បញ្ញវន្តខ្មែររស់នៅក្រៅស្រុក ចោទថា កំហុសដ៏ធំរបស់មេដឹកនាំបក្សកាន់អំណាច លោក ហ៊ុន សែន គឺលក់ជាតិខ្មែរដើម្បីអំណាចដែលធ្វើឲ្យកម្ពុជាក្លាយទៅជាប្រទេសក្រីក្រ និងរងនូវការបំផ្លិចបំផ្លាញទ្រព្យសម្បត្តិជាតិគ្រប់ទីកន្លែង ក្រោមការជួយសម្របសម្រួលរបស់លោក សម រង្ស៊ី។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនីហ្វេសប៊ុករបស់លោកនៅថ្ងៃទី២៦ មេសា នេះថា លោក ហ៊ុន សែន បានធ្លាក់ចូលក្នុងកំហុសបំផ្លាញជាតិដ៏ធំដែលមិនអាចស្រោចស្រង់បាន។
ប៉ុន្តែអតីតមេដឹកនាំប្រឆាំង លោក សម រង្ស៊ី បានចូលរួមក្នុងកំហុសទាំងនោះថែមទៀតនៅពេលដែលគាត់ជួយលើកអំណាចឲ្យលោក ហ៊ុន សែន ដឹកនាំប្រទេសតាមទំនើងចិត្តតាមរយៈនៃការកែប្រែរដ្ឋធម្មនុញ្ញពី ២ភាគ៣ ទៅជា ៥០ភាគរយបូក១ កាលពីឆ្នាំ២០០៦ កន្លងទៅ។
លោក គឹម សុខ អះអាងថា សព្វថ្ងៃនេះ លោក សម រង្ស៊ី កំពុងតែសម្រួលស្រោចស្រង់នយោបាយធ្លាក់ទឹករបស់លោក ហ៊ុន សែន បន្តទៀតតាមរយៈនៃការបើកផ្លូវឱ្យគណបក្សភ្លើងទៀន ដែលជាគណបក្សចាស់របស់គាត់ ដើម្បីចូលរួមការបោះឆ្នោតមួយដែលស្ថិតក្រោមការចាត់ចែងទាំងស្រុងរបស់គណបក្សកាន់អំណាច។
អ្នកវិភាគនយោបាយ និងសង្គមរូបនេះបញ្ជាក់ថា ការដឹកនាំនយោបាយរបស់អតីតមេដឹកនាំប្រឆាំងលោក សម រង្ស៊ី បានបង្កនូវកំហុសម្ដងហើយម្ដងទៀតដែលនាំទៅរកការបំផ្លាញជាតិយ៉ាងធ្ងន់ធ្ងរ តាមរយៈការជួយសម្រួលឱ្យបក្សកាន់អំណាចរបស់លោក ហ៊ុន សែន គេចផុតជាច្រើនលើកច្រើនសាពីការជាប់គាំងនយោបាយ និងការដាក់ទណ្ឌកម្មរបស់សហគមន៍អន្តរជាតិរហូតមក។
លោក គឹម សុខ បញ្ជាក់ថា រហូតមកទល់នឹងពេលនេះ ប្រធានគណបក្សសង្គ្រោះជាតិ លោក កឹម សុខា នៅមិនទាន់ឃើញមានកំហុសធំៗក្នុងការសម្រេចចិត្តលើបញ្ហាជាតិ និងនយោបាយជាតិនោះទេ ប៉ុន្តែប្រសិនបើគាត់នៅតែបន្តនយោបាយទន់ភ្លន់ដូចសព្វថ្ងៃនេះជ្រុលពេក នោះគាត់អាចនឹងបាត់ឱកាសចូលរួមការបោះឆ្នោតជាតិនៅឆ្នាំ២០២៣ ជាមិនខាន។
ការអះអាងនេះ ធ្វើឡើងស្របពេលមានការលើកឡើងពីមន្ត្រីជាន់ខ្ពស់ និងសកម្មជនបក្សប្រឆាំងថា លោក សម រង្ស៊ី គឺជាអ្នកបញ្ជាពីក្រោយនៃសកម្មភាពនយោបាយរបស់គណបក្សភ្លើងទៀន ដែលកំពុងត្រៀមខ្លួនចូលរួមការបោះឆ្នោតនាពេលខាងមុខនេះ។
អនុប្រធានគណបក្សភ្លើងទៀន លោក សុន ឆ័យ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៥ មេសា នេះថា ដោយសារតែលោក សម រង្ស៊ី ជាស្ថាបនិកគណបក្សភ្លើងទៀន មានដើមកំណើតពីគណបក្សជាតិខ្មែរ និងកែឈ្មោះទៅជាគណបក្ស សម រង្ស៊ី ដូច្នេះគាត់តែងផ្តល់ការណែនាំដល់សមាជិកបក្សនេះនូវភាពក្លាហានដើម្បីជាតិមាតុភូមិរហូតមក ប៉ុន្តែលោក សុន ឆ័យ មិនបានបញ្ជាក់ថា លោក សម រង្ស៊ី ជាអ្នកបញ្ជាបក្សនេះពីក្រោយខ្នង ឬក៏អត់នោះទេ។
លោក សុន ឆ័យ អះអាងថា ការចូលរួមបោះឆ្នោតរបស់គណបក្សភ្លើងទៀននៅពេលនេះ គឺដោយសារតែស្ថាប័នជាតិដែលកំពុងដឹកនាំក្រោមរដ្ឋាភិបាលឯកបក្សរបស់លោក ហ៊ុន សែន សព្វថ្ងៃនេះ មិនអាចធ្វើជាទីពឹងសម្រាប់ពលរដ្ឋខ្មែរដែលរងនូវភាពអយុត្តិធម៌បានឡើយ ដូច្នេះទើបគណបក្សភ្លើងទៀនសម្រេចចិត្តចូលរួមការបោះឆ្នោតដើម្បីផ្តល់អ្នកតំណាងឆន្ទៈរបស់ពលរដ្ឋនៅពេលនេះ។
យ៉ាងណាក៏ដោយ ក្រុមអ្នកឃ្លាំមើលសង្គម លើកឡើងថា ក្នុងចំណោមមេដឹកនាំបក្សប្រឆាំង លោក សម រង្ស៊ី គឺជាអ្នកនយោបាយប្រឆាំងនឹងលោក ហ៊ុន សែន ដ៏ក្តៅគគុក ហើយក៏ជាអ្នកនយោបាយដ៏ត្រជាក់ល្ហឹម និងស្អិតល្មួតចាក់ទឹកមិនលិចជាមួយលោក ហ៊ុន សែន ផងដែរ។
ទាក់ទិននឹងបញ្ហានេះ ការដឹកនាំនយោបាយរបស់លោក សម រង្ស៊ី ត្រូវគេមើលឃើញថា គាត់បានជួយសម្រួលឱ្យលោក ហ៊ុន សែន ក្តោបក្តាប់អំណាចពេញដៃតាមទំនើងចិត្តរហូតដល់សព្វថ្ងៃនេះ ដូចជាការចូលរួមជួយកែប្រែរដ្ឋធម្មនុញ្ញពី ២ភាគ៣ មក ៥០ភាគរយបូក១ ដែលធ្វើឱ្យបក្សកាន់អំណាចជិះសេះលែងដៃដល់បច្ចុប្បន្ននេះ និងការជួយបង្គ្រប់កូរ៉ុមសភាឱ្យបក្សកាន់អំណាចឱ្យទៅជាសភាស្របច្បាប់ ក្រោយការបោះឆ្នោតឆ្នាំ២០១៣ ដែលគណបក្សសង្គ្រោះជាតិមានសមាជិកតំណាងរាស្ត្រ ៥៥រូបនៅពេលនោះជាដើម៕