ក្រសួងបរិស្ថាន អំពាវនាវឱ្យអាជ្ញាធរមូលដ្ឋានពាក់ព័ន្ធ និងប្រជាសហគមន៍ រួមគ្នាថែរក្សាព្រៃលិចទឹកក្នុងតំបន់៣ នៃតំបន់បឹងទន្លេសាប បន្ទាប់ពីធ្លាក់ចុះពីជាង ៦០ម៉ឺនហិកតារមកនៅត្រឹមតែជាង ៦ម៉ឺនហិកតារ ក្រោយពីរដ្ឋាភិបាលប្រមូលដាក់ជាទ្រព្យសម្បត្តិរបស់រដ្ឋវិញ។
រដ្ឋលេខាធិការក្រសួងបរិស្ថាន លោក សូខន ឬទ្ធិគុណ បានលើកឡើងក្នុងយុទ្ធនាការដាំគ្រាប់ត្នោតស្ដារឡើងវិញនូវព្រៃលិចទឹកក្នុងតំបន់៣ ជុំវិញបឹងទន្លេសាប ស្ថិតក្នុងស្រុកក្រគរ ខេត្តពោធិ៍សាត់ កាលពីថ្ងៃទី២៦ ខែមេសា ឆ្នាំ២០២២ នេះថា ការដាំដើមឈើស្ដារឡើងវិញក្នុងតំបន់ព្រៃលិចទឹកនៃតំបន់បឹងទន្លេសាបនេះ គឺជាការបំផុសគំនិតប្រជាពលរដ្ឋគ្រប់រូបឲ្យបញ្ឈប់នូវការកាប់ទន្ទ្រានដីព្រៃលិចទឹកដោយខុសច្បាស់បន្តទៀត។
លោក សូខន ឬទ្ធិគុណ អះអាងថា ការដាំដើមឈើបែបនេះគឺជាការចូលរួមថែរក្សាព្រៃឈើឱ្យបានគង់វង្សដែលជាប្រយោជន៍ដល់ក្មេងៗជំនាន់ក្រោយ និងជាការទប់ស្កាត់ការបម្រែបម្រួលអាកាសធាតុ ព្រមទាំងរក្សាបាននូវសម្បត្តិធនធានធម្មជាតិ ពិសេសផ្តល់ជាជម្រកដល់ជីវចម្រុះគ្រប់ប្រភេទក្នុងបឹងទន្លេសាបថែមទៀត។
ការអះអាងនេះ ធ្វើឡើងក្នុងយុទ្ធនាការដាំគ្រាប់ត្នោតក្នុងតំបន់ព្រៃលិចទឹកបឹងទន្លេសាប ដែលប្រមុខរដ្ឋាភិបាលកម្ពុជាបានចេញបទបញ្ជាឱ្យដកហូតដីព្រៃលិចទឹកពីប្រជាពលរដ្ឋ ដាក់ជាសម្បត្តិរដ្ឋវិញកាលពីពេលកន្លងទៅនោះ។
កាលពីថ្ងៃទី២៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានដាក់បទបញ្ជាឲ្យអភិបាលខេត្តជាប់បឹងទន្លេសាបទាំងអស់ ត្រូវចាត់វិធានការទប់ស្កាត់ និងបង្ក្រាបរាល់សកម្មភាពកាប់រានដីព្រៃលិចទឹកយកជាកម្មសិទ្ធិ និងប្រមូលដីព្រៃលិចទឹកទាំងនោះមកដាក់ជាទ្រព្យសម្បត្តិរបស់រដ្ឋវិញទាំងអស់។
ជុំវិញបញ្ហានេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា កាលពីថ្ងៃទី២៨ ខែវិច្ឆិកា ឆ្នាំ២០២១ កន្លងទៅ បានចេញសេចក្តីសម្រេចបង្កើតក្រុមការងារចុះពិនិត្យ និងស្រាវជ្រាវការទន្ទ្រានដីព្រៃលិចទឹកនៅតំបន់ទន្លេសាបក្នុងខេត្តទាំង៦ ផងដែរ។
កាលពីថ្ងៃទី២៩ ខែវិច្ឆិកា ឆ្នាំ២០១១ ប្រមុខរដ្ឋាភិបាលកម្ពុជា លោក ហ៊ុន សែន បានចេញអនុក្រឹត្យមួយស្ដីពីការកំណត់ដែនដីព្រៃលិចទឹកចំនួនជាង ៦៤ម៉ឺនហិកតារ (៦៤៧៤០៦ហិកតារ) ស្ថិតនៅក្នុងខេត្តទាំង៦ គឺខេត្តកំពង់ឆ្នាំង ពោធិ៍សាត់ បាត់ដំបង កំពង់ធំ សៀមរាប និងខេត្តបន្ទាយមានជ័យ ដែលជាខេត្តស្ថិតនៅជុំវិញបឹងទន្លេសាបទាំងអស់។
ចំណែកអាជ្ញាធរទន្លេសាប បានបង្ហាញលើគេហទំព័ររបស់ខ្លួនក្នុងពេលបច្ចុប្បន្ននេះដែរថា ផ្ទៃក្រឡាដីព្រៃលិចទឹកនៅតំបន់ជុំវិញបឹងទន្លេសាបក្នុងខេត្តទាំង៦ កាលពីឆ្នាំ២០០២ មានចំនួនជាង ៧៩ម៉ឺនហិកតារ (៧៩១០០០ហិកតារ) តែមកដល់ឆ្នាំ២០០៥ ព្រៃលិចទឹកនៅសល់ត្រឹមតែជាង ៦៨ម៉ឺនហិកតារ (៦៨៨១៧០ហិកតារ) ប៉ុណ្ណោះ។
ជុំវិញការប្រមូលដីព្រៃលិចទឹកក្នុងតំបន់បឹងទន្លេសាបនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានចេញសេចក្តីប្រកាសព័ត៌មានកាលពីថ្ងៃទី១០ ខែមីនា ឆ្នាំ២០២២ នេះថា ខ្លួនបានប្រមូលដីព្រៃលិចទឹកជុំវិញបឹងទន្លេសាបក្នុងខេត្តទាំង៦ បានចំនួនជាង ៨ម៉ឺនហិកតារ (៨៧៤២៤,៥អា) ដែលកំពុងដាំគ្រាប់ត្នោតជុំវិញដីដែលប្រមូលបានទាំងនោះ ប៉ុន្តែលោក ជា សុផារ៉ា មិនបានបញ្ជាក់ថា ដីតំបន់ព្រៃលិចទឹកដែលត្រូវរដ្ឋគ្រប់គ្រងឡើងវិញមានចំនួនប៉ុន្មានហិកតារនោះឡើយ។
ក្រុមអ្នកឃ្លាំមើលសង្គម លើកឡើងថា ការប្រមូលដីព្រៃលិចទឹកជុំវិញបឹងទន្លេសាបនេះត្រូវគេមើលឃើញថា កំពុងបង្កើតឲ្យមានអំពើពុករលួយជាច្រើន ត្បិតដីព្រៃលិចទឹកមិនមែនមានតែជាង ៦ម៉ឺនហិកតារដូចក្នុងសេចក្តីប្រកាសព័ត៌មានរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ នោះទេ ក្នុងនោះត្រូវគេសង្ស័យថា មន្ត្រីជាន់ខ្ពស់របស់រដ្ឋាភិបាលមួយចំនួនបានឃុបឃិតគ្នាយកដីនោះទុកកាន់កាប់ផ្ទាល់ខ្លួនម្នាក់រាប់សិបម៉ឺនហិកតារឯណោះ៕