បុរសខ្លាំងក្រាញអំណាចតត្រកូល លោក ហ៊ុន សែន បដិសេធថា ការចោទប្រកាន់លើកំពង់ផែរាមអំពីវត្តមានយោធាចិន ពីសំណាក់សហរដ្ឋអាមេរិក គឺជារឿងមិនពិត ព្រោះកម្ពុជាមានគោលជំហរប្រកាន់នយោបាយអព្យាក្រឹតអចិន្ត្រៃយ៍ដែលមានចែងច្បាស់ក្នុងរដ្ឋធម្មនុញ្ញ។
មេដឹកនាំខ្មែរដែលគេចាត់ទុកជាឧក្រិដ្ឋជន លោក ហ៊ុន សែន បានសរសេរលើទំព័រហ្វេសប៊ុករបស់លោក បន្ទាប់ពីលោកបានជួបពិភាក្សាការងារជាមួយតំណាងក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់របស់អាមេរិក លោក ស្កុត ដេវីដ ផាវិន (Scott David Parven) កាលពីថ្ងៃទី១២ ខែឧសភា ឆ្នាំ២០២២ ថា ទំនាក់ទំនងរវាងកម្ពុជា និងអាមេរិកសព្វថ្ងៃនេះ បានឈានដល់កម្រិតល្អប្រសើរមួយដែលមិនធ្លាប់មានក្នុងប្រវត្តិសាស្ត្រនៃទំនាក់ទំនងរវាងប្រទេសទាំងពីរ។
បុរសខ្លាំងដើរបញ្ច្រាសទិសប្រើកណ្ដាប់ដៃដែកក្រាញអំណាច លោក ហ៊ុន សែន បញ្ជាក់ទៅកាន់ក្រុមហ៊ុនប្រឹក្សាយោបល់ និងបញ្ចុះបញ្ចូលរបស់អាមេរិកថា ពួកគេនៅមានកិច្ចការមួយចំនួនទៀតដែលត្រូវធ្វើបន្ត គឺធ្វើយ៉ាងណាកុំឱ្យមានការភ័ន្តច្រឡំលើទំនាក់ទំនងរវាងកម្ពុជា និងសហរដ្ឋអាមេរិក ជាពិសេសអំពីការចោទប្រកាន់កម្ពុជាជុំវិញវត្តមានយោធាចិនលើកំពង់ផែរាមដូចសព្វថ្ងៃនេះ។
អតីតមេកម្មាភិបាលខ្មែរក្រហម លោក ហ៊ុន សែន បានលើកឡើងពីការផ្អាកធ្វើសមយុទ្ធជាមួយអាមេរិកកាលពីឆ្នាំ២០១៧ ផងដែរថា គឺដោយសារតែកម្ពុជាត្រូវរៀបចំការបោះឆ្នោតក្រុមប្រឹក្សាឃុំ-សង្កាត់ប៉ុណ្ណោះ មិនមែនមានបំណងបង្អាក់ទំនាក់ទំនងផ្នែកយោធាជាមួយអាមេរិកនោះឡើយ។
កាលពីថ្ងៃទី១២ ខែឧសភា ឆ្នាំ២០២២ មេដឹកនាំបក្សកាន់អំណាច លោក ហ៊ុន សែន បានជួបជាមួយតំណាងក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់របស់អាមេរិក លោក ស្កុត ដេវីដ ផាវិន (Scott David Parven) អំឡុងដំណើរទស្សនកិច្ចចូលរួមកិច្ចប្រជុំកំពូលអាស៊ាន-អាមេរិកនៅថ្ងៃទី១២ និងទី១៣ ឧសភា នេះ។
តំណាងក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់របស់អាមេរិក លោក ស្កុត ដេវីដ ផាវិន (Scott David Parven) បានលើកឡើងក្នុងជំនួបជាមួយលោក ហ៊ុន សែន ថា កន្លងមកក្រុមការងាររបស់លោកបានធ្វើការងារជាច្រើនជាមួយស្ថានទូតកម្ពុជាប្រចាំនៅអាមេរិក ដើម្បីជំរុញឱ្យទំនាក់ទំនងរវាងកម្ពុជា និងអាមេរិកកាន់តែល្អប្រសើរ។
លោកបានបញ្ជាក់ថា ក្រុមហ៊ុនរបស់លោកក៏បានទាក់ទងជាមួយថ្នាក់ដឹកនាំរបស់អាមេរិកនៅស្ថាប័នសភា ក៏ដូចជារដ្ឋាភិបាលផងដែរ ដើម្បីធ្វើយ៉ាងណាឱ្យអាមេរិកយល់ពីជំហររបស់កម្ពុជាទាំងទំនាក់ទំនងទ្វេភាគី ទាំងការងារអាស៊ាន និងការងារអន្តរជាតិផងដែរ។
ជុំវិញបញ្ហានេះ កាលពីថ្ងៃទី២១ ខែមករា ឆ្នាំ២០២២ កន្លងទៅ ក្រសួងយុត្តិធម៌អាមេរិកបានលាតត្រដាងថា រដ្ឋាភិបាលរបស់លោក ហ៊ុន សែន បានចំណាយទឹកប្រាក់ជាង ៧០ម៉ឺនដុល្លារអាមេរិកសម្រាប់ឆ្នាំ២០២២ ក្នុងការជួលក្រុមហ៊ុន AKIN GUMP STRAUSS HAUER & FELD LLP ឲ្យជួយបញ្ចុះបញ្ចូលរដ្ឋាភិបាលអាមេរិក ដើម្បីស្ដារទំនាក់ទំនងទ្វេភាគីរវាងកម្ពុជា និងអាមេរិកឡើងវិញ ជាពិសេសជុំវិញករណីផែរាមដែលសហរដ្ឋអាមេរិកចោទថាកម្ពុជាបានផ្តល់ជាមូលដ្ឋានឲ្យយោធាចិនសម្រាប់ប្រតិបត្តិការបច្ចុប្បន្ននេះ។
បើទោះបីលោក ហ៊ុន សែន អះអាងថាកម្ពុជាមិនមានវត្តមានយោធាចិនលើកំពង់ផែរាមក៏ដោយ ប៉ុន្តែអនុរដ្ឋមន្ត្រីការបរទេសនៃសហរដ្ឋអាមេរិក អ្នកស្រី Wendy R. Sherman កាលពីថ្ងៃទី១២ ខែឧសភា ឆ្នាំ២០២២ នេះ បានសរសេរលើបណ្ដាញសង្គមធ្វីតធឺរបស់ខ្លួនថា ក្នុងជំនួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន អ្នកស្រីបានជំរុញឲ្យកម្ពុជាអនុវត្តការងាររបស់ខ្លួនឲ្យបានល្អ។
កាលពីឆ្នាំ២០១៩ កាសែតអាមេរិក The Wall Street Journal បានចុះផ្សាយថា កម្ពុជានិងចិន បានចុះហត្ថលេខាជាសម្ងាត់លើកិច្ចព្រមព្រៀងមួយដែលអនុញ្ញាតឱ្យចិន មានសិទ្ធិផ្ដាច់មុខចូលទៅប្រើប្រាស់មូលដ្ឋានកងទ័ពជើងទឹករាមក្នុងរយៈពេល ៣០ឆ្នាំ ដោយអាចបន្តឡើងវិញនៅរៀងរាល់ ១០ឆ្នាំម្ដង។
ជុំវិញពីការសង្ស័យវត្តមានយោធាចិនលើកំពង់ផែរាមនេះ កាលពីថ្ងៃទី១ ខែមិថុនា ឆ្នាំ២០២១ អនុរដ្ឋមន្ត្រីក្រសួងការបរទេសសហរដ្ឋអាមេរិក អ្នកស្រី Wendy Sherman លើកឡើងចំពោះមុខរដ្ឋាភិបាលកម្ពុជាចំៗថា បើរដ្ឋាភិបាលកម្ពុជាមិនបកស្រាយពីមូលដ្ឋានយោធារបស់ចិននៅកម្ពុជាឲ្យបានច្បាស់លាស់ទេ នោះគឺមានន័យថា កម្ពុជាកំពុងមើលស្រាលអធិបតេយ្យភាពខ្លួនឯង ហើយក៏ជាការបង្កឲ្យមានការគំរាមកំហែងដល់សន្តិសុខក្នុងតំបន់ និងប៉ះពាល់ជាអវិជ្ជមានដល់ទំនាក់ទំនងកម្ពុជា-អាមេរិកផងដែរ៕