មេដឹកនាំបក្សប្រឆាំងដែលកំពុងរងការរឹតត្បិតសេរីភាពពីបក្សកាន់អំណាច លោក កឹម សុខា អះអាងថា រដ្ឋាភិបាលហ្វាំងឡង់ កំពុងតាមដានអំពីការចាប់ឃុំខ្លួន និងសវនាការក្នុងសំណុំរឿងដែលរដ្ឋាភិបាលកម្ពុជាបានចោទប្រកាន់អំពីបទជាប់ពាក់ព័ន្ធជាមួយរដ្ឋបរទេសខ្លះ ដែលកំពុងមានទំនាក់ទំនងការទូត និងកិច្ចសហប្រតិបត្តិការទ្វេភាគី និងពហុភាគីជាមួយកម្ពុជាបច្ចុប្បន្ននេះ។
ប្រធានគណបក្សសង្គ្រោះជាតិ ដែលមិនទាន់មានសេរីភាពពេញលេញឡើងវិញ លោក កឹម សុខា បានសរសេរលើទំព័រហ្វេសប៊ុករបស់លោកបន្ទាប់ពីជួបពិភាក្សាជាមួយឯកអគ្គរដ្ឋទូតថ្មីនៃប្រទេសហ្វាំងឡង់ លោក Jyri Järviaho នៅថ្ងៃទី៥ ខែឧសភា ឆ្នាំ២០២២ ថា លោក Jyri Järviaho បានផ្ដោតការយកចិត្តទុកដាក់យ៉ាងខ្លាំងអំពីបញ្ហាលំហប្រជាធិបតេយ្យ សិទ្ធិមនុស្ស និងនីតិរដ្ឋនៅកម្ពុជាសព្វថ្ងៃនេះ។
លោក កឹម សុខា អះអាងថា តាមរយៈនៃការស្រាវជ្រាវជាសកល ក៏ដូចជាការសិក្សាអំពីលទ្ធិប្រជាធិបតេយ្យ និងសិទ្ធិមនុស្សរបស់លោកអស់រយៈពេលប្រមាណជា ៣០ឆ្នាំពីបណ្តាប្រទេសជាច្រើនក្នុងពិភពលោកកន្លងមកនេះ ជាពិសេសខ្លួនលោកផ្ទាល់ដែលធ្លាប់បានទៅធ្វើទស្សនកិច្ចសិក្សាកន្លងមក មើលឃើញថា ប្រទេសហ្វាំងឡង់ គឺជាប្រទេសដែលមានសន្តិភាពពិតប្រាកដ។
មេដឹកនាំបក្សប្រឆាំង លោក កឹម សុខា បញ្ជាក់ថា រដ្ឋាភិបាលហ្វាំងឡង់ តែងគិតគូរពីអនាគតអ្នកជំនាន់ក្រោយដោយឈរលើគោលការណ៍យុត្តិធម៌សង្គម ប្រជាធិបតេយ្យរឹងមាំ និងផ្តល់តម្លៃខ្ពស់បំផុតលើការគោរពសិទ្ធិមនុស្ស សេរីភាព និងសីលធម៌សង្គម ដែលនាំឲ្យពលរដ្ឋរស់នៅប្រកបដោយវិបុលសុខ និងសុខមាលភាពក្នុងកម្រិតខ្ពស់បំផុតលើពិភពលោក។
នៅថ្ងៃទី៥ ខែឧសភា ឆ្នាំ២០២២ នេះ ប្រធានគណបក្សសង្គ្រោះជាតិ លោក កឹម សុខា បានទទួលជួបជាមួយឯកអគ្គរដ្ឋទូតថ្មីនៃប្រទេសហ្វាំងឡង់ ប្រចាំនៅកម្ពុជា និងប្រទេសថៃ លោក Jyri Järviaho នៅគេហដ្ឋានរបស់លោកក្នុងរាជធានីភ្នំពេញ ក្នុងដំណើរទស្សនកិច្ចផ្លូវការរបស់លោក Jyri Järviaho នៅកម្ពុជានៅពេលនេះ។
មេដឹកនាំបក្សប្រឆាំង លោក កឹម សុខា ត្រូវបានតុលាការក្រុងភ្នំពេញចោទប្រកាន់ពីបទឃុបឃិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា រហូតឈានដល់ការចាប់ខ្លួនដាក់ពន្ធនាគារកាលពីឆ្នាំ២០១៧ កន្លងទៅ ប៉ុន្តែរហូតមកទល់ពេលនេះ តុលាការកម្ពុជាមិនទាន់មានភស្តុតាងណាមួយដើម្បីដាក់បន្ទុកឈានដល់ការកាត់ទោសលោកនៅឡើយទេ ខណៈរដ្ឋបរទេសដែលតុលាការចោទថាជាអ្នកនៅពីក្រោយលោក កឹម សុខា ក្នុងផែនការផ្តួលរំលំនោះ ក៏តុលាការមិនបានបង្ហាញថាជាប្រទេសណានោះដែរ។
ជុំវិញបញ្ហានេះ សហមេធាវីការពារក្តីមេដឹកនាំបក្សប្រឆាំង លោក អាង ឧត្តម កាលពីថ្ងៃទី២០ ខែមេសា ឆ្នាំ២០២២ បានអះអាងថា លោកគ្រោងស្នើឲ្យតុលាការក្រុងភ្នំពេញធ្វើលិខិតកោះហៅរដ្ឋបរទេសមួយចំនួនដែលរដ្ឋាភិបាលបានចោទប្រកាន់ថា ជាប់ពាក់ព័ន្ធក្នុងសំណុំរឿងរួមគំនិតក្បត់ជាមួយលោក កឹម សុខា ក្នុងការប៉ុនប៉ងផ្ដួលរំលំរដ្ឋាភិបាលកម្ពុជា មកបំភ្លឺនៅតុលាការដើម្បីស្វែងរកការពិត។
យ៉ាងណាក៏ដោយ អ្នកនាំពាក្យក្រសួងយុត្តិធម៌ លោក ជិន ម៉ាលីន កាលពីថ្ងៃទី២៧ ខែមេសា ឆ្នាំ២០២២ បានចោទថា ការស្នើសុំឲ្យរដ្ឋបរទេសចូលបំភ្លឺក្នុងសវនាការជុំវិញសំណុំរឿងប្រធានគណបក្សសង្គ្រោះជាតិ លោក កឹម សុខា គ្រាន់តែជាល្បិចរបស់ភាគីជនជាប់ចោទដើម្បីរុញឱ្យរដ្ឋបរទេសចូលក្នុងសំណុំរឿងរបស់ខ្លួន ក្នុងចេតនាប្រើប្រាស់ឥទ្ធិពលនៃរដ្ឋបរទេសនោះដាក់សម្ពាធលើកម្ពុជា ក្នុងបំណងជួយដកខ្លួនលោក កឹម សុខា ចេញពីសំណុំរឿងដែលតុលាការបានចោទប្រកាន់ប៉ុណ្ណោះ។
ទោះជាបែបនេះក្តី អតីតអគ្គទីប្រឹក្សាខ្មែរប្រចាំស្ថានទូតប្រទេសឥណ្ឌូនេស៊ី បណ្ឌិត សូ ណារ៉ូ បានប្រតិកម្មនៅថ្ងៃដដែលនោះថា តាមនីតិវិធីច្បាប់ តុលាការនឹងបញ្ជូនសំណើតាមរយៈក្រសួងយុត្តិធម៌ និងក្រសួងការបរទេស ដើម្បីធ្វើកំណត់ទូតបញ្ជូនសំណុំរឿងទៅរដ្ឋបរទេសដែលរងការចោទប្រកាន់ ឲ្យបញ្ជូនក្រុមអ្នកច្បាប់ចំណុះឲ្យក្រសួងយុត្តិធម៌នៃរដ្ឋបរទេសនោះ មកចូលរួមសវនាការតំណាងឲ្យរដ្ឋបរទេសនោះ ដើម្បីលាតត្រដាងការពិតដែលជានីតិវិធីដ៏មានប្រសិទ្ធភាពបំផុត។
បើទោះបីជាលោក កឹម សុខា ស្ថិតក្នុងការចោទប្រកាន់ និងការរឹតត្បិតសេរីភាពយ៉ាងណាក្តី ក៏តំណាងអង្គទូតនៃប្រទេសដែលជាមិត្តរបស់កម្ពុជា បាននាំគ្នាទៅជួបពិភាក្សាជាមួយលោកជាបន្តបន្ទាប់ ដូចជាតំណាងសហគមន៍អឺរ៉ុប តំណាងទូតសហរដ្ឋអាមេរិក និងបណ្តាប្រទេសជាច្រើនទៀត ដើម្បីបង្ហាញពីការទាមទារទៅកាន់រដ្ឋាភិបាលកម្ពុជាឲ្យបើកលំហប្រជាធិបតេយ្យ ការគោរពសិទ្ធិមនុស្ស និងបើកសិទ្ធិសេរីភាពមេដឹកនាំបក្សប្រឆាំងឡើងវិញផងដែរ៕