អគ្គស្នងការនគរបាលជាតិ ចូលរួមរំលែកទុក្ខគ្រួសារសពមន្ត្រីនគរបាល ២រូបនៅខេត្តកណ្តាល ដែលបានពលីជីវិតនៅក្នុងប្រតិបត្តិការបង្ក្រាបមុខសញ្ញាជួញដូរគ្រឿងញៀន ដោយចាត់ទុកជាការបាត់បង់នូវមន្ត្រីនគរបាលដ៏អង់អាចក្លាហានដែលបានលះបង់កម្លាំងកាយចិត្ត និងសេចក្តីសុខផ្ទាល់ខ្លួន ដើម្បីបុព្វហេតុសន្តិសុខ សណ្ដាប់ធ្នាប់សាធារណៈ និងសុវត្ថិភាពរបស់សង្គមជាតិ។
អគ្គស្នងការនគរបាលជាតិ លោក នេត សាវឿន បានចេញសារលិខិតរំលែកទុក្ខកាលពីថ្ងៃទី២១ ខែមេសា ឆ្នាំ២០២២ នេះថា មន្ត្រីនគរបាលជាតិមានក្តីរន្ធត់យ៉ាងខ្លាំងនៅពេលទទួលដំណឹងថា វរសេនីយ៍ឯក លោក ជុច សុភា ដែលមានអាយុ ៥០ឆ្នាំជានាយនគរបាលប៉ុស្តិ៍ឃុំទួលព្រិច និងលោក រឹម ផាន់ណា មន្ត្រីនគរបាលនៃអធិការដ្ឋាននគរបាលស្រុកអង្គស្នួល ក៏បានបាត់បង់ជីវិតក្នុងហេតុការណ៍បង្ក្រាបបទល្មើសគ្រឿងញៀនកាលពីថ្ងៃទី២១ មេសា កន្លងទៅនេះ។
អគ្គស្នងការនគរបាលជាតិរូបនេះបញ្ជាក់ថា មរណភាពរបស់មន្ត្រីនគរបាលទាំងពីររូបនេះ គឺជាការបាត់បង់នូវមន្ត្រីនគរបាលដ៏អង់អាចក្លាហានដែលបានលះបង់កម្លាំងកាយចិត្ត និងសេចក្តីសុខផ្ទាល់ខ្លួនរហូតដល់ការលះបង់អាយុជីវិតប្រកបដោយកិត្តិយស ដើម្បីបុព្វហេតុសន្តិសុខ សណ្ដាប់ធ្នាប់សាធារណៈ និងសុវត្ថិភាពរបស់សង្គមជាតិ។
ការអះអាងនេះ ធ្វើឡើងបន្ទាប់ពីមន្ត្រីនគរបាលស្រុកអង្គស្នួល ពីររូបបានពលីជីវិតក្នុងបេសកកម្មបង្ក្រាបការជួញដូរគ្រឿងញៀន កាលពីថ្ងៃព្រហស្បតិ៍ ទី២១ ខែមេសា។
កាលពីថ្ងៃទី២១ ខែមេសា ឆ្នាំ២០២២ ក្នុងប្រតិបត្តិការបង្ក្រាបគ្រឿងញៀនមួយនៅខេត្តកណ្តាល បានផ្ទុះអាវុធរវាងក្រុមឧក្រិដ្ឋជនដែលជាមុខសញ្ញាជួញដូរគ្រឿងញៀន ជាមួយនឹងសមត្ថកិច្ចស្រុកអង្គស្នួល។ ក្នុងហេតុការណ៍នោះ បានបណ្តាលឱ្យមន្ត្រីនគរបាល ២នាក់ត្រូវគ្រាប់កាំភ្លើងរបស់ជនល្មើសចំនួន ៥គ្រាប់ បណ្តាលឱ្យស្លាប់បាត់បង់ជីវិតភ្លាមៗ។
យ៉ាងណាក៏ដោយ ក្នុងការបាញ់ប្រហារនោះ ជនល្មើសម្នាក់ក៏សមត្ថកិច្ចបាញ់ចំបណ្តាលឱ្យស្លាប់ផងដែរ និងម្នាក់ទៀតត្រូវបានចាប់ខ្លួន ហើយក្នុងនោះ សមត្ថកិច្ចក៏បានដកហូតកាំភ្លើងខ្លីម៉ាករ៉ូឡូ ១ដើមផងដែរ ខណៈបក្ខពួកជនល្មើស ៥នាក់ទៀតបានរត់គេចខ្លួន។
ទាក់ទិននឹងបញ្ហានេះ កាលពីថ្ងៃទី២៣ ខែកុម្ភៈ ឆ្នាំ២០២២ ក្នុងពិធីសន្និបាតបូកសរុបលទ្ធផលការងារ រដ្ឋមន្ត្រីក្រសួងមហាផ្ទៃ លោក ស ខេង លើកឡើងថា បញ្ហាគ្រឿងញៀន និងអំពើមនុស្សឃាតនៅតែកើតមានច្រើននៅកម្ពុជា ខណៈករណីទាំងនេះជាបញ្ហាប្រឈម និងបង្កជាក្ដីបារម្ភដ៏ចម្បងនៅក្នុងសង្គមខ្មែរ។
បែបនេះក្តី កាលពីថ្ងៃទី២៣ ខែកុម្ភៈ ឆ្នាំ២០១៩ អាជ្ញាធរក្រុងភ្នំពេញធ្លាប់បានចាប់ខ្លួនលោកឧកញ៉ា គិត ធាង ម្ចាស់ក្លឹបកម្សាន្ត Rock ដែលបានចោទប្រកាន់ពីបទពាក់ព័ន្ធនឹងការចែកចាយគ្រឿងញៀនជិត ៥០គីឡូក្រាម។ ជុំវិញបញ្ហានេះ ឧកញ៉ា គិត ធាង ត្រូវបានតុលាការសម្រេចដាក់ពន្ធនាគារ PJ បណ្ដោះអាសន្នកាលពីថ្ងៃទី១២ ខែមីនា ឆ្នាំ២០១៩ កន្លងទៅ ស្របតាមមាត្រា៤៤ ច្បាប់ស្ដីពីការត្រួតពិនិត្យគ្រឿងញៀន។
យ៉ាងណាក៏ដោយ ឧកញ៉ា គិត ធាង នៅតែអាចដើរហើរសេរីក្រៅច្បាប់រហូតដល់សព្វថ្ងៃនេះ ដោយតុលាការក្រុងភ្នំពេញបានសម្រេចបន្ធូរបន្ថយទោសដល់ឧកញ៉ារូបនេះ ដែលត្រូវប្រកាសផ្ដន្ទាទោសឲ្យជាប់ពន្ធនាគារត្រឹមតែរយៈពេល ៤ឆ្នាំប៉ុណ្ណោះ ក្នុងនោះត្រូវអនុវត្តទោសឲ្យជាប់ពន្ធនាគារមួយរយៈពេលខ្លី និងសម្រេចឲ្យព្យួរទោសរយៈពេល ២ឆ្នាំផងដែរ។
ច្បាប់ស្ដីពីការត្រួតពិនិត្យគ្រឿងញៀនមាត្រា៤៤ ចែងថា ការបង្កលក្ខណៈងាយស្រួលដល់ការប្រើប្រាស់ដោយខុសច្បាប់នូវសារធាតុញៀន គឺជាបទសម្រួលឲ្យប្រើប្រាស់ដោយខុសច្បាប់នូវសារធាតុញៀន នឹងត្រូវផ្ដន្ទាទោសពី ៥ឆ្នាំទៅ ១០ឆ្នាំ និងពិន័យជាប្រាក់ពី ១០លានរៀលទៅ ២០លានរៀល។
បើតាមអាជ្ញាធរកម្ពុជាឱ្យដឹងថា ចាប់ពីចុងឆ្នាំ២០២១ ដល់ខែមីនា ឆ្នាំ២០២២ សមត្ថកិច្ចបានចាប់គ្រឿងញៀនជាង ៣តោន និងសារធាតុគីមីដែលអាចយកមកផ្សំជាគ្រឿងញៀនប្រមាណជាង ៣០០តោនផ្សេងទៀត។
យោងតាមរបាយការណ៍របស់អង្គការសហប្រជាជាតិ ដើម្បីប្រយុទ្ធប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១ បង្ហាញថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរគ្រឿងញៀន ផលិត និងចែកចាយបន្ត៕