សកម្មជនគណបក្សសង្គ្រោះជាតិ ចំនួន ៤នាក់ដែលកំពុងជាប់ពន្ធនាគាររយៈពេលជិត ២ឆ្នាំ បានប្រើប្រាស់ឱកាសចុងក្រោយសំណូមពរទៅចៅក្រមឱ្យផ្ដល់យុត្តិធម៌ដល់ខ្លួន ព្រោះពួកគេជាជនរងគ្រោះដោយសារសង្គ្រាមនយោបាយរវាងលោក សម រង្ស៊ី និងលោក ហ៊ុន សែន តែប៉ុណ្ណោះ។
ការសំណូមពររបស់សកម្មជនគណបក្សសង្គ្រោះជាតិ អំឡុងពេលចៅក្រមបានឱ្យមេធាវីជនជាប់ចោទ និងតំណាងអយ្យការ រួមទាំងជនជាប់ចោទធ្វើសេចក្ដីសន្និដ្ឋាន និងសំណូមពរចុងក្រោយ បន្ទាប់ពីសវនាការសួរដេញដោលចំនួន ២២ដងលើសំណុំរឿង «ញុះញង់ និងរួមគំនិតក្បត់»។
សកម្មជនបក្សសង្គ្រោះជាតិ លោក ទុំ ប៊ុនថត បានអះអាងក្នុងបន្ទប់សវនាការថា កន្លងមកពួកគេបានលះបង់ដើម្បីការពារប្រទេសជាតិ មិនមែនរួមគ្នាក្បត់ជាតិឡើយ។ លោកបន្តថា ពួកគាត់បានជាប់ពន្ធនាគាររយៈពេលប្រមាណ ២ឆ្នាំមកហើយ ហើយបានព្រាត់ប្រាសគ្រួសារដោយសារសង្គ្រាមនយោបាយរវាងលោក សម រង្ស៊ី និងលោក ហ៊ុន សែន។
លោកបន្តថា រូបគាត់និងអ្នកផ្សេងទៀត នឹងមិនត្រូវបានដោះលែងឡើយ បើសិនជាលោក សម រង្ស៊ី និងលោក ហ៊ុន សែន នៅតែមិនត្រូវគ្នា ខណៈចៅក្រមដែលកាត់ក្ដីរឿងនេះមានកាំភ្លើងចាំភ្ជង់នៅពីក្រោយខ្នងជាប់នោះ។ ករណីនេះ លោកស្នើទៅចៅក្រមផ្ដល់យុត្តិធម៌ដោយទម្លាក់ចោលបទចោទប្រកាន់ និងដោះលែងឱ្យពួកគេមានសេរីភាព ដើម្បីឱ្យពួកគេបានជួបជុំគ្រួសារឡើងវិញ។
ចំណែកសកម្មជនបក្សប្រឆាំងដែលកំពុងជាប់ពន្ធនាគារដែរ លោក ហេង ច័ន្ទសុធី បានអះអាងថា លោកមិនដែលមានបំណងក្បត់ពលរដ្ឋ និងប្រទេសជាតិឡើយ។ លោកសំណូមពរឲ្យមានការកាត់ទោសលោកឱ្យទៅតាមអ្វីដែលលោកធ្វើសច្ចាប្រណិធានឡើងកាន់តំណែង។
ដោយឡែកលោក កាក់ គុម្ភារ សកម្មជនបក្សសង្គ្រោះជាតិបានស្នើតុលាការឱ្យវែកមុខអ្នកចោទប្រកាន់លើរូបលោកដោយគ្មានភស្តុតាង មកដាក់ទោសតាមច្បាប់ ដោយសារពួកគេបានចាប់លោកដាក់ពន្ធនាគាររយៈពេល ២ឆ្នាំទាំងអយុត្តិធម៌។
ចំណែកកញ្ញា សេង ធារី ដែលជាប់ចោទក្នុងសំណុំរឿង «ញុះញង់ និងរួមគំនិតក្បត់» នេះដែរ បានសម្រេចចិត្តមិនចូលក្នុងបន្ទប់សវនាការដើម្បីធ្វើសំណូមពរឡើយ ប៉ុន្តែកញ្ញាបានឱ្យមេធាវីរបស់កញ្ញា គឺលោក ជូង ជូងី ចូលធ្វើសេចក្ដីសន្និដ្ឋាន។ កញ្ញា សេង ធារី ប្រាប់ក្រុមអ្នកសារព័ត៌មានថា កញ្ញាបានត្រៀមខ្លួនរួចហើយក្នុងការជាប់ពន្ធនាគារ ទោះបីជាកញ្ញាមិនបានប្រព្រឹត្តបទល្មើសដូចតុលាការចោទប្រកាន់ក៏ដោយ។ កញ្ញាក៏មិនបានចាកចេញពីប្រទេសកម្ពុជាដែរ ទោះបីរងការគំរាមកំហែង។
កញ្ញាបញ្ជាក់ថា បើសិនជាកញ្ញាចេញទៅក្រៅប្រទេសដូចជាធ្វើតាមបំណងរបស់លោក ហ៊ុន សែន ដូច្នេះដែរ ដោយសាររបបដឹកនាំបច្ចុប្បន្នចង់ឱ្យអ្នកប្រជាធិបតេយ្យចាកចេញពីកម្ពុជា។
ទោះជាយ៉ាងណាក៏ដោយ តំណាងអយ្យការអមសាលាដំបូងរាជធានីភ្នំពេញ លោក សេង ហៀង បានស្នើទៅប្រធានក្រុមប្រឹក្សាជំនុំជម្រះឱ្យរក្សាបទចោទប្រកាន់លើថ្នាក់ដឹកនាំ និងសកម្មជនបក្សប្រឆាំងទាំង ៦១រូបដដែល ដោយចាត់ទុកការចែករំលែកសារលោក សម រង្ស៊ី ធ្វើឡើងក្នុងគោលបំណងកៀងគរកម្លាំងឱ្យចូលរួមផ្ដួលរំលំរដ្ឋាភិបាល តាមរយៈការបំផុសឱ្យប្រជាពលរដ្ឋ និងកងកម្លាំងប្រដាប់អាវុធប្រឆាំងរដ្ឋាភិបាល។
សំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងរួមគំនិតក្បត់» ត្រូវបានប្រធានក្រុមប្រឹក្សាជំនុំជម្រះលោក រស់ ពិសិដ្ឋ លើកពេលប្រកាសសាលក្រមទៅថ្ងៃទី១៤ ខែមិថុនា ឆ្នាំ២០២២ ខាងមុខនេះ។ សំណុំរឿងនេះមានជនជាប់ចោទចំនួន ៦១រូប ប៉ុន្តែក្នុងចំណោមមនុស្សជាង ៦០នាក់នោះ គឺមានតែ ៤នាក់ប៉ុណ្ណោះកំពុងជាប់ពន្ធនាគារ៕