ទីស្ដីការគណៈរដ្ឋមន្ត្រីបានស្នើសុំកាត់ដីនៅតំបន់ភ្នំតាម៉ៅ ចំនួន ១ពាន់ហិកតារ ស្ថិតក្នុងឃុំកណ្ដឹង ស្រុកបាទី ខេត្តតាកែវ ដើម្បីប្រគល់ឱ្យក្រុមហ៊ុនឯកជនធ្វើការអភិវឌ្ឍ ខណៈអង្គការសម្ព័ន្ធមិត្តសត្វព្រៃបង្ហាញក្ដីបារម្ភពីផលប៉ះពាល់ និងការបាត់បង់សត្វព្រៃនៅតំបន់នេះ។
លិខិតចុះថ្ងៃទី១៤ ខែមករា ឆ្នាំ២០២២ របស់ទីស្ដីការគណៈរដ្ឋមន្ត្រីដែលសារព័ត៌មាន The Cambodia Daily ទើបទទួលបាន ឱ្យដឹងថា រដ្ឋាភិបាលបានយល់ព្រមឱ្យមានការដោះដូរដីចំនួន ៣០០ហិកតារ នៅស្ថានីយចិញ្ចឹមគោពូជភ្នំតាម៉ៅ និងដី ៥០០ហិកតាររបស់រដ្ឋបាលព្រៃឈើភ្នំតាម៉ៅឱ្យទៅក្រុមហ៊ុន «ខ្មែរ ហ្វ្រេស មីល ឯ.ក» (Khmer Fresh Milk) ដើម្បីធ្វើការអភិវឌ្ឍ។
លិខិតដដែលបញ្ជាក់ថា ដីចំនួន ៣០០ហិកតារនៅស្ថានីយចិញ្ចឹមគោពូជភ្នំតាម៉ៅ នឹងត្រូវដោះដូរជាមួយដីទំហំ ៤០០ហិកតារនៅស្រុកទឹកផុស ខេត្តកំពង់ឆ្នាំង ទទួលបានអគាររដ្ឋបាលទំហំ ១១ម៉ែត្រគុណ ២១ម៉ែត្រ កម្ពស់ ២ជាន់ចំនួនមួយខ្នង ហើយសម្រាប់អគារស្នាក់នៅទំហំ ១៦ម៉ែត្រគុណនឹង ៣៦ម៉ែត្រចំនួន ១ខ្នង ខណៈក្រោលគោទំហំ ៣២ម៉ែត្រគុណ ៤៥ម៉ែត្រចំនួន ២ខ្នង និងឃ្លាំងចំណីសត្វទំហំ ១៥ម៉ែត្រគុណ ២៥ម៉ែត្រចំនួន ២ខ្នង និងសម្ភារផ្សេងៗ។
ចំណែកដីចំនួន ៥០០ហិកតារទៀតរបស់រដ្ឋបាលព្រៃឈើភ្នំតាម៉ៅ ត្រូវបានផ្លាស់ទៅបង្កើតនៅសួនសត្វ Salan Angkor លើផ្ទៃដីទំហំ ២៥០ហិកតារ ស្ថិតក្នុងស្ថានីយស្ដារ និងអភិវឌ្ឍន៍ព្រៃឈើបន្ទាយស្រី ក្នុងស្រុកបន្ទាយស្រី និងស្រុកស្វាយលើ ខេត្តសៀមរាប រួមមានការសាងសង់អគាររដ្ឋបាល អគារចត្តាឡីស័ក អគារព្យាបាលសត្វព្រៃ សាងសង់របងព័ទ្ធជុំវិញ សាងសង់ផ្លូវ និងរៀបចំទីតាំងអភិវឌ្ឍន៍ផ្សេងទៀត។
លិខិតក៏បានឱ្យដឹងទៀតថា ក្រុមហ៊ុននឹងធ្វើសួនសត្វមណ្ឌលគិរីមានផ្ទៃដីជិត ៥សែនហិកតារ (៤៧២៨០៩ហិកតារ) នៅស្រុកអូររាំង ខេត្តមណ្ឌលគិរី រួមមានការសាងសង់សួនផ្កាទំហំ ២០ហិកតារ រៀបចំប្រព័ន្ធផ្លូវ ប្រព័ន្ធស្រោចស្រព និងការផ្ដល់ឡានម៉ូតូជាច្រើនគ្រឿង។ លិខិតបន្ថែមថា ក្រុមហ៊ុននឹងរៀបចំផ្ដល់ដីកម្មសិទ្ធិឯកជនទំហំ ៩,៨ហិកតារ ស្ថិតនៅភូមិត្រពាំងសាប ស្រុកបាទី ខេត្តតាកែវ ដែលអាចសង់ផ្ទះស្នាក់នៅអចិន្ត្រៃយ៍ជូនមន្ត្រី បុគ្គលិក និងកម្មករចំនួន ៨៥នាក់នៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ។
កាលពីថ្ងៃទី២៦ ខែមេសា ឆ្នាំ២០២២ នាយកកម្មវិធីនៅអង្គការសម្ព័ន្ធមិត្តសត្វព្រៃ (Wildlife Alliance) លោក នីច ម៉ាក (Nick Marx) បានចេញវីដេអូមួយបង្ហាញក្ដីបារម្ភពីផលប៉ះពាល់ និងការបាត់បង់សត្វព្រៃនៅតំបន់នេះ ដោយថាតំបន់ភ្នំតាម៉ៅ ក៏ជាកន្លែងល្អមួយនៅជិតរាជធានីភ្នំពេញសម្រាប់ប្រជាពលរដ្ឋទៅលេងកម្សាន្ត ឬសម្រាកលំហែកាយ និងទស្សនាសត្វព្រៃនៅទីនោះផងដែរ។
បើតាមអ្នកជំនាញអភិរក្សសត្វព្រៃរូបនេះ ឲ្យដឹងថា ដីភ្នំតាម៉ៅ ទំហំ ២៣០០ហិកតារ ក្នុងនោះ ៤០០ហិកតារជាកន្លែងសួនសត្វ។ លោកថា ភ្នំតាម៉ៅ មានសត្វព្រៃជាច្រើន និងច្រើនប្រភេទកំពុងរស់នៅ ការបង្កកំណើត និងជួយសង្គ្រោះ ដោយសារព្រៃឈើនៅជុំវិញភ្នំមួយនេះជាកន្លែងល្អសម្រាប់សត្វព្រៃរស់នៅ។
លោក នីច ម៉ាក អំពាវនាវដល់លោកនាយករដ្ឋមន្ត្រី ហ៊ុន សែន ឱ្យពិចារណាឡើងវិញចំពោះការដោះដូរតំបន់ភ្នំតាម៉ៅ ទៅឱ្យក្រុមហ៊ុនឯកជនអភិវឌ្ឍ។
ក្រុមហ៊ុន ខ្មែរ ហ្វ្រេស មីល ឯ.ក (Khmer Fresh Milk) ដែលធ្វើប្រតិបត្តិការកសិដ្ឋាន និងរោងចក្រកែច្នៃទឹកដោះគោ បានកកើតចេញពីការចាប់ដៃគូរវាងមូលនិធិ Cambodia-Laos-Myanmar Development Fund II ស្ថិតនៅប្រទេសសិង្ហបុរី ដែលគ្រប់គ្រងដោយក្រុមហ៊ុន Emerging Markets Investment Advisers (EMIA) មូលនិធិរបស់ជប៉ុន Nexasia ដែលមានមូលដ្ឋាននៅប្រទេសសិង្ហបុរី និងក្រុមស្ថាបនិកដែលទទួលបានជោគជ័យខ្ពស់រួមមានសហគ្រិនកម្ពុជា និងសហគ្រិនមកពីប្រទេសអ៊ីស្រាអែល៕