 លោក Karim Khan និយាយកាលពីថ្ងៃអង្គារ ទី១៧ ឧសភា ថា លោកបានបញ្ជូនក្រុមអ្នកស៊ើបអង្កេតជាក្រុមជំនាញផ្នែកនីតិបច្ចេកវិទ្យា និងបុគ្គលិកជំនួយការចំនួន ៤២នាក់ទៅកាន់ប្រទេសអ៊ុយក្រែន ដែលជាផ្នែកមួយនៃការស៊ើបអង្កេតលើករណីឧក្រិដ្ឋកម្មសង្គ្រាមក្នុងអំឡុងពេលដែលរុស្ស៊ីឈ្លានពានអ៊ុយក្រែន។ នេះបើយោងតាមទីភ្នាក់ងារព័ត៌មាន Associated Press។){kind=link}
រដ្ឋអាជ្ញាតុលាការឧក្រិដ្ឋកម្មអន្តរជាតិ (ICC) លោក Karim Khan និយាយកាលពីថ្ងៃអង្គារ ទី១៧ ឧសភា ថា លោកបានបញ្ជូនក្រុមអ្នកស៊ើបអង្កេតជាក្រុមជំនាញផ្នែកនីតិបច្ចេកវិទ្យា និងបុគ្គលិកជំនួយការចំនួន ៤២នាក់ទៅកាន់ប្រទេសអ៊ុយក្រែន ដែលជាផ្នែកមួយនៃការស៊ើបអង្កេតលើករណីឧក្រិដ្ឋកម្មសង្គ្រាមក្នុងអំឡុងពេលដែលរុស្ស៊ីឈ្លានពានអ៊ុយក្រែន។ នេះបើយោងតាមទីភ្នាក់ងារព័ត៌មាន Associated Press។
ការបញ្ជូនក្រុមជំនាញផ្នែកស៊ើបអង្កេតបទល្មើសឧក្រិដ្ឋកម្មសង្គ្រាមទៅកាន់ប្រទេសអ៊ុយក្រែន ធ្វើឡើងបន្ទាប់ពីក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីពេលថ្មីៗនេះបានអនុម័តជាផ្លូវការ ដោយសម្រេចផ្ដល់សិទ្ធិឱ្យតុលាការឧក្រិដ្ឋកម្មអន្តរជាតិ (ICC) ចាត់ចែងការបញ្ជូនអ្នកជំនាញទៅស៊ើបអង្កេតឧក្រិដ្ឋកម្មសង្គ្រាមដែលប្រព្រឹត្តដោយកងទ័ពរុស្ស៊ីទៅលើជនស៊ីវិលនៃប្រទេសអ៊ុយក្រែន។
នៅក្នុងកិច្ចប្រជុំនោះ ទោះជាមហាអំណាចចិន បានជំទាស់ក៏ដោយ ក៏ក្រុមប្រឹក្សានៅតែរកសំឡេងបានគ្រប់គ្រាន់ផ្ដល់សិទ្ធិឱ្យ ICC បើកសំណុំរឿងក្ដីកម្រិតអន្តរជាតិខ្ពស់បំផុតនេះប្រឆាំងរបបទីក្រុងមូស្គូ ដែលស្ថិតនៅក្រោមការដឹកនាំរបស់បុរសខ្លាំង វ៉្លាឌីមៀរ ពូទីន (Vladimir Putin) ដែលបញ្ជាទ័ពរុស្ស៊ីឈ្លានពានប្រទេសអ៊ុយក្រែន។
តាមដំណឹងមកថា ក្រុមអ្នកជំនាញរបស់ ICC នឹងត្រូវទៅដល់ទីតាំងកប់សពរួមនៅក្រុងបូចា ដែលមានមនុស្សជាង ៤០០នាក់ស្លាប់ដោយដៃជាប់ចំណងចងមកក្រោយ និងការស្លាប់ដោយការបាញ់ចំក្បាល។ បន្ថែមលើសនេះទៀត ក្រុមអ្នកជំនាញនឹងទៅកាន់ទីក្រុងម៉ារីយូប៉ូល ដែលនៅទីនោះមានរណ្ដៅសពរួមដ៏ធំមួយមានមនុស្សស្លាប់ជាង ១០៨០នាក់ ហើយមានទាំងកុមារផងដែរ។ ក្រៅពីនេះ នឹងពិនិត្យមើលភាពជាក់ស្ដែងនៅទីតាំងផ្សេងៗទៀត ដូចជាសាលារៀន មន្ទីរពេទ្យ ដែលមានជនស៊ីវិលស្លាប់រាប់រយនាក់ដោយគ្រាប់កាំជ្រួចរបស់រុស្ស៊ី។
គេរំពឹងថា ក្រោយពីប្រមូលភស្តុតាងបានរួចរាល់ហើយ រដ្ឋអាជ្ញាតុលាការឧក្រិដ្ឋកម្មអន្តរជាតិ លោក Karim Khan នឹងបញ្ជូនសេចក្ដីសន្និដ្ឋានទៅកាន់ប្រធានតុលាការនេះ ហើយផ្ដើមបើកការជំនុំជម្រះក្ដីជាសាធារណៈប្រឆាំងរបបលោក ពូទីន និងកងទ័ពរុស្ស៊ី ដែលប្រព្រឹត្តឧក្រិដ្ឋកម្មសង្គ្រាមលើប្រជាជនអ៊ុយក្រែន។ លោកប្រធានាធិបតី ចូ បៃដិន ដែលនាំមុខគេហៅលោក ពូទីន ថាជាឧក្រិដ្ឋជនសង្គ្រាម និងឧក្រិដ្ឋជនប្រល័យពូជសាសន៍ សម្រេចឱ្យក្រសួងការបរទេសអាមេរិក ប្រកាសចាប់ផ្តើមកម្មវិធីស្រាវជ្រាវ និងវិភាគរកភស្តុតាងនៃឧក្រិដ្ឋកម្ម និងអំពើឃោរឃៅដែលត្រូវបានចោទប្រកាន់ថាប្រព្រឹត្តដោយកងទ័ពរុស្ស៊ី នៅក្នុងសង្គ្រាមអ៊ុយក្រែន ខណៈទីក្រុងវ៉ាស៊ីនតោន កំពុងព្យាយាមរុញទីក្រុងមូស្គូ ឱ្យទទួលខុសត្រូវចំពោះសកម្មភាពឧក្រិដ្ឋរបស់ខ្លួន។
នៅក្នុងសេចក្តីថ្លែងការណ៍ ក្រសួងការបរទេសអាមេរិកបានបញ្ជាក់ថា ដំណើរការស៊ើបអង្កេតករណីឧក្រិដ្ឋកម្មសង្គ្រាមប្រឆាំងរបបលោក ពូទីន នឹងរួមបញ្ចូលឯកសារស្រាវជ្រាវ ការផ្ទៀងផ្ទាត់ និងការផ្សព្វផ្សាយពីប្រភពនៃភស្តុតាងជាសាធារណៈអំពីសកម្មភាពរបស់កងទ័ពរុស្ស៊ី នៅទឹកដីអ៊ុយក្រែន។ ក្រសួងការបរទេសអាមេរិកពន្យល់ថា កម្មវិធីនេះនឹងត្រូវចំណាយថវិកាប្រមាណ ៦លានដុល្លារ ដោយរួមបញ្ចូលនូវការវិភាគ និងរក្សាទុកព័ត៌មាន រូបភាពផ្កាយរណប និងព័ត៌មានដែលប្រមូលបានពីបណ្ដាញសង្គមដើម្បីយកទៅដាក់បង្ហាញនៅតុលាការ ICC។
អ្នកនាំពាក្យវិមានក្រឹមឡាំង លោក Dmitry Peskov បាននិយាយថា បណ្ដាប្រទេសលោកខាងលិច ជាពិសេសសហរដ្ឋអាមេរិក គឺជាមេខ្លោងក្នុងការរុញឱ្យមានករណីថ្មីៗកើតឡើងនៅលើទឹកដីអ៊ុយក្រែន ដែលលោកចោទបកវិញថា ការស្លាប់ជនស៊ីវិលក្នុងសង្គ្រាមអ៊ុយក្រែន ក៏ជាការរួមចំណែកផងដែររបស់កងទ័ពអ៊ុយក្រែន។
លោក Dmitry Peskov បានហៅសហរដ្ឋអាមេរិកជាអ្នកធ្វើឱ្យសង្គ្រាម Hybrid War ឬសង្គ្រាមកូនកាត់ផ្ទុះឡើងប្រឆាំងនឹងរុស្ស៊ី។ លោកថា អាមេរិកបានក្លាយជារដ្ឋដែលប្រកាន់ជំហរជាសត្រូវដ៏ធំរបស់រុស្ស៊ី។ អ្នកនាំពាក្យវិមានក្រឹមឡាំងរូបនេះបានសង្កត់ធ្ងន់ថា សង្គ្រាមកូនកាត់នេះនាំឱ្យអ៊ុយក្រែនក្លាយជាសមរភូមិខ្ចីដៃរបស់អាមេរិក និងពួកបស្ចិមប្រទេសអូសអាវុធរបស់ពួកគេឱ្យកងទ័ពអ៊ុយក្រែនធ្វើសង្គ្រាម ដែលពុំអាចរកទីបញ្ចប់ឃើញឡើយ។
មិនត្រឹមតែប៉ុណ្ណោះ លោក Dmitry Peskov ចោទថា ប្រទេសអង់គ្លេស ក៏ជាអ្នករុញឱ្យសង្គ្រាមកាន់តែធ្ងន់ធ្ងរនៅលើទឹកដីអ៊ុយក្រែន ដែរ ព្រោះអង់គ្លេសបញ្ជូនក្រុមហ្វឹកហ្វឺនមកជួយកងទ័ពអ៊ុយក្រែន។ លោក Peskov បានហៅប្រទេសមហាអំណាចពីរនេះថាជាសត្រូវដ៏ធំរបស់រុស្ស៊ី។
តែសម្រាប់សហភាពអឺរ៉ុប ដែលបានបញ្ជូនមូលនិធិច្រើនលានដុល្លារជួយដល់តុលាការឧក្រិដ្ឋកម្មអន្តរជាតិ (ICC) បានបង្ហាញការសោកស្ដាយ និងរន្ធត់ចិត្តដោយបានឃើញនឹងភ្នែកជនស៊ីវិលអ៊ុយក្រែនស្លាប់ដោយគ្រាប់កាំភ្លើងរបស់កងទ័ពរុស្ស៊ី គឺជាការបាញ់សម្លាប់ដោយចេតនា ហើយថានេះជាការរុញឱ្យមានការចោទរបបក្រុងមូស្គូ ពាក់ព័ន្ធនឹងឧក្រិដ្ឋកម្មសង្គ្រាម។ ដោយមូលហេតុនេះ បាននាំឱ្យសហភាពអឺរ៉ុប ២៧ប្រទេសសន្យាបន្តជួយអាវុធទៅឱ្យអ៊ុយក្រែន គឺជួយរហូតរុស្ស៊ីចាញ់សង្គ្រាម។
រដ្ឋមន្ត្រីគោលនយោបាយការបរទេសសហភាពអឺរ៉ុប លោក Josep Borrell បាននិយាយថា សហភាពអឺរ៉ុបនឹងធ្វើយ៉ាងណាឱ្យអ៊ុយក្រែនមានសព្វាវុធប្រើជាបន្តរហូត បើរុស្ស៊ីនៅបន្តសង្គ្រាមនៅលើទឹកដីអ៊ុយក្រែន។ លោក Borrell បានប្រាប់អ្នកកាសែតនៅក្នុងទីក្រុងប្រ៊ុចសែល ប្រទេសបែលហ្ស៊ិក គឺនៅក្រោយកិច្ចប្រជុំនៃថ្នាក់រដ្ឋមន្ត្រីការពារជាតិនៃសហភាពអឺរ៉ុបថា សហភាពអឺរ៉ុបនឹងមិនឱ្យអ៊ុយក្រែនអស់សព្វាវុធប្រើប្រាស់ឡើយ។
មន្ត្រីការទូតកំពូលរបស់សហភាពអឺរ៉ុបរូបនេះបន្តថា ប្រសិនបើតួលេខ និងសេចក្ដីរាយការណ៍នានាដែលបង្ហាញថាកងទ័ពរុស្ស៊ីស្លាប់ដ៏ច្រើនមែននោះ ហើយជាការពិត គឺមានន័យថាកងទ័ពរុស្ស៊ីបានរងការបាត់បង់ដ៏ធំសម្បើមនៅក្នុងការឈ្លានពានទៅលើប្រទេសអ៊ុយក្រែន។
បើតាមលោក Borrell ប្រសិនបើជាការពិតដែលថារុស្ស៊ីបានបាត់បង់កងទ័ពរបស់ខ្លួនចំនួន ១៥% នៃកងទ័ពជិត ២០ម៉ឺននាក់លើកទៅឈ្លានពានអ៊ុយក្រែន គឺជាកំណត់ត្រាពិភពលោកដែលប្រទេសមហាអំណាចយោធាដ៏ធំនេះបាត់បង់អាយុជីវិតកងទ័ពដ៏សម្បើមពុំធ្លាប់មានចាប់តាំងពីសង្គ្រាមលោកលើកទី២។
តែបើតាមក្រសួងការពារជាតិអ៊ុយក្រែន រុស្ស៊ីស្លាប់កងទ័ពដល់ជិត ២៨០០០នាក់ តែសម្រាប់រដ្ឋមន្ត្រីគោលនយោបាយការបរទេសសហភាពអឺរ៉ុប លោក Josep Borrell ប្រកាសថា ករណីឧក្រិដ្ឋកម្មសង្គ្រាមប្រព្រឹត្តដោយកងទ័ពរុស្ស៊ី ត្រូវតែនាំរបបក្រុងមូស្គូ ទៅផ្ទៀងផ្ទាត់កំហុសរបស់ខ្លួននៅតុលាការ ICC៕