មន្ត្រីជាន់ខ្ពស់បក្សកាន់អំណាច ព្រមានថា ដើម្បីរក្សាសន្តិភាពឲ្យបានគង់វង្ស គឺប្រជាពលរដ្ឋត្រូវតែនាំគ្នាទៅបោះឆ្នោតជូនគណបក្សកាន់អំណាចដែលកំពុងដឹកនាំប្រទេសសព្វថ្ងៃនេះ។
សមាជិកគណៈកម្មាធិការកណ្តាលបក្សកាន់អំណាច និងជាអភិបាលក្រុងភ្នំពេញ លោក ឃួង ស្រេង បានលើកឡើងក្នុងពិធីជួបជាមួយយុវជន និងសកម្មជនគណបក្សកាន់អំណាចនៅមជ្ឈមណ្ឌលកោះពេជ្រ ក្នុងរាជធានីភ្នំពេញ កាលពីថ្ងៃទី១១ ខែឧសភា ឆ្នាំ២០២២ ថា ពេលប្រជាពលរដ្ឋមានទុក្ខលំបាក គឺមានតែគណបក្សកាន់អំណាចតែមួយគត់ដែលជួយប្រជាពលរដ្ឋគ្រប់ពេលវេលា។
មន្ត្រីបក្សកាន់អំណាចរូបនេះអំពាវនាវឲ្យប្រជាពលរដ្ឋខ្មែរ និងសមាជិកបក្សរបស់ខ្លួនរួមគ្នាថែរក្សាសន្តិភាពដែលមេដឹកនាំខ្មែរ លោក ហ៊ុន សែន រកបានមកដោយលំបាកដោយការលះបង់អាយុជីវិត ដើម្បីបង្កើតឲ្យមានសន្តិភាព។ ដូច្នេះ ដើម្បីការពារសន្តិភាពនេះ ពលរដ្ឋខ្មែរគ្រប់រូបគ្មានជម្រើសណាផ្សេងក្រៅពីបោះឆ្នោតជូនបក្សកាន់អំណាចនោះឡើយ។
លោក ឃួង ស្រេង បញ្ជាក់ថា សព្វថ្ងៃនេះ បើកម្ពុជាគ្មានសន្តិភាពដោយពិតប្រាកដទេ ប្រជាពលរដ្ឋខ្មែរគ្រប់គ្នាទូទាំងប្រទេសមិនអាចប្រកបរបរចិញ្ចឹមជីវិតដោយសេរីបាននោះដែរ។ ដូច្នេះ ដើម្បីភាពសុខដុមរមនា និងភាពសម្បូរសប្បាយរបស់ប្រជាពលរដ្ឋគ្រប់រូប គឺមានតែបោះឆ្នោតឲ្យបក្សកាន់អំណាចដឹកនាំប្រទេសជាតិបន្តទៀតប៉ុណ្ណោះ។
ការអះអាងនេះ ធ្វើឡើងស្របពេលដែលការបោះឆ្នោតជ្រើសរើសក្រុមប្រឹក្សាឃុំ-សង្កាត់កាន់តែខិតជិតមកដល់ ហើយការលើកឡើងពីការថែរក្សាសន្តិភាពនៅពេលនេះ ក៏ត្រូវគេរិះគន់ថាគ្រាន់តែជាការគំរាមរបស់មន្ត្រីបក្សកាន់អំណាចរូបនេះតែប៉ុណ្ណោះ។
សកម្មជនអត្ថាធិប្បាយខ្លឹមសារកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន បានប្រាប់សារព័ត៌មាន The Cambodia Daily នៅថ្ងៃទី១២ ឧសភា នេះថា សន្តិភាពដែលកម្ពុជាកំពុងមានសព្វថ្ងៃនេះ គឺកើតចេញមកពីកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ប៉ុណ្ណោះ មិនមែនជាសន្តិភាពដែលកើតឡើងដោយសារបុគ្គលណា គណបក្សណា ឬបរទេសណាមួយនោះឡើយ។
លោក ស្រ៊ុន ស្រ៊ន អះអាងថា ប្រជាពលរដ្ឋខ្មែរមានកាតព្វកិច្ចទៅបោះឆ្នោតដើម្បីជ្រើសរើសគណបក្សដែលខ្លួនស្រឡាញ់ និងតំណាងរបស់ខ្លួននៅមូលដ្ឋាន ស្របតាមខ្លឹមសារនៃរដ្ឋធម្មនុញ្ញ កតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ និងច្បាប់បោះឆ្នោត ជាដើម។ ដូច្នេះ មន្ត្រីគណបក្សនយោបាយមិនគួរមកគំរាមកំហែងប្រជាពលរដ្ឋដោយប្រការណាមួយ ដើម្បីសន្លឹកឆ្នោតនោះឡើយ ព្រោះជាទង្វើដែលផ្ទុយនឹងច្បាប់ទាំងស្រុង។
លោករិះគន់ថា គណបក្សណាដែលគំរាមកំហែង ឬបញ្ចុះបញ្ចូលប្រជាពលរដ្ឋម្ចាស់ឆ្នោតដោយប្រើលាភសក្ការៈដូចជា លុយកាក់ ឬក៏ទ្រព្យសម្បត្តិនានា ជាដើម សុទ្ធសឹងតែជាគណបក្សក្បត់ឧត្តមគតិជាតិទាំងអស់។
ស្រដៀងគ្នានេះដែរ កាលពីថ្ងៃទី១០ ខែឧសភា ឆ្នាំ២០១៧ មួយខែនៃការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ កន្លងទៅ បុរសខ្លាំងដើរបញ្ច្រាសទិស លោក ហ៊ុន សែន ព្រមានថា សង្គ្រាមនឹងកើតឡើងវិញ ប្រសិនបើបក្សរបស់លោកចាញ់ឆ្នោត។
ទាក់ទិននឹងបញ្ហានេះ រាល់ពេលដែលការបោះឆ្នោតជិតមកដល់ម្តងៗ គេសង្កេតឃើញថាបក្សកាន់អំណាចតែងប្រើវិធីសាស្ត្រគំរាមពលរដ្ឋខ្លួនឯង ដោយប្រកាសពីការបាត់បង់នូវសន្តិភាព ប្រសិនបើគណបក្សខ្លួនចាញ់ឆ្នោត។
ជាក់ស្តែង កាលពីមុនការបោះឆ្នោតជាតិឆ្នាំ២០១៣ លោក ហ៊ុន សែន ធ្លាប់គំរាមថានឹងមានសង្គ្រាម បើគណបក្សរបស់លោកចាញ់ឆ្នោត ប៉ុន្តែជាលទ្ធផលនៃការបោះឆ្នោតជាតិអាណត្តិទី៥ ឆ្នាំ២០១៣ គណបក្សកាន់អំណាចបានបាត់បង់កៅអីតំណាងរាស្ត្ររហូតដល់ទៅ ២២អាសនៈឯណោះ៕