អ្នកឃ្លាំមើលស្ថានការណ៍នយោបាយកម្ពុជា អះអាងថា ទំនាក់ទំនងទ្វេភាគីរវាងកម្ពុជា និងអាមេរិក នឹងគ្មានឧបសគ្គណាមួយកើតឡើងនោះឡើយ ប្រសិនបើរដ្ឋាភិបាលកម្ពុជាគោរពអនុវត្តឲ្យបានត្រឹមត្រូវតាមរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
អ្នកឃ្លាំមើលស្ថានការណ៍កម្ពុជា លោក សុខ សុគន្ធ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃចន្ទ ទី១៦ ឧសភា ដើមសប្តាហ៍នេះថា នៅពេលដែលមេដឹកនាំបក្សកាន់អំណាច លោក ហ៊ុន សែន គ្មានជំហរនយោបាយច្បាស់ជាមួយមហាអំណាចលោកសេរី ដោយគ្រាន់តែប្រើពាក្យអព្យាក្រឹតតាមបែបនយោបាយក្រឡេចក្រឡុចនោះ នឹងនាំមហន្តរាយសម្រាប់កម្ពុជាជាមិនខាន។
លោក សុខ សុគន្ធ អះអាងថា អ្វីដែលសហរដ្ឋអាមេរិកត្រូវការបំផុតនោះ គឺមិនមែនឲ្យកម្ពុជាទៅរណបអាមេរិក ឬរណបចិននោះទេ។ ប៉ុន្តែកម្ពុជាត្រូវតែរក្សាការអនុវត្តនូវនយោបាយការបរទេសរបស់ខ្លួនស្របតាមខ្លឹមសាររដ្ឋធម្មនុញ្ញ ដែលបានចែងអំពីការរក្សាអព្យាក្រឹត ដោយការអនុវត្តតាមនយោបាយប្រជាធិបតេយ្យសេរីពហុបក្ស ដើម្បីចៀសវាងនូវការបង្កនូវភាពអមិត្តជាមួយមហាអំណាចបច្ចុប្បន្ននេះ។
អ្នកឃ្លាំមើលស្ថានការណ៍កម្ពុជារូបនេះបញ្ជាក់ថា កម្ពុជាគ្រាន់តែរក្សាអព្យាក្រឹតភាពរបស់ខ្លួនស្របតាមរដ្ឋធម្មនុញ្ញ នោះកម្ពុជានឹងទទួលបានការអនុគ្រោះពន្ធពីសហរដ្ឋអាមេរិកក្នុងទំហំទឹកប្រាក់ប្រមាណជា ១ពាន់លានដុល្លារអាមេរិកក្នុងមួយឆ្នាំៗ ប៉ុន្តែបើកម្ពុជាអនុវត្តនយោបាយចងកំហឹង បង្កើតភាពសម្អប់ចំពោះអាមេរិក ដោយការចូលដៃជាមួយចិន និងការរក្សាអព្យាក្រឹតនៅតែលើមាត់ នោះកម្ពុជានឹងមានតែការខាតបង់រហូត។
លោក សុខ សុគន្ធ អះអាងថា ចំណងមិត្តភាពដែកថែបរវាងកម្ពុជា និងចិនសព្វថ្ងៃនេះ គឺជាឱកាសសម្រាប់ចិនប្រើប្រាស់កម្ពុជាជាកន្លែងរាតត្បាតវាតទីអំណាចរបស់គេនៅក្នុងតំបន់ប៉ុណ្ណោះ ហើយការរាតត្បាតនេះ នឹងបោះជំហានទៅមុខបន្តិចម្តងៗតាមកិច្ចសហប្រតិបត្តិការជាច្រើន ក្នុងនោះការចុះអនុសារណៈយោគយល់រវាងមេទ័ពជើងគោកកម្ពុជា និងមេទ័ពជើងគោកចិន ក្រោមកិច្ចព្រមព្រៀងមួយឈានទៅរកបក្សសម្ព័ន្ធយោធារវាងកម្ពុជា និងចិន គឺជាជំហានមួយបង្ហាញយ៉ាងច្បាស់ពីមហិច្ឆតារបស់ចិនក្នុងការរាតត្បាតនេះ។
ការអះអាងនេះ ធ្វើឡើងស្របពេលដែលកម្ពុជាត្រូវគេរិះគន់អំពីការដឹកនាំនយោបាយរបស់ខ្លួនឃ្លាតចាកពីខ្លឹមសាររដ្ឋធម្មនុញ្ញ ដែលបានចែងអំពីការរក្សាអព្យាក្រឹតរបស់ខ្លួនដែលធ្វើឲ្យប៉ះពាល់ដល់ទំនាក់ទំនងទ្វេភាគីជាមួយសហរដ្ឋអាមេរិកសព្វថ្ងៃនេះ។
ចំណែកអតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានលើកឡើងក្នុងកិច្ចពិភាក្សានេះដែរថា អំឡុងពេលនៃកិច្ចប្រជុំកំពូលអាស៊ាន-អាមេរិក មេដឹកនាំកម្ពុជា លោក ហ៊ុន សែន បានសន្យាចំពោះមុខប្រធានាធិបតីសហរដ្ឋអាមេរិក លោក ចូ បៃដិន យ៉ាងច្បាស់ថា ខ្លួននឹងប្ដេជ្ញាគោរពរដ្ឋធម្មនុញ្ញកម្ពុជាឱ្យបានដាច់ខាត ហើយការសន្យារបស់លោក ហ៊ុន សែន នេះគឺជាកិច្ចសន្យាអន្តរជាតិមួយរបស់កម្ពុជាចំពោះមហាអំណាចលោកសេរី ដូច្នេះលោក ហ៊ុន សែន មិនអាចក្រឡាស់សម្ដីរបស់ខ្លួនបានឡើយ។
បណ្ឌិត សូ ណារ៉ូ បញ្ជាក់ថា ការប្ដេជ្ញារបស់លោក ហ៊ុន សែន អនុវត្តតាមរដ្ឋធម្មនុញ្ញនេះក៏ស្មើនឹងការសន្យាគោរពតាមកិច្ចព្រមព្រៀងសន្តិភាពទីក្រុងប៉ារីសដែរ ហើយប្រសិនបើកម្ពុជាពិតជាអាចអនុវត្តតាមអះអាងរបស់លោក ហ៊ុន សែន មែននោះ កម្ពុជានឹងរក្សាបាននូវអធិបតេយ្យជាតិ ឯករាជភាព និងបូរណភាពទឹកដីរបស់ខ្លួនជាមិនខាន ព្រោះកិច្ចព្រមព្រៀងសន្តិភាពនេះមានតម្លៃជាអន្តរជាតិដែលម្ចាស់ហត្ថលេខីទាំង ១៨ប្រទេសមិនអាចរំលោភបានឡើយ។
ទំនាក់ទំនងសហរដ្ឋអាមេរិកជាមួយកម្ពុជាក្នុងពេលបច្ចុប្បន្ននេះ ត្រូវគេមើលឃើញថាកំពុងតែស្ថិតក្នុងភាពរកាំរកូសយ៉ាងខ្លាំង ទាំងនយោបាយការបរទេស និងកិច្ចសហប្រតិបត្តិការនានា ក្នុងនោះមេដឹកនាំកម្ពុជា លោក ហ៊ុន សែន បានចោទអាមេរិកថាជាប្រទេសមហាអំណាចដែលប្រើប្រាស់ល្បិចកលជ្រៀតជ្រែកចូលកិច្ចការផ្ទៃក្នុងរបស់កម្ពុជា តាមរយៈនៃការអនុវត្តស្តង់ដារពីរអំពីលទ្ធិប្រជាធិបតេយ្យ និងការគោរពសិទ្ធិមនុស្ស។
យ៉ាងណាក៏ដោយ កាលពីថ្ងៃទី១១ ខែឧសភា ឆ្នាំ២០២២ បុរសខ្លាំងកម្ពុជា លោក ហ៊ុន សែន អះអាងថា កម្ពុជាពិតជាចង់ធ្វើមិត្តរបស់សហរដ្ឋអាមេរិកខ្លាំងណាស់ ប៉ុន្តែកម្ពុជាមិនអាចជ្រើសរើស ឬទម្លាក់ចោលរវាងមហាអំណាចអាមេរិក ឬមហាអំណាចកុម្មុយនីស្តចិនណាមួយនោះដែរ ព្រោះកម្ពុជាប្រកាន់ជំហរនយោបាយអព្យាក្រឹតដែលមានចែងក្នុងរដ្ឋធម្មនុញ្ញរបស់ខ្លួន។
លោក ហ៊ុន សែន ធ្លាប់បានលើកជាសំណួរនៅក្នុងវេទិកាសន្និសីទអន្តរជាតិលើកទី២៦ ស្ដីពីអនាគតរបស់អាស៊ី កាលពីថ្ងៃទី២០ ខែឧសភា ឆ្នាំ២០២១ កន្លងទៅថា បើលោកមិនពឹងមហាអំណាចចិន តើឱ្យលោកទៅពឹងមហាអំណាចមួយណា៕