សង្គមស៊ីវិលចាត់ទុកការចែកអំណោយជាគ្រឿងស្រវឹងទៅដល់មន្ត្រីយោធិនពិការ ជារឿងមិនត្រឹមត្រូវ ដែលនាំឱ្យប៉ះពាល់ដល់កិត្តិយសជាតិ បន្ទាប់ពីគណៈប្រតិភូក្រសួងការពារជាតិកម្ពុជា បានចែកអំណោយដល់មន្ត្រីយោធិនពិការចំនួន ២៩៣គ្រួសារ ដែលមានស្រាបៀចំនួន ៥០កេស និងថវិកាចំនួន ៣ម៉ឺនរៀលក្នុងមួយគ្រួសារ។
ប្រធានអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៧ មេសា ថា ការចែកគ្រឿងស្រវឹងដល់អាជ្ញាធរ និងកងកម្លាំងគ្រប់ប្រភេទ គឺជារឿងមិនត្រឹមត្រូវជាដាច់ខាត ព្រោះទង្វើនេះនាំឱ្យប៉ះពាល់ដល់កិត្តិយសជាតិទាំងមូល។
លោកបន្ថែមថា អំណោយដែលល្អសម្រាប់កងកម្លាំង មិនគួរភ្ជាប់ជាមួយគ្រឿងស្រវឹងនោះទេ ព្រោះវាជាគំរូអាក្រក់មួយសម្រាប់ពលរដ្ឋខ្មែរទូទៅផងដែរ ត្បិតអំណោយគឺវត្ថុដែលអាចធានានូវសុខភាពអ្នកប្រើប្រាស់បាន ប៉ុន្តែគ្រឿងស្រវឹងមិនត្រឹមតែបំពុលសង្គមទេ ថែមទាំងបំផ្លាញសុខភាពអ្នកប្រើប្រាស់ថែមទៀត ជាពិសេសយោធិនពិការនៅពេលនេះ អ្វីដែលពួកគាត់ត្រូវការ គឺការធានាបាននូវជីវភាពសមរម្យរបស់ពួកគាត់ពីរដ្ឋាភិបាល មិនមែនអំណោយបន្តិចបន្តួច ឬអំណោយជាស្រាបៀនោះឡើយ។
ប្រធានអង្គការអភិវឌ្ឍន៍ផ្នត់គំនិតរូបនេះបញ្ជាក់ថា ដើម្បីធានាបាននូវជីវភាពរស់នៅប្រកបដោយសេចក្តីថ្លៃថ្នូររបស់យោធិនពិការទាំងនោះ រដ្ឋាភិបាលគួរតែជំរុញការអនុវត្តគោលនយោបាយរបស់ខ្លួន ដូចជាការផ្តល់ជម្រក និងដីធ្លីឱ្យបានត្រឹមត្រូវ ជាពិសេសប្រាក់បៀវត្សរបស់ពួកគាត់ គួរតែមានកម្រិតអាចធានានូវការចិញ្ចឹមជីវភាពគ្រួសារឱ្យមានភាពសមរម្យ ឱ្យស័ក្ដិសមទៅនឹងការលះបង់របស់ពួកគាត់ក្នុងសមរភូមិកន្លងមក។
កាលពីថ្ងៃទី៥ ខែមេសា ឆ្នាំ២០២២ រដ្ឋលេខាធិការក្រសួងការពារជាតិកម្ពុជា លោក ឃឹម ប៊ុនសុង បានចុះសួរសុខទុក្ខមន្ត្រីយោធិនពិការនៅមជ្ឈមណ្ឌលយោធិនពិការ ហ៊ុន សែន គូលែន៣១៧ ក្នុងខេត្តសៀមរាប ដោយផ្តល់ជូននូវអំណោយខ្លះៗ ដូចជាត្រីខ មី ទឹកដោះគោ ប៊ីចេង និងថវិកាចំនួន ៣ម៉ឺនរៀលក្នុងមួយគ្រួសារៗ ក្នុងនោះក៏មានការផ្តល់អំណោយជាស្រាបៀចំនួន ៥០កេសផងដែរដល់ក្រុមមន្ត្រីយោធិនពិការទាំងនោះ។
លោក ឃឹម ប៊ុនសុង លើកឡើងថា មេដឹកនាំបក្សកាន់អំណាច លោក ហ៊ុន សែន តែងគិតគូរពីសុខទុក្ខ និងជីវភាពរស់នៅរបស់មន្ត្រីយោធិនពិការទាំងអស់ក្នុងមជ្ឈមណ្ឌលអភិវឌ្ឍន៍យោធិនពិការ ហ៊ុន សែន គូលែន៣១៧ ខេត្តសៀមរាប នៅពេលដែលយោធិនពិការទាំងនោះបាត់បង់សុពលភាពការងារ។
រដ្ឋលេខាធិការក្រសួងការពារជាតិកម្ពុជារូបនេះបញ្ជាក់ថា ប្រមុខរដ្ឋាភិបាលកម្ពុជា លោក ហ៊ុន សែន បានផ្ដល់នូវអ្វីៗទាំងអស់គ្រប់បែបយ៉ាងដើម្បីលើកស្ទួយជីវភាព ការរស់នៅរបស់គ្រួសារយោធិនពិការ ដើម្បីឱ្យមានភាពប្រសើរឡើងពីមួយថ្ងៃទៅមួយថ្ងៃ ក្រោយពីយោធិនពិការទាំងនេះបានលះបង់សាច់ឈាម ដើម្បីបុព្វហេតុជាតិ និងមាតុភូមិកម្ពុជាកន្លងមក។
សព្វថ្ងៃនេះ គោលនយោបាយរបស់រដ្ឋាភិបាលកម្ពុជា ត្រូវគេមើលឃើញថា មិនទាន់មានភាពច្បាស់លាស់ណាមួយដើម្បីលើកស្ទួយជីវភាពរស់នៅរបស់យោធិនពិការនៅឡើយទេ ខណៈយោធិនពិការទាំងនោះត្រូវប្រឈមនឹងការលំបាកផ្នែកជីវភាពស្ទើរតែគ្រប់គ្នាទូទាំងប្រទេស នៅពេលដែលការប្រកាសជំនួយខ្លះពីសំណាក់រដ្ឋាភិបាល ធ្វើឡើងដើម្បីតែកេងចំណេញរូបភាពនយោបាយប៉ុណ្ណោះ៕