បេក្ខភាពអនាគតនាយករដ្ឋមន្ត្រី និងជាកូនប្រុសច្បងរបស់បុរសខ្លាំងកម្ពុជា លោក ហ៊ុន ម៉ាណែត អំពាវនាវឱ្យពលរដ្ឋខ្មែរបោះឆ្នោតគាំទ្រឪពុករបស់លោកធ្វើជានាយករដ្ឋមន្ត្រីបន្តទៀត ដើម្បីអាចដឹកនាំកម្ពុជាឆ្ពោះទៅរកវឌ្ឍនភាពរុងរឿងកាន់តែខ្លាំងជាងពេលបច្ចុប្បន្ន។
លោក ហ៊ុន ម៉ាណែត បានអះអាងនៅក្នុងពិធីសម្ពោធកុដិមួយកន្លែងក្នុងវត្តព្រៃតុម្ព ខេត្តកំពត កាលពីថ្ងៃទី១៨ ខែមេសា ឆ្នាំ២០២២ ថា ឪពុករបស់លោកតែងគិតគូរជាប់ជាប្រចាំអំពីសុខទុក្ខរបស់ពលរដ្ឋ ហើយតែងនៅក្បែរពលរដ្ឋខ្មែរគ្រប់ពេលវេលាទាំងអស់។
លោក ហ៊ុន ម៉ាណែត អះអាងថា ឪពុករបស់លោកបាននាំមកនូវសន្តិភាពពេញលេញជូនពលរដ្ឋ និងប្រទេសកម្ពុជាទាំងមូល ដោយការការពារមិនឱ្យមានការវិលត្រឡប់មកវិញនូវរបបប្រល័យពូជសាសន៍ ដែលជាស្នាដៃក្នុងការស្វែងរកសិទ្ធិសេរីភាពជូនពលរដ្ឋឱ្យរស់នៅក្នុងសុខសន្តិភាព និងពោរពេញដោយក្តីសង្ឃឹមទៅអនាគត។
កូនប្រុសមេដឹកនាំក្រាញអំណាចរូបនេះបញ្ជាក់ថា ក្រោមម្លប់នៃសុខសន្តិភាពជាង ៤០ឆ្នាំកន្លងមក កម្ពុជាមានស្ថិរភាពបរិបូរណ៍ដែលបាននាំមកនូវការអភិវឌ្ឍយ៉ាងច្រើននៅទូទាំងប្រទេស។ លោកបន្ថែមថា សុខសន្តិភាពនេះហើយដែលបានផ្តល់នូវឱកាសឱ្យពលរដ្ឋខ្មែរអាចធ្វើបុណ្យ សន្សំកុសលរួមគ្នាប្រកបដោយភាពសប្បាយរីករាយ និងដោយគ្មានភាពភ័យខ្លាច។
ការអះអាងនេះ ធ្វើឡើងស្របពេលដែលការបោះឆ្នោតក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ កាន់តែខិតជិតចូលមកដល់ ដែលនឹងប្រព្រឹត្តនៅដើមខែមិថុនា ខាងមុខនេះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី១៩ មេសា នេះថា ការបោះឆ្នោតនៅពេលខាងមុខនេះ គឺជាការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់នៅតាមមូលដ្ឋាន មិនមែនជាការបោះឆ្នោតដើម្បីជ្រើសរើសនាយករដ្ឋមន្ត្រីនោះទេ ដូច្នេះការអំពាវនាវនេះគឺជាការឃោសនារកសំឡេងឆ្នោតខុសកាលៈទេសៈប៉ុណ្ណោះ។
បណ្ឌិត យ៉ង សាំងកុមារ លើកឡើងថា ប្រសិនបើបក្សកាន់អំណាចចង់បានការគាំទ្របន្តទៀត មេឃុំ-ចៅសង្កាត់របស់បក្សកាន់អំណាចបច្ចុប្បន្នដែលកំពុងដឹកនាំនៅមូលដ្ឋានសព្វថ្ងៃនេះ គួរតែខំធ្វើការបម្រើពលរដ្ឋឱ្យបានល្អ នោះពលរដ្ឋនឹងបោះឆ្នោតគាំទ្រជាមិនខាន ប៉ុន្តែមិនត្រូវធ្វើល្អដើម្បីកេងចំណេញយកសន្លឹកឆ្នោតពីពលរដ្ឋមុនការបោះឆ្នោតនោះទេ។
ប្រធានគណៈកម្មាធិការនាយករូបនេះបញ្ជាក់ថា ក្នុងនាមលោក ហ៊ុន ម៉ាណែត ជាមេដឹកនាំនៃកងទ័ពជាតិ គួរតែរក្សាជំហរអព្យាក្រឹតដើម្បីរក្សាសន្តិសុខជូនជាតិមាតុភូមិ ដោយមិនបង្ហាញពីភាពលម្អៀងទៅរកនិន្នាការនយោបាយខាងណាមួយឡើយ ព្រោះថាការបង្ហាញជំហរបែបនេះ គឺជាសញ្ញាមួយនៃការគំរាមកំហែងដល់ពលរដ្ឋម្ចាស់ឆ្នោត។
កាលពីថ្ងៃទី១ ខែមីនា ឆ្នាំ២០២១ ប្រមុខរដ្ឋាភិបាលកម្ពុជាបានចេញសេចក្តីសម្រេចស្ដីពីការកំណត់កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដោយកំណត់យកថ្ងៃទី៥ ខែមិថុនា ឆ្នាំ២០២២ ជាកំណត់ ប៉ុន្តែការបោះឆ្នោតនេះត្រូវគេរិះគន់ថាគ្រាន់តែជាដំណើរការបង្គ្រប់កិច្ចឱ្យបក្សកាន់អំណាចប៉ុណ្ណោះ។
របាយការណ៍ក្រសួងមហាផ្ទៃ បង្ហាញថា យ៉ាងហោចណាស់មានគណបក្សនយោបាយចំនួន ៤៥គណបក្សដែលបានចុះបញ្ជីនៅក្រសួងមហាផ្ទៃ ដើម្បីចូលរួមការបោះឆ្នោតឃុំ-សង្កាត់ឆ្នាំ២០២២ និងការបោះឆ្នោតជាតិឆ្នាំ២០២៣ ខាងមុខ។
ក្រុមអ្នកសង្កេតការណ៍ខ្លះនិយាយថា គណបក្សក្រៅរដ្ឋាភិបាលទាំងអស់មិនគួរចូលរួមការបោះឆ្នោតដែលកម្ពុជាកំពុងមានវិបត្តិនយោបាយធ្ងន់ធ្ងរនោះឡើយ ត្បិតគណបក្សកាន់អំណាចបានរំលោភច្បាប់រំលាយគណបក្សសង្គ្រោះជាតិយ៉ាងអយុត្តិធម៌។ ដូច្នេះ ពួកគេគួរតែជំរុញឱ្យបក្សកាន់អំណាចរកដំណោះស្រាយសមស្របជាមុនសិន ព្រោះការធ្វើដូច្នេះ ក៏ជាការព្រមានកុំឱ្យបក្សកាន់អំណាចរំលោភច្បាប់ ហើយអាចធ្វើការរំលាយគណបក្សផ្សេងទៅថ្ងៃក្រោយបន្តទៀត៕