនផងដែរ។
ក្រោយជោគជ័យក្នុងអាជីពសិល្បៈក្នុងឆ្នាំ២០០៣ ដែលទទួលបានការផលិតកម្មវិធីឱ្យទូរទស្សន៍ជាច្រើននៅក្នុងស្រុក លោក វូឡូឌីមៀរ ហ្សេឡែនស្គី បានរៀបអាពាហ៍ពិពាហ៍ជាមួយភរិយាឈ្មោះ អូឡេណា ហ្គីយ៉ាស្គូ ក្នុងខែកញ្ញា ឆ្នាំ២០០៣ ហើយចំណងអាពាហ៍ពិពាហ៍នេះទទួលបានកូនប្រុសស្រីពីរនាក់ក្នុងឆ្នាំ២០០៤ និងឆ្នាំ២០១៣។
ក្រោយអាពាហ៍ពិពាហ៍បាន ៥ឆ្នាំ លោក វូឡូឌីមៀរ ហ្សេឡែនស្គី បានដឹកនាំក្រុម ខ្វា ថាល់ ណាញធីហ្វាយ (Kvartal 95) ផលិតខ្សែភាពយន្តជាច្រើន ដូចជារឿង Love In The Big City រឿងកំប្លែងមនោសញ្ចេតនា 8 First Dates រឿង 8 New Dates និងរឿងកំប្លែងរុស្ស៊ីដែលលោកសម្ដែងជាតួអង្គ ណាប៉ូឡេអ៉ុង ជាដើម។
ក្រៅពីវិស័យសិល្បៈ លោក វូឡូឌីមៀរ ហ្សេឡែនស្គី បានផ្តល់ថវិកាប្រមាណជា ៥ម៉ឺនដុល្លារអាមេរិកដល់ទាហានអ៊ុយក្រែនអំឡុងសង្គ្រាមនៅតំបន់ដុនបាស់ ដែលជាផ្នែកមួយនៃសង្គ្រាមរុស្ស៊ី និងអ៊ុយក្រែន ហើយបញ្ហានេះ ក្រុមអ្នកនយោបាយរុស្ស៊ីជាច្រើនរូបបានដាក់ញត្តិទាមទារហាមឃាត់កិច្ចការរបស់លោកផងដែរ។
ក្រោយជាប់ឈ្មោះពាក់ព័ន្ធរឿងនយោបាយ លោក វូឡូឌីមៀរ ហ្សេឡែនស្គី បានផលិតខ្សែភាពយន្តភាគមួយមានចំណងជើងថា Servant of the People ឬអ្នកបម្រើប្រជាជន ដែលលោកបានដើរតួជាតួអង្គប្រធានាធិបតីអ៊ុយក្រែន ដែលបានចាក់បញ្ចាំងជាលើកដំបូងនៅក្នុងខែតុលា ឆ្នាំ២០១៥។
ក្រោយការចាក់ផ្សាយរឿង Servant of the People ឬអ្នកបម្រើប្រជាជន តាមបណ្ដាញទូរទស្សន៍ ប្រជាប្រិយភាពរបស់លោកបានហក់ឡើងកាន់តែខ្លាំង។ ដោយសារតែបែបនេះ នៅខែមីនា ឆ្នាំ២០១៨ ក្រុម ខ្វា ថាល់ ណាញធីហ្វាយ (Kvartal 95) របស់លោក បានសម្រេចបង្កើតគណបក្សនយោបាយមួយដែលមានឈ្មោះដូចទៅនឹងរឿងដែលលោកបានសម្ដែងដែរ គឺគណបក្ស Servant of the People ឬគណបក្សអ្នកបម្រើប្រជាជន។
នៅខែធ្នូ ឆ្នាំ២០១៨ តារាកំប្លែងអ៊ុយក្រែនរូបនេះបានប្រកាសឈរឈ្មោះជាបេក្ខជនប្រធានាធិបតីសម្រាប់ការបោះឆ្នោតឆ្នាំ២០១៩ ហើយលោកសន្យាថា លោកនឹងព្យាយាមបញ្ចប់សង្គ្រាមនៅតំបន់ដុនបាស់ឱ្យបាន ប្រសិនបើលោកជាប់ឆ្នោតជាប្រធានាធិបតីអ៊ុយក្រែន ក្នុងនោះលោកក៏បានសន្យាលុបបំបាត់អំពើពុករលួយ និងដំឡើងប្រាក់បៀវត្សរ៍កងទ័ពផងដែរ។
អំឡុងយុទ្ធនាការបោះឆ្នោតឆ្នាំ២០១៩ លោកបានអះអាងថា លោកមានបំណងចង់ឱ្យប្រទេសអ៊ុយក្រែនចូលរួមជាសមាជិកក្នុងអង្គការយោធា North Atlantic Treaty Organization ឬអង្គការណាតូ (NATO) ដើម្បីកសាងអ៊ុយក្រែនក្លាយទៅជាប្រទេសដែលមានអំណាច និងសេរីភាពពេញលេញ។
នៅថ្ងៃទី២១ ខែមេសា ឆ្នាំ២០១៩ លោក វូឡូឌីមៀរ ហ្សេឡែនស្គី បានជាប់ឆ្នោតជាប្រធានាធិបតីអ៊ុយក្រែន ដែលបានយកឈ្នះគូប្រជែងនយោបាយរបស់ខ្លួនឈ្មោះលោក ផេត្រូ ផូរ៉ូសិនកូ (Patro Poroshenko) ដោយទទួលបានសំឡេងឆ្នោតគាំទ្រជាង ៧០% ទូទាំងប្រទេស ហើយជ័យជម្នះរបស់លោកទទួលបានការអបអរសាទរពីមេដឹកនាំប្រទេសធំៗជាច្រើន ដូចជា បារាំង ប៉ូឡូញ និងសហរដ្ឋអាមេរិក ជាដើម។
ក្រោយជាប់ឆ្នោតជាប្រធានាធិបតី និងការប្ដេជ្ញាចូលជាសមាជិកអង្គការយោធាណាតូ និងសហភាពអឺរ៉ុបអស់រយៈពេលជិត ៣ឆ្នាំ មហាអំណាចរុស្ស៊ី មានការព្រួយបារម្ភជាខ្លាំង ខ្លាចអង្គការយោធាណាតូទទួលអ៊ុយក្រែនជាសមាជិករបស់ខ្លួន ក៏សម្រេចប្រកាសប្រតិបត្តិការយោធាពិសេសចូលទឹកដីអ៊ុយក្រែនតែម្តង បន្ទាប់ពីប្រធានាធិបតីរុស្ស៊ី លោក វ៉្លាឌីមៀរ ពូទីន ប្រកាសទទួលស្គាល់តំបន់ Donetsk និង Luhansk កាលពីថ្ងៃទី២១ ខែកុម្ភៈ ឆ្នាំ២០២២ កន្លងទៅ។
ការប៉ុនប៉ងច្រៀកយកទឹកដីអ៊ុយក្រែននេះ រុស្ស៊ីបានចិញ្ចឹមចិត្តឈ្លានពានជាមួយនឹងការនៅពីក្រោយនៃកម្លាំងប្រដាប់អាវុធប្រឆាំងនឹងរដ្ឋាភិបាលអ៊ុយក្រែនជាយូរមកហើយ។
យ៉ាងណាក៏ដោយ កងទ័ពអ៊ុយក្រែនបានតស៊ូប្រយុទ្ធនឹងកងទ័ពរុស្ស៊ីយ៉ាងស្វិតស្វាញរហូតដល់ថ្ងៃទី៨ នៃការឈ្លានពាននេះ នៅតែមិនអាចឱ្យរុស្ស៊ីចូលកាន់កាប់ទីក្រុងធំៗរបស់ខ្លួនបាន ខណៈប្រធានាធិបតីអ៊ុយក្រែន លោក វូឡូឌីមៀរ ហ្សេឡែនស្គី សច្ចាថា នឹងការពាររដ្ឋធានីគៀវ មិនឱ្យធ្លាក់ចូលទៅក្នុងការដណ្តើមរបស់រុស្ស៊ីជាដាច់ខាត។
នៅពេលនេះ លទ្ធផលបង្ហាញយ៉ាងច្បាស់ថា ស្ថានការណ៍កងទ័ពកាន់តែផុយស្រួយរវាងរុស្ស៊ី និងអ៊ុយក្រែន ព្រោះតែអ៊ុយក្រែនម្តងនេះមិនខ្លាចរុស្ស៊ីឡើយ ព្រោះតែមានអង្គការយោធាណាតូនៅពីក្រោយ ហើយការវាយប្រហារនេះបង្កឱ្យមានការថ្កោលទោសពីមេដឹកនាំជុំវិញពិភពលោកលើប្រទេសរុស្ស៊ី ខណៈប្រធានាធិបតីអ៊ុយក្រែន លោក វូឡូឌីមៀរ ហ្សេឡែនស្គី កំពុងព្យាយាមប្រមូលផ្ដុំការគាំទ្រពីសហគមន៍អន្តរជាតិកាន់តែច្រើនឡើងៗ។
ជាក់ស្តែង ប្រធានាធិបតីអាមេរិក លោក ចូ បៃដិន ក្នុងសុន្ទរកថាប្រចាំឆ្នាំ២០២២ នៅក្នុងរដ្ឋសភាអាមេរិក កាលពីថ្ងៃទី២ ខែកុម្ភៈ បានហៅប្រធានាធិបតីរុស្ស៊ី លោក វ្ល៉ាឌីមៀរ ពូទីន ថាជាជនផ្ដាច់ការ ហើយបានប្រកាសហាមឃាត់យន្តហោះរុស្ស៊ីមិនឱ្យប្រើប្រាស់ដែនអាកាសអាមេរិកថែមទៀត។
អ៊ុយក្រែន គឺជារដ្ឋប្រជាធិបតេយ្យមួយដែលបានទទួលឯករាជ្យពីមហាអំណាចកុម្មុយនីស្តរុស្ស៊ីកាលពីឆ្នាំ១៩៩១ ក្រោយការដួលរលំសហភាពសូវៀត ប៉ុន្តែគេមើលឃើញថា រុស្ស៊ីនៅតែព្យាយាមចិញ្ចឹមមហិច្ឆតាទាញយករដ្ឋឯករាជ្យមួយនេះយកទៅគ្រប់គ្រងវិញរហូតបង្កទៅជាការឈ្លានពានដូចពេលនេះ៕