បុរសខ្លាំងកម្ពុជា លោក ហ៊ុន សែន អះអាងថា កម្ពុជាចង់ធ្វើមិត្តគ្រប់បណ្តាប្រទេសទាំងអស់ រួមទាំងអាមេរិកផងដែរ ព្រោះកម្ពុជាប្រកាន់ជំហរនយោបាយអព្យាក្រឹតដែលមានចែងក្នុងរដ្ឋធម្មនុញ្ញរបស់ខ្លួន។
មេដឹកនាំខ្មែរក្រាញអំណាច លោក ហ៊ុន សែន បានសរសេរលើទំព័រហ្វេសប៊ុករបស់លោកបន្ទាប់ពីជំនួបជាមួយអតីតសមាជិកព្រឹទ្ធសភាសហរដ្ឋអាមេរិក លោក ដូណាល់ អឹម បេនតុន (Donald M. Benton) កាលពីថ្ងៃទី១១ ខែឧសភា ឆ្នាំ២០២២ ថា កម្ពុជាចង់ធ្វើមិត្តគ្រប់បណ្តាប្រទេសទាំងអស់រួមទាំងអាមេរិកផងដែរ ក្នុងនោះតាមរយៈទំនាក់ទំនងល្អប្រសើររវាងកម្ពុជា និងអាមេរិក បានធ្វើឱ្យទំហំពាណិជ្ជកម្ម និងការវិនិយោគរវាងប្រទេសទាំងពីរមានកំណើនឡើងគួរឱ្យកត់សម្គាល់។
អតីតមេកម្មាភិបាលក្នុងរបបវាលពិឃាត លោក ហ៊ុន សែន អះអាងថា តាមរយៈទំនាក់ទំនងកម្ពុជា និងអាមេរិកអស់រយៈពេល ៧២ឆ្នាំកន្លងមកនេះ បានឈានដល់កម្រិតមួយដែលល្អប្រសើរមិនធ្លាប់មានពីមុនមករវាងប្រទេសទាំងពីរ។ បើគិតមកទល់នឹងពេលនេះ ខណៈទំនាក់ទំនងដៃគូសន្ទនាអាស៊ាន-អាមេរិក ទើបតែមានរយៈពេល ៤៥ឆ្នាំប៉ុណ្ណោះ។
ការអះអាងនេះ ធ្វើឡើងនៅពេលដែលលោក ហ៊ុន សែន ជួបពិភាក្សាជាមួយអតីតសមាជិកសភាជាន់ខ្ពស់របស់សហរដ្ឋអាមេរិកក្នុងអំឡុងពេលដែលលោកទៅចូលរួមកិច្ចប្រជុំអាស៊ាន-អាមេរិកនៅពេលនេះ។ ក្នុងអំឡុងពេលចូលរួមកិច្ចប្រជុំកំពូលពិសេសអាស៊ាន-អាមេរិកនៅថ្ងៃទី១២ និងទី១៣ នេះ មេដឹកនាំបក្សកាន់អំណាច លោក ហ៊ុន សែន បានជួបជាមួយអតីតសមាជិកព្រឹទ្ធសភាអាមេរិក លោក ដូណាល់ អឹម បេនតុន (Donald M. Benton) កាលពីថ្ងៃពុធម្សិលមិញ (ថ្ងៃទី១១ ឧសភា)។
លោកនាយករដ្ឋមន្ត្រី ហ៊ុន សែន ក៏បានជួបជាមួយសមាជិកសភាជាន់ខ្ពស់សហរដ្ឋអាមេរិក អ្នកស្រី ថាមមី ដាកវើក ផងដែរ ដោយលោកបានអះអាងថា លោកចង់ឱ្យមានការកែលំអចំណុចខ្វែងគំនិតគ្នា ដើម្បីធ្វើឱ្យទំនាក់ទំនងកម្ពុជា-អាមេរិកកាន់តែល្អប្រសើរថែមទៀត។
ក្នុងដំណើរទស្សនកិច្ចមកចូលរួមធ្វើជាសហប្រធានក្នុងកិច្ចប្រជុំកំពូលអាស៊ាន-អាមេរិកនៅថ្ងៃព្រហស្បតិ៍ ទី១២ ឧសភា នេះ ពិតមែនតែលោក ហ៊ុន សែន បានជួបជាមួយសមាជិកសភា និងអតីតសមាជិកសភាអាមេរិក ប៉ុន្តែលោកមិនត្រូវបានរៀបចំឲ្យមានជំនួបទ្វេភាគីណាមួយជាមួយប្រធានាធិបតីសហរដ្ឋអាមេរិក លោក ចូ បៃដិន នោះទេក្នុងនាមលោកជាសហប្រធានក្នុងកិច្ចប្រជុំកំពូលពិសេសអាស៊ាន-អាមេរិកនេះ។
យ៉ាងណាក៏ដោយ ទំនាក់ទំនងសហរដ្ឋអាមេរិកជាមួយនឹងកម្ពុជាក្នុងពេលបច្ចុប្បន្ននេះ ត្រូវគេមើលឃើញថា កំពុងតែស្ថិតក្នុងភាពរកាំរកូសយ៉ាងខ្លាំងទាំងនយោបាយការបរទេស និងកិច្ចសហប្រតិបត្តិការនានា ក្នុងនោះមេដឹកនាំកម្ពុជា លោក ហ៊ុន សែន បានចោទសហរដ្ឋអាមេរិកថាជាប្រទេសមហាអំណាចដែលប្រើប្រាស់ល្បិចកលជ្រៀតជ្រែកចូលកិច្ចការផ្ទៃក្នុងកម្ពុជា តាមរយៈនៃការអនុវត្តស្តង់ដារពីរអំពីលទ្ធិប្រជាធិបតេយ្យ និងការគោរពសិទ្ធិមនុស្ស។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១២ ឧសភា នេះថា ការលើកឡើងរបស់លោក ហ៊ុន សែន អំពីការដឹកនាំនយោបាយអព្យាក្រឹតតាមរដ្ឋធម្មនុញ្ញនេះ គឺគ្រាន់តែជាការត្អូញត្អែរផង និងដោះសាចំពោះអាមេរិកផងប៉ុណ្ណោះ។
លោកបន្ថែមថា ការត្អូញត្អែរនេះ គឺលោក ហ៊ុន សែន ចង់រកយោបល់ពីសហរដ្ឋអាមេរិកក្នុងចេតនាឲ្យមានជំនួបទ្វេភាគីជាមួយប្រធានាធិបតីអាមេរិក ដើម្បីសង្គ្រោះមុខមាត់របស់គាត់ដែលកំពុងបាក់ស្រុតខ្លាំងក្នុងដំណើរទស្សនកិច្ចមកធ្វើជាសហប្រធានក្នុងកិច្ចប្រជុំអាស៊ាន-អាមេរិក ដែលលោក ចូ បៃដិន មិនបានផ្ដល់កិត្តិយសទទួលជាភ្ញៀវជជែកការងារទ្វេភាគីនៅពេលនេះ។
លោក គឹម សុខ លើកឡើងថា ការលើកឡើងរបស់លោក ហ៊ុន សែន នេះ ក៏ជាការដោះសាផងដែរចំពោះសហរដ្ឋអាមេរិក ព្រោះថាបើលោក ហ៊ុន សែន ពិតជាចង់រក្សាអព្យាក្រឹត និងចង់ស្ដារទំនាក់ទំនងជាមួយអាមេរិកមែននោះ មិនមែនលោក ហ៊ុន សែន នៅតែរក្សាជំហរចោទប្រកាន់សហរដ្ឋអាមេរិកទាក់ទងនឹងសំណុំរឿងប្រតិដ្ឋក្បត់ជាតិរបស់ប្រធានគណបក្សសង្គ្រោះជាតិ លោក កឹម សុខា នោះទេ។
អ្នកវិភាគរូបនេះបញ្ជាក់ថា នៅពេលដែលលោក ហ៊ុន សែន មិនព្រមទម្លាក់ចោលរឿងក្ដីក្ដាំក្បត់ជាតិរបស់មេដឹកនាំបក្សប្រឆាំង លោក កឹម សុខា ដែលបានចោទភ្ជាប់នឹងរដ្ឋាភិបាលអាមេរិក ហើយលោក ហ៊ុន សែន បែរជាប្រកាសបង្ហាញជំហរយ៉ាងជ្រៅជាមួយចិនគ្រប់ជ្រុងជ្រោយនាពេលកន្លងមកនោះ គឺអាចបញ្ជក់បានថា ការចង់ធ្វើជាមិត្តរបស់សហរដ្ឋអាមេរិកគ្រាន់តែជាការដោះសាប៉ុណ្ណោះ។
កាលពីថ្ងៃទី២០ ខែឧសភា ឆ្នាំ២០២១ ក្នុងសន្និសីទអន្តរជាតិលើកទី២៦ ស្ដីពីអនាគតរបស់អាស៊ី លោក ហ៊ុន សែន អះអាងថា បើមិនឲ្យលោកទៅពឹងចិន តើឱ្យលោកទៅពឹងអ្នកណា។ ក្នុងន័យនេះ ទំនងជាលោក ហ៊ុន សែន ចង់សំដៅថា គ្មានមិត្តបរទេសណាដែលកម្ពុជាអាចពឹងបាននោះឡើយក្រៅតែពីមិត្តដែកថែបចិន៕