មន្ត្រីជាន់ខ្ពស់សមាគមការពារសិទ្ធិមនុស្សអាដហុក ទាមទារឱ្យរដ្ឋាភិបាលកម្ពុជាអនុវត្តនូវរបបប្រជាធិបតេយ្យសេរីឱ្យបានពេញលេញ ដើម្បីធានានូវសិទ្ធិមូលដ្ឋានរបស់ពលរដ្ឋគ្មានការរំលោភបំពាន ជាពិសេសសិទ្ធិសេរីភាពជាមូលដ្ឋានដែលជាមូលដ្ឋានគ្រឹះរឹងមាំរបស់លទ្ធិប្រជាធិបតេយ្យ។
ប្រធានសមាគមការពារសិទ្ធិមនុស្សអាដហុក លោក នី សុខា បានលើកឡើងក្នុងពិធីបើកសិក្ខាសាលាថ្នាក់តំបន់ស្ដីពីការលើកកម្ពស់សេរីភាពមូលដ្ឋាន នៅថ្ងៃទី៣ និងទី៤ ខែឧសភា ឆ្នាំ២០២២ នេះថា កម្ពុជាគឺជាប្រទេសកំពុងអនុវត្តនូវរបបប្រជាធិបតេយ្យសេរី ដូច្នេះពលរដ្ឋដែលជាម្ចាស់ប្រទេស ត្រូវតែមានសិទ្ធិសេរីភាពពេញលេញស្របតាមច្បាប់ ដោយគ្មានការរារាំងណាមួយនោះឡើយ។
លោក នី សុខា អះអាងថា កន្លងមកនេះ ក្រុមអង្គការសមាគមតែងសង្កេតឃើញថា ការអនុវត្តជាក់ស្តែងរបស់អាជ្ញាធរកម្ពុជានៅក្នុងមូលដ្ឋានមួយចំនួន នៅតែបន្តធ្វើការរឹតត្បិតសិទ្ធិមូលដ្ឋានរបស់ពលរដ្ឋយ៉ាងធ្ងន់ធ្ងរ បើទោះបីជាមានការណែនាំពីក្រសួងមហាផ្ទៃលើបញ្ហានេះក៏ដោយ។
ប្រធានសមាគមការពារសិទ្ធិមនុស្សរូបនេះបញ្ជាក់ថា សិក្ខាសាលានេះគឺមានគោលបំណងជំរុញឱ្យសហគមន៍មូលដ្ឋានមានសមត្ថភាពគ្រប់គ្រាន់អាចមើលឃើញពីបញ្ហាដែលកើតមានឡើងក្នុងសហគមន៍របស់ពួកគេ ដើម្បីធ្វើការតស៊ូមតិក្នុងនាមជាអ្នកការពារសិទ្ធិមនុស្ស និងជួយរកដំណោះស្រាយលើបញ្ហានានាដែលកើតមានឡើងនៅក្នុងសហគមន៍របស់ពួកគេរហូតមក។
ការអះអាងនេះ ធ្វើឡើងស្របពេលដែលសិទ្ធិមូលដ្ឋានរបស់ពលរដ្ឋ ដូចជាសិទ្ធិបញ្ចេញមតិ សិទ្ធិជួបជុំ និងសិទ្ធិដទៃទៀតនៅកម្ពុជាកំពុងរងការធ្វើទុក្ខបុកម្នេញពីអាជ្ញាធរកម្ពុជាយ៉ាងធ្ងន់ធ្ងរសព្វថ្ងៃនេះ។
សមាគមអាដហុកបានរៀបចំសិក្ខាសាលាថ្នាក់តំបន់ស្ដីពីការលើកកម្ពស់សេរីភាពមូលដ្ឋានចាប់ពីថ្ងៃទី៣ ដល់ថ្ងៃទី៤ ខែឧសភា ឆ្នាំ២០២២ ដែលប្រព្រឹត្តទៅក្នុងសាលាគរុកោសល្យខេត្តបន្ទាយមានជ័យ និងមានសិក្ខាកាមចូលរួមជាង ៥០នាក់មកពីសហគមន៍នានាក្នុងខេត្តចំនួនបួន គឺខេត្តបន្ទាយមានជ័យ បាត់ដំបង កំពង់ឆ្នាំង និងខេត្តព្រះវិហារ។
សិក្ខាសាលានេះ ធ្វើឡើងក្នុងគោលបំណងបង្កើនការយល់ដឹងរបស់អ្នកចូលរួមឱ្យកាន់តែយល់ច្បាស់អំពីសិទ្ធិសេរីភាពក្នុងការអនុវត្តនូវការបញ្ចេញមតិ និងសកម្មភាពនានារបស់ពួកគេ ក្នុងនោះក៏មានការពង្រឹងសមត្ថភាពបញ្ចេញមតិតាមប្រព័ន្ធផ្សព្វផ្សាយសង្គម ដើម្បីធានានូវសុវត្ថិភាពឱ្យស្របនឹងផ្លូវច្បាប់របស់កម្ពុជាផងដែរ។
ទាក់ទិននឹងបញ្ហានេះ បេក្ខភាពនាយករដ្ឋមន្ត្រីអនាគតរបស់កម្ពុជា ដែលត្រូវជាកូនប្រុសច្បងរបស់លោក ហ៊ុន សែន គឺលោក ហ៊ុន ម៉ាណែត បានអះអាងកាលពីថ្ងៃទី៣ ខែឧសភា ឆ្នាំ២០២២ ថា កម្ពុជាជាប្រទេសប្រកាន់របបប្រជាធិបតេយ្យសេរីពហុបក្ស ដែលផ្តល់ការការពារ និងលំហសិទ្ធិសេរីភាពគ្រប់បែបយ៉ាងដល់ពលរដ្ឋដោយផ្អែកលើមូលដ្ឋានច្បាប់។
យ៉ាងណាក៏ដោយ កាលពីថ្ងៃទី២៩ ខែមីនា ឆ្នាំកន្លងទៅ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោក វីទិត មុនតាប៊ន រិះគន់ថា លំហសេរីភាពរបស់ពលរដ្ឋនៅកម្ពុជាកាន់តែរួមតូច និងកំពុងដើរថយក្រោយ ដោយសារតែការគ្រប់គ្រងតាមបែបឯកបក្ស ក្នុងនោះគឺមានការបិទលំហសេរីភាពពលរដ្ឋ និងសិទ្ធិនយោបាយ សវនាការលើសំណុំរឿងនយោបាយ និងការចាប់ខ្លួនអ្នកនយោបាយជំទាស់ដាក់ពន្ធនាគារ ជាដើម។
របាយការណ៍ស្ដីពីនីតិរដ្ឋ ឆ្នាំ២០២១ របស់គម្រោងយុត្តិធម៌ពិភពលោក (The World Justice Project) បានលាតត្រដាងថា កម្ពុជាគឺជាប្រទេសដែលដឹកនាំគ្មានតម្លាភាព ពោរពេញដោយការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម ដែលបានធ្លាក់ទៅក្នុងចំណោមប្រទេសដែលមាននីតិរដ្ឋអាក្រក់បំផុតក្នុងចំណាត់ថ្នាក់លេខទី១៣៨ ក្នុងចំណោមប្រទេស១៣៩ នៅលើពិភពលោក៕