រដ្ឋាភិបាលសម្រេចដាក់ចេញផែនការមេអភិវឌ្ឍខេត្តមណ្ឌលគិរី ជាតំបន់ប៉ូលសេដ្ឋកិច្ចទី៤ ដែលមានរយៈពេល ១៤ឆ្នាំ សម្រាប់ទាក់ទាញភ្ញៀវទេសចរ និងអ្នកវិនិយោគដើម្បីលើកកម្ពស់ផ្នែកសេដ្ឋកិច្ច និងសង្គមកិច្ច។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការជាតិអភិវឌ្ឍន៍ទេសចរណ៍ លោក អូន ព័ន្ធមុនីរ័ត្ន បានប្រកាសកាលពីថ្ងៃច័ន្ទ ទី១១ មេសា ថា ការរៀបចំ និងការដាក់ចេញផែនការមេអភិវឌ្ឍទេសចរណ៍ខេត្តមណ្ឌលគិរី ឱ្យក្លាយជាគោលដៅអេកូទេសចរណ៍ ឬទេសចរណ៍ធម្មជាតិ និងកសិកម្ម ព្រមទាំងទេសចរណ៍វប្បធម៌ជនជាតិដើមភាគតិច ដើម្បីធ្វើឱ្យខេត្តភូមិភាគឦសានជាស្នូល នឹងក្លាយជាប៉ូលសេដ្ឋកិច្ចទី៤ ក្នុងការស្រូបយករំហូរវិនិយោគ និងការអភិវឌ្ឍ។
លោកបន្តថា ការកំណត់តំបន់អាទិភាពសំខាន់ៗដែលត្រូវរក្សាទុកសម្រាប់ការអភិវឌ្ឍវិស័យទេសចរណ៍នៅក្នុងផែនការមេនេះ នឹងជំរុញឱ្យខេត្តមណ្ឌលគិរី ប្រើប្រាស់ឱ្យអស់លទ្ធភាពនូវសក្ដានុពលដ៏សម្បូរបែបរបស់ខ្លួន តាមរយៈការអភិរក្សវិស័យទេសចរណ៍បែបធម្មជាតិ និងអភិវឌ្ឍជនជាតិដើមភាគតិច និងការផ្សារភ្ជាប់ជាមួយពហុវិស័យដទៃទៀត។
ចំណែកទីតាំងចំនួន៤ ទៀត ក្នុងនោះក្រុងសែនមនោរម្យ តំបន់ស្រុកអូររាំង ភ្ជាប់ជាមួយការអភិវឌ្ឍអាកាសយានដ្ឋានខេត្តមណ្ឌលគិរី តំបន់ប្រជុំជននៃស្រុកកោះញែក និងតំបន់ទេសចរណ៍សមាហរ័ណតាមច្រកព្រំដែន។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបន្តថា ការដាក់ចេញផែនការមេអភិវឌ្ឍវិស័យទេសចរណ៍ខេត្តមណ្ឌលគិរី មានរយៈពេល ១៤ឆ្នាំ គឺចាប់ពីឆ្នាំ២០២១ រហូតដល់ឆ្នាំ២០៣៥ ដើម្បីជំរុញការអភិវឌ្ឍខេត្តមណ្ឌលគិរី ជាគោលដៅអេកូទេសចរណ៍លំដាប់អន្តរជាតិ និងជាខេត្តដ៏សំខាន់ក្នុងការផ្គត់ផ្គង់ផ្កា បន្លែ ផ្លែឈើ និងសាច់ សម្រាប់បំពេញតម្រូវការក្នុងប្រទេស និងឈានដល់ការនាំចេញទៅទីផ្សារក្រៅប្រទេស។
រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិដឹកនាំអនុវត្តផែនការមេអភិវឌ្ឍវិស័យទេសចរណ៍ខេត្តមណ្ឌលគិរី លោក ថោង ខុន ថ្លែងថា បើតាមការវិភាគរបស់ក្រុមការងារបច្ចេកទេស វិស័យទេសចរណ៍ខេត្តមណ្ឌលគិរី កំពុងស្ថិតក្នុងដំណាក់កាលកំណើននៃការអភិវឌ្ឍវិស័យទេសចរណ៍ ដែលពោរពេញទៅដោយសក្ដានុពលសម្រាប់ការអភិវឌ្ឍនាពេលអនាគត។
ចំណែកអ្នកនាំពាក្យក្រសួងទេសចរណ៍ លោក ជុក ជំនោរ ធ្លាប់ប្រាប់សារព័ត៌មានក្នុងស្រុកថា កន្លងមកចាប់ពីឆ្នាំ២០៣៥ ភ្ញៀវអន្តរជាតិមកកាន់ខេត្តមណ្ឌលគិរី នឹងកើនដល់ ៩០ម៉ឺននាក់ ខណៈភ្ញៀវក្នុងស្រុកកើនឡើងដល់ទៅជាង ២លាននាក់។ ការកំណត់យកទិសដៅអាទិភាពចំនួន៦ ក្នុងការអភិវឌ្ឍខេត្តមណ្ឌលគិរី នឹងធ្វើឱ្យខេត្តនេះទទួលបានចំណូល ៥០០លានដុល្លារពីភ្ញៀវទេសចរសម្រាប់ចាក់បញ្ចូលក្នុងចរន្តសេដ្ឋកិច្ចជាតិ ហើយព្រមទាំងអាចបង្កើតការងារឱ្យប្រជាជនបានរហូតដល់ ៨ម៉ឺនកន្លែងថែមទៀត។
ការសម្រេចរបស់រដ្ឋាភិបាលក្នុងការអភិវឌ្ឍខេត្តមណ្ឌលគិរី ស្របពេលដែលអ្នកមានប្រាក់ ឧកញ៉ា និងអ្នកមានអំណាចបាននាំគ្នាសម្រុកចាប់យកដីខេត្តមណ្ឌលគិរី រួមទាំងឈានទន្ទ្រានដីព្រៃតំបន់ដែនជម្រក និងដីព្រៃសហគមន៍ជនជាតិដើមភាគតិច ដោយមានការគប់គិតគ្នាជាមួយអាជ្ញាធរខេត្តជាដើម។
កាលពីខែកក្កដា ឆ្នាំ២០២០ រដ្ឋមន្ត្រីក្រសួងមហាផ្ទៃ លោក ស ខេង បានបង្ហើបថាមានអ្នកយកឈ្មោះលោកទៅប្រើប្រាស់ដើម្បីចាប់យកដីរដ្ឋក្នុងខេត្តមណ្ឌលគិរី ធ្វើជាកម្មសិទ្ធិ ខណៈលោកមិនមានដីនៅខេត្តភាគឦសានមួយនេះសូម្បីតែមួយតឹកផងនោះ៕