 បានចេញលិខិតសុំទោសជាសាធារណៈ ដោយអះអាងថា ការជេរប្រមាថទៅលើមេដឹកនាំបក្សកាន់អំណាច លោក ហ៊ុន សែន កន្លងមក គឺដោយសារតែលោកទទួលបានព័ត៌មានមិនគ្រប់ជ្រុងជ្រោយ និងជឿតាមការញុះញង់របស់អតីតមេដឹកនាំបក្សប្រឆាំង លោក សម រង្ស៊ី។){kind=link}
អតីតអនុប្រធានផ្នែករដ្ឋបាលគ្រប់គ្រងនៃគណបក្សសង្គ្រោះជាតិប្រចាំសហរដ្ឋអាមេរិក (CNRP-A) បានចេញលិខិតសុំទោសជាសាធារណៈ ដោយអះអាងថា ការជេរប្រមាថទៅលើមេដឹកនាំបក្សកាន់អំណាច លោក ហ៊ុន សែន កន្លងមក គឺដោយសារតែលោកទទួលបានព័ត៌មានមិនគ្រប់ជ្រុងជ្រោយ និងជឿតាមការញុះញង់របស់អតីតមេដឹកនាំបក្សប្រឆាំង លោក សម រង្ស៊ី។
អតីតអនុប្រធានផ្នែករដ្ឋបាលគ្រប់គ្រងនៃគណបក្សសង្គ្រោះជាតិប្រចាំនៅទីក្រុងឡងប៊ិច រដ្ឋកាលីហ្វ័រនីញ៉ា សហរដ្ឋអាមេរិក គឺលោក យង់ ប្រេឌី ណុយ (Brady Young Noy) បានចេញលិខិតសុំទោសជាសាធារណៈ ដែលត្រូវបានផ្សព្វផ្សាយនៅថ្ងៃទី១១ ខែឧសភា ឆ្នាំ២០២២ នេះថា ការប្រើប្រាស់ភាសាមិនសមរម្យនាពេលកន្លងមក ដោយការប្រមាថមើលងាយ រិះគន់ និងវាយប្រហារមេដឹកនាំបក្សកាន់អំណាច លោក ហ៊ុន សែន ដូចជាពាក់ព័ន្ធនឹងការពិនិត្យឌីអ៊ីនអេ (DNA) របស់លោក ហ៊ុន សែន និងលោក ហ៊ុន ម៉ាណែត កាលពីជាង ៧ឆ្នាំមុន ជាដើម គឺជាកំហុសរបស់លោកដែលជឿតាមការញុះញង់របស់ក្រុមប្រឆាំងប៉ុណ្ណោះ។
លោក យង់ ប្រេឌី ណុយ អះអាងថា ដោយសារតែលោកទទួលបានព័ត៌មានមិនគ្រប់ជ្រុងជ្រោយ និងជឿតាមការញុះញង់ ការលាបពណ៌របស់អតីតមេបក្សប្រឆាំង លោក សម រង្ស៊ី ដែលបានប្រឌិតព័ត៌មានក្លែងក្លាយទៅតាមអារម្មណ៍អគតិ ដែលមានចេតនាធ្វើឱ្យប៉ះពាល់ដល់កិត្តិយសរបស់មេដឹកនាំបក្សកាន់អំណាចពីការញុះញង់នេះ។
ការចេញលិខិតនេះ ធ្វើឡើងស្របពេលដែលមេដឹកនាំបក្សកាន់អំណាច លោក ហ៊ុន សែន ចូលរួមកម្មវិធីជួបជុំពលរដ្ឋខ្មែរនៅសហរដ្ឋអាមេរិកនៅថ្ងៃពុធសប្តាហ៍នេះ។
កាលពីថ្ងៃទី១៦ ខែឧសភា ឆ្នាំ២០១៦ លោក យង់ ប្រេឌី ណុយ ធ្លាប់ត្រូវបានគណបក្សសង្គ្រោះជាតិបញ្ចប់សមាជិកភាព បន្ទាប់ពីលោកបានសរសេរនៅលើគណនីហ្វេសប៊ុកផ្ទាល់ខ្លួន ដោយចោទកូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ថាជាកូនប្រុសមេដឹកនាំវៀតណាម លោក ឡេ ឌឹកថរ និងទាមទារឲ្យលោក ហ៊ុន សែន និងលោក ហ៊ុន ម៉ាណែត ពិនិត្យឌីអ៊ីនអេ (DNA) ថែមទៀត។
យ៉ាងណាក៏ដោយ អតីតមន្ត្រីបក្សប្រឆាំងរូបនេះត្រូវបានលោក សម រង្ស៊ី តែងតាំងជាអនុប្រធានគណបក្សសង្គ្រោះជាតិ (CNRP-A) សាជាថ្មីនៅក្នុងពិធីសមាជគណបក្សសង្គ្រោះជាតិលើកទី២ នៅសហរដ្ឋអាមេរិក ទីក្រុងអាតាឡង់តា កាលពីថ្ងៃទី២ ខែធ្នូ ឆ្នាំ២០១៨ កន្លងទៅ ក៏ជាថ្ងៃដែលប្រកាសតែងតាំងអតីតប្រធានគណបក្សសង្គ្រោះជាតិ លោក សម រង្ស៊ី ជាប្រធានគណបក្សស្តីទីនៅពេលនោះដែរ។
ទោះជាបែបនេះក្តី អតីតអនុប្រធានគណបក្សសង្គ្រោះជាតិ CNRP-A (CNRP-American) បានសម្រេចដាក់ពាក្យលាឈប់ពីតួនាទីរបស់ខ្លួនកាលពីថ្ងៃទី៥ ខែសីហា ឆ្នាំ២០២១ កន្លងទៅ ក្រោមហេតុផលថា ក្រុមមន្ត្រីបក្សប្រឆាំងភាគីលោក សម រង្ស៊ី នៅក្រៅប្រទេសបានដើរឃ្លាតឆ្ងាយពីគោលការណ៍របស់គណបក្សសង្គ្រោះជាតិ។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១១ ឧសភា នេះថា ការចេញមុខសារភាពកំហុសរបស់អតីតមន្ត្រីបក្សប្រឆាំងរូបនេះ គឺបង្ហាញពីការទទួលខុសត្រូវខ្ពស់ចំពោះទង្វើដែលខ្លួនបានប្រព្រឹត្ត ដែលជាគុណធម៌សម្រាប់អ្នកនយោបាយខ្មែរគ្រប់រូបគួរតែមាន។
លោក មាជ សុវណ្ណារ៉ា អះអាងថា វប្បធម៌លាបពណ៌ និងការជេរប្រមាថរបស់អ្នកនយោបាយនៅកម្ពុជា មិនត្រូវឲ្យមានបន្តទៀតនោះទេ ព្រោះឥទ្ធិពលដ៏អាក្រក់របស់វប្បធម៌នេះ បានធ្វើឲ្យកម្ពុជាធ្លាក់ចូលទៅក្នុងជម្លោះរវាងខ្មែរ និងខ្មែរ ដែលនាំឲ្យបែកបាក់សាមគ្គីជាតិយ៉ាងធ្ងន់ធ្ងរ ខណៈកម្ពុជាត្រូវការផ្សះផ្សាជាតិជាបន្ទាន់ ដើម្បីបញ្ចប់វិបត្តិជាប់គាំងនយោបាយសព្វថ្ងៃនេះ។
មន្ត្រីជាន់ខ្ពស់រូបនេះបញ្ជាក់ថា ដើម្បីបញ្ចប់ជម្លោះនយោបាយនៅកម្ពុជា អ្នកនយោបាយខ្មែរត្រូវតែប្រកាន់គោលការណ៍អហិង្សាជាដាច់ខាត ត្បិតការប្រកាន់ជំហរនយោបាយបែបនេះ គឺជាមធ្យោបាយដ៏ល្អបំផុតក្នុងការកសាងឯកភាពជាតិរវាងខ្មែរ និងខ្មែរ ហើយក៏ជាគំរូល្អសម្រាប់អ្នកនយោបាយជំនាន់ក្រោយយកតម្រាប់តាម ក្នុងការចូលប្រឡូកក្នុងឆាកនយោបាយដើម្បីចៀសជម្លោះបែកបាក់ជាតិផងដែរ៕