ព្រៃឈើនៅសហគមន៍ ឧត្ដមស្រែពស់ ហៅ ព្រៃមេត្តាធម្មជាតិ ស្ថិតនៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បានរងនូវការកាប់បំផ្លាញស្ទើររាល់ថ្ងៃដោយគ្មានការចូលរួមទប់ស្កាត់ពីអាជ្ញាធរពាក់ព័ន្ធឡើយ។ នេះបើយោងទៅតាមវីដេអូដែលបង្ហោះដោយប្រជាសហគមន៍។
យោងតាមវីដេអូដែលប្រជាសហគមន៍ផ្ញើមកសារព័ត៌មាន The Cambodia Daily នៅថ្ងៃទី៦ ឧសភា នេះដែលមានរយៈពេល ១នាទី និង ២វិនាទី ដែលមានសង្ឃដីការបស់ព្រះតេជព្រះគុណ ព្រំ សុជាតិ គង់នៅវត្តមេត្តាធម្មជាតិ ថាព្រៃសហគមន៍នៅជុំវិញវត្តមេត្តាធម្មជាតិ ស្ថិតក្នុងភូមិពោធិ៍មាស ឃុំត្រពាំងជោរ ត្រូវបានជនល្មើសចូលកាប់ និងដឹកចេញជារៀងរាល់ថ្ងៃ ដោយគ្មានការខ្លាចញញើតប្រជាសហគមន៍ចុះទៅហាមឃាត់ឡើយ។ ហើយក្នុងមួយថ្ងៃៗ ជនល្មើសចូលកាប់ និងដឹកជញ្ជូនឈើចេញពីព្រៃសហគមន៍នេះមិនក្រោម ១០គោយន្តនោះទេ។
ព្រះអង្គមានសង្ឃដីកាថា អ្នកកាប់ព្រៃទាំងនោះមិនដឹងមកពីខាងណានោះទេ គឺមកទាំងហ្វូង មកកាប់តែម្តង។ អ្នកខ្លះពេលព្រះអង្គ ឬក៏ប្រជាសហគមន៍លើកដៃសំពះគាត់កុំឱ្យកាប់ គាត់ក៏គេចទៅវិញទៅ។ អ្នកខ្លះគេនៅតែផ្គើននិយាយប្រកែកជាមួយសហគមន៍។
សមាជិកសហគមន៍ឧត្ដមស្រែពស់ លោក ខន សារិទ្ធិ មានប្រសាសន៍ថា ពលរដ្ឋចាប់ផ្ដើមចូលទៅកាប់ព្រៃសហគមន៍ ក្រោយពីសហគមន៍មួយនេះមានជម្លោះដីធ្លីជាមួយគ្រួសារកងទ័ពនៃបញ្ជាការដ្ឋានរថក្រោះនៃកងទ័ពជើងគោក ដែលទទួលបានដីសម្បទានសង្គមកិច្ចពីរដ្ឋាភិបាលនៅតំបន់នោះ។ លោកថា ករណីពលរដ្ឋហ៊ានចូលកាប់ឈើនៅក្នុងព្រៃសហគមន៍នេះ អាចជាការញុះញង់ពីសំណាក់ទាហាននៅទីនោះ។
ប្រធានមន្ទីរបរិស្ថានខេត្តកំពង់ស្ពឺ លោក ឱម ម៉ាកធារី បានប្រាប់សារព័ត៌មានក្នុងស្រុកថា ព្រៃឈើដែលកំពុងរងការកាប់នោះជាដីរបស់គ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក ដែលទើបទទួលបានដីសម្បទានសង្គមកិច្ចពីរដ្ឋាភិបាល។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង ២៦០ហិកតារ (២៦២,២៤ហិកតារ) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះនៃកងទ័ពជើងគោក និងពលរដ្ឋចំនួន ៤១គ្រួសារសម្រាប់ធ្វើលំនៅឋាន និងបង្កបង្កើនផល។ ចាប់តាំងពីចុងឆ្នាំ២០២១ អ្នកភូមិរាប់រយនាក់នៅឃុំត្រពាំងជោរ បាននាំគ្នាតវ៉ាប្រឆាំងក្រុមទាហាននៃបញ្ជាការដ្ឋានរថក្រោះ មិនឱ្យកាប់បំផ្លាញព្រៃសហគមន៍ «ឧត្ដមស្រែពស់» ហៅ «ព្រៃមេត្តាធម្មជាតិ» ដែលពួកគេអះអាងថាបានការពារជាង ២០ឆ្នាំមកហើយ។
បណ្ដាញសហគមន៍ព្រៃឡង់ (PLCN) និងសាកលវិទ្យាល័យ ខូផេនហេហ្គែន (University of Copenhagen) នៃប្រទេសដាណឺម៉ាក (Denmark) កាលពីខែមករា ឆ្នាំ២០២២ បានរកឃើញថា កម្ពុជាបាត់បង់គម្របព្រៃឈើជិត ២លាន ៥សែនហិកតារ ក្នុងចន្លោះឆ្នាំ២០០១ និងឆ្នាំ២០២០ ឬស្មើនឹងប្រមាណ ២៨% នៃគម្របព្រៃឈើសរុបគិតចាប់តាំងពីឆ្នាំ២០០០ មក៕