ចៅក្រមសាលាដំបូងរាជធានីភ្នំពេញ សម្រេចលើកពេលសវនាការក្នុងសំណុំរឿងប្រធានគណបក្សសង្គ្រោះជាតិ លោក កឹម សុខា តាមសំណើរបស់មេធាវីការពារក្ដីឱ្យរដ្ឋាភិបាល ក្រោមហេតុផលថា ពួកគេមានធុរៈចាំបាច់ដោយមិនអាចចូលរួមសវនាការនៅថ្ងៃពុធ ទី៤ ឧសភា បាន។
តាមការគ្រោងទុក តុលាការនឹងបន្តបើកសវនាការសំណុំរឿងលោក កឹម សុខា ដោយនឹងសួរដេញដោលលើអង្គហេតុជុំវិញការបោះឆ្នោត ដំណើរការបោះឆ្នោត និងបណ្តឹងតវ៉ាលទ្ធផលឆ្នោតកាលពីឆ្នាំ២០១៣។
ប៉ុន្តែសវនាការនេះ ក្រុមមេធាវីតំណាងដោយអាណត្តិរបស់ដើមបណ្តឹងរដ្ឋប្បវេណីឈ្មោះ ចេង ប៉េងហាប់ បានដាក់ពាក្យស្នើសុំលើកពេលសវនាការលោក កឹម សុខា ដោយថាពួកគេមានធុរៈចាំបាច់ដោយមិនអាចខកខានបាន ដូច្នេះហើយពួកគេមិនអាចចូលរួមសវនាការនៅថ្ងៃទី៤ ខែឧសភា នេះតាមកាលកំណត់បានឡើយ។ ពួកគេក៏បានស្នើសុំឱ្យចៅក្រមពន្យារពេលសវនាការទៅថ្ងៃក្រោយវិញ។
ក្រោយពីមានការដាក់លិខិតស្នើសុំរបស់ក្រុមមេធាវីដើមបណ្ដឹង កាលពីថ្ងៃទី៣ ខែឧសភា ហើយនៅថ្ងៃដដែលនោះ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក កូយ សៅ បានយល់ព្រមលើកពេលសវនាការទៅធ្វើនៅថ្ងៃទី១១ ខែឧសភា ឆ្នាំ២០២២ វិញ។
ទោះជាយ៉ាងណាក៏ដោយ សហមេធាវីការពារក្តីរបស់លោក កឹម សុខា លោក ចាន់ ចេន សម្ដែងការខកចិត្តជាខ្លាំងចំពោះការសម្រេចចិត្តរបស់ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក កូយ សៅ ដែលធ្វើការលើកពេលសវនាការនេះយ៉ាងតក់ក្រហល់បែបនេះ។ លោកបន្តថា រយៈពេលជិតប្រាំឆ្នាំមកហើយដែលយុត្តិធម៌របស់លោក កឹម សុខា នៅតែគ្មានពន្លឺ ហើយការអូសបន្លាយសវនាការនេះកាន់តែប៉ះពាល់ដល់សិទ្ធិរបស់កូនក្ដីរបស់លោក និងប៉ះពាល់ឆន្ទៈរបស់ពលរដ្ឋម្ចាស់ឆ្នោត។
ចំណែកអ្នកស្រី ម៉េង សុភារី សហមេធាវីរបស់លោក កឹម សុខា មួយរូបទៀត បានប្រាប់សារព័ត៌មាន The Cambodia Daily ថា ការស្នើសុំពន្យារពេលសវនាការរបស់សហមេធាវីការពារក្តីរបស់ដើមបណ្ដឹងមិនបានបញ្ជាក់អំពីហេតុផលណាមួយដែលអាចទទួលយកបាននោះឡើយ៕