អង្គការអ្នកសារព័ត៌មានគ្មានព្រំដែន ដាក់ចំណាត់ថ្នាក់សេរីភាពសារព័ត៌មាននៅកម្ពុជាឆ្នាំ២០២២ នៅជាចំណាត់ថ្នាក់មិនល្អដដែល។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ល្អជាងឆ្នាំមុនពីរលេខ ដោយស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល។
អង្គការអ្នកសារព័ត៌មានគ្មានព្រំដែន បានចេញផ្សាយរបាយការណ៍របស់ខ្លួនស្ដីពីសន្ទស្សន៍សេរីភាពសារព័ត៌មានពិភពលោកសម្រាប់ឆ្នាំ២០២២ នេះថា សេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល បើទោះបីជាចំណាត់ថ្នាក់នៅឆ្នាំ២០២២ នេះ បង្ហាញពីភាពល្អប្រសើរជាងឆ្នាំមុនពីរកម្រិតក្តី។
ប្រភពដដែលលាតត្រដាងថា វិស័យប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជា ចាប់តាំងពីអំឡុងឆ្នាំ២០១៧ និងឆ្នាំ២០១៨ មក ក្នុងនោះស្ថាប័នកាសែតខ្លះត្រូវបិទទ្វារ ខ្លះទៀតត្រូវប្តូរម្ចាស់ ខណៈកាសែតបរទេសត្រូវបិទការិយាល័យរបស់ខ្លួនទាំងស្រុង។ ទន្ទឹមគ្នានោះ ក៏មានស្ថានីយវិទ្យុឯករាជ្យក្នុងស្រុកជាង ៣០ស្ថានីយផងដែរដែលត្រូវបានបង្ខំឱ្យបិទទ្វារទាំងដែលគ្មានកំហុស។
អង្គការអ្នកសារព័ត៌មានគ្មានព្រំដែនបញ្ជាក់ថា ច្បាប់សារព័ត៌មានឆ្នាំ១៩៩៥ គឺអនុញ្ញាតលើករណីបរិហារកេរ្តិ៍ត្រឹមតែដោះស្រាយដោយមិត្តភាពប៉ុណ្ណោះ គឺគ្មានការចោទប្រកាន់នោះឡើយ ប៉ុន្តែនៅក្នុងការអនុវត្តជាក់ស្តែង រដ្ឋាភិបាលកម្ពុជាតែងតែប្រើក្រមព្រហ្មទណ្ឌដើម្បីកាត់ទោស និងចាប់ខ្លួនអ្នកកាសែតដែលកំពុងតាមដានលើបញ្ហារសើបរបស់ខ្លួនជាបន្តបន្ទាប់។ ក្នុងនោះ ច្បាប់ដែលរដ្ឋាភិបាលកម្ពុជានិយមប្រើដើម្បីចោទប្រកាន់អ្នកសារព័ត៌មាន គឺក្រមព្រហ្មទណ្ឌត្រង់មាត្រា៤៩៤ និង ៤៩៥ ដែលទាក់ទងនឹងបទញុះញង់ឲ្យប្រព្រឹត្តបទឧក្រិដ្ឋ ជាដើម ដែលធ្វើឱ្យសេរីភាពសារព័ត៌មានរបស់កម្ពុជាកាន់តែអាក្រក់ទៅៗ។
ការដាក់ចំណាត់ថ្នាក់សេរីភាពសារព័ត៌មាននេះ ធ្វើឡើងស្របពេលដែលសិទ្ធិសេរីភាពបញ្ចេញមតិនៅកម្ពុជាកំពុងរងនូវការរឹតត្បិតយ៉ាងខ្លាំង ខណៈសកម្មជនសង្គម អ្នកសារព័ត៌មាន និងសកម្មជននយោបាយត្រូវបានចាប់ឃុំខ្លួនជាបន្តបន្ទាប់ នៅពេលដែលពួកគេប្រឆាំងតវ៉ានឹងការគាបសង្កត់របស់រដ្ឋាភិបាលកម្ពុជា។
កាលពីឆ្នាំ២០១៨ សេរីភាពសារព័ត៌មាននៅប្រទេសកម្ពុជា បានជាប់ចំណាត់ថ្នាក់លេខ១៤២ ឆ្នាំ២០១៩ ជាប់លេខ១៤៣ ខណៈឆ្នាំ២០២០ និងឆ្នាំ២០២១ បានជាប់ចំណាត់ថ្នាក់លេខ១៤៤ ពីរឆ្នាំជាប់គ្នា ដោយឡែកឆ្នាំ២០២២ នេះ កម្ពុជាបានវិលទៅរកចំណាត់ថ្នាក់ដូចឆ្នាំ២០១៨ វិញ ដែលជាឆ្នាំរដ្ឋាភិបាលកម្ពុជាបោសសម្អាតអ្នកសារព័ត៌មានឯករាជ្យគ្មានសល់នៅក្នុងប្រទេស។
ជុំវិញបញ្ហានេះ របាយការណ៍ឆ្នាំ២០២១ របស់អង្គការអ្នកកាសែតគ្មានព្រំដែន បានបង្ហាញថា ដោយបារម្ភខ្លាចចាញ់ក្នុងការបោះឆ្នោតជាតិកាលពីឆ្នាំ២០១៨ កន្លងទៅ បន្ទាប់ពីរដ្ឋាភិបាលប្រកាសរំលាយគណបក្សសង្គ្រោះជាតិកាលពីចុងឆ្នាំ២០១៧ លោក ហ៊ុន សែន បានប្រើយុទ្ធនាការប្រឆាំងនឹងប្រព័ន្ធផ្សព្វផ្សាយឯករាជ្យទាំងអស់។ ក្នុងនោះ រដ្ឋាភិបាលកម្ពុជាបានបិទស្ថានីយវិទ្យុចំនួន ៣២ស្ថានីយ បង្ខំឱ្យបិទទ្វារកាសែត ឌឹ ខេមបូឌា ដេលី និងការផ្លាស់ប្ដូរម្ចាស់កាសែតភ្នំពេញប៉ុស្តិ៍ ជាដើម ដោយឡែកនៅឆ្នាំ២០១៨ រដ្ឋាភិបាលបានបិទគេហទំព័រចំនួន ១៧គេហទំព័រថែមទៀត។
របាយការណ៍ដដែលអះអាងថា ជាលទ្ធផលនៃយុទ្ធនាការនេះ ពលរដ្ឋកម្ពុជានៅពេលនេះអាចទទួលបានព័ត៌មានតែពីស្ថាប័នដែលស្និទ្ធនឹងលោកនាយករដ្ឋមន្ត្រី ហ៊ុន សែន តែប៉ុណ្ណោះ។ ជាក់ស្តែង កូនស្រីលោក ហ៊ុន សែន គឺអ្នកស្រី ហ៊ុន ម៉ាណា ត្រូវគេរកឃើញថាជាប្រធានក្រុមហ៊ុនដ៏ធំសម្បើមមួយដែលកាន់កាប់កាសែត ទស្សនាវដី្ត ស្ថានីយវិទ្យុ បណ្ដាញទូរទស្សន៍ និងគេហទំព័រអ៊ីនធឺណិតនៅកម្ពុជាទាំងអស់ ដូចជាសារព័ត៌មាន Fresh News ជាដើម ដែលជាស្ថាប័នឃោសនាឱ្យរដ្ឋាភិបាលកម្ពុជាសព្វថ្ងៃនេះ។
ទោះជាបែបនេះក្តី លោក ហ៊ុន សែន បានចេញលិខិតក្នុងឱកាសកម្ពុជាប្រារព្ធទិវាសេរីភាពសារព័ត៌មានសកលលោកលើកទី២៩ កាលពីថ្ងៃទី៣ ខែឧសភា ឆ្នាំ២០២២ ក្រោមប្រធានបទ «សារព័ត៌មានក្នុងសម្ពាធប្រព័ន្ធឌីជីថល» នេះថា លោកប្ដេជ្ញាចិត្តក្នុងការគាំពារសិទ្ធិសេរីភាពនៃការបញ្ចេញមតិ និងសេរីភាពខាងសារព័ត៌មាននៅក្នុងក្របខ័ណ្ឌប្រជាធិបតេយ្យ សេរីពហុបក្សប៉ុណ្ណោះ។
យ៉ាងណាក៏ដោយ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងសម្ព័ន្ធអ្នកសារព័ត៌មានកម្ពុជា ហៅកាត់ថា ខេបូចា (CamboJa) បានបង្ហាញរបាយការណ៍ពីការធ្វើទុក្ខបុកម្នេញទៅលើអ្នកសារព័ត៌មាននៅកម្ពុជាកាលពីពេលកន្លងទៅថា ការធ្វើទុក្ខបុកម្នេញលើអ្នកសារព័ត៌មាននៅកម្ពុជានាពេលកន្លងមកមានចំនួនជា ៥០ករណី ក្នុងនោះអ្នកសារព័ត៌មានដែលបានរងគ្រោះមានចំនួនដល់ទៅជិត ១០០នាក់ ហើយជាង ៣០នាក់ផ្សេងទៀតត្រូវបានចាប់ឃាត់ខ្លួន និងជាង ២០នាក់ទៀតប្រឈមបណ្ដឹងផ្លូវច្បាប់៕