សហភាពអឺរ៉ុបប្រចាំនៅប្រទេសកម្ពុជា នៅថ្ងៃទី២០ ឧសភា នេះ ប្រកាសមិនបញ្ជូនអ្នកសង្កេតការណ៍អំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២២ ខាងមុខ ខណៈអង្គការសង្គមស៊ីវិលក្នុងស្រុកដែលឃ្លាំមើលការបោះឆ្នោតកន្លងមក ក៏មិនដាក់អ្នកសង្កេតការណ៍ដែរ។
សហភាពអឺរ៉ុបប្រចាំនៅប្រទេសកម្ពុជា បានប្រកាសលើទំព័រហ្វេសប៊ុកជាផ្លូវការនៅថ្ងៃសុក្រ ទី២០ ឧសភា នេះថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២២ ខាងមុខនេះ អឺរ៉ុបនឹងមិនដាក់អ្នកសង្កេតការណ៍នោះទេ។
សហភាពអឺរ៉ុបបញ្ជាក់ថា ទោះបីជាអឺរ៉ុបមិនដាក់អ្នកសង្កេតការណ៍ក៏ដោយ ប៉ុន្តែអឺរ៉ុបនឹងយកចិត្តទុកដាក់ខ្លាំងចំពោះការបោះឆ្នោតនាពេលខាងមុខនេះ ថាប្រព្រឹត្តទៅដោយសេរី ត្រឹមត្រូវ យុត្តិធម៌ដែរឬទេ ដោយថាទាំងអស់នេះវាជាផ្នែកសំខាន់ក្នុងមូលដ្ឋានគ្រឹះនៃលទ្ធិប្រជាធិបតេយ្យ។
មួយវិញទៀត សហភាពអឺរ៉ុប និងឯកអគ្គរដ្ឋទូតនៃរដ្ឋជាសមាជិក ក៏បានជួបជាមួយប្រធាន និងសមាជិក គ.ជ.ប ដើម្បីឈ្វេងយល់ព័ត៌មានលម្អិតបន្ថែមលើបញ្ហាមួយចំនួនអំពីការចុះឈ្មោះបោះឆ្នោត ដោយរាប់បញ្ចូលទាំងការចុះឈ្មោះបោះឆ្នោតសម្រាប់ជនធ្វើចំណាកស្រុក រហូតដល់ការតែងតាំង និងអាណត្តិនៃសមាជិក គ.ជ.ប និងមន្ត្រីផ្សេងៗទៀត ដូចជាមន្ត្រីប្រចាំការិយាល័យបោះឆ្នោត ជាដើម។
ជាមួយគ្នានេះ អឺរ៉ុបថាខ្លួនក៏កំពុងតាមដានយ៉ាងដិតដល់នូវដំណើរការបោះឆ្នោតនៅប្រទេសកម្ពុជា ក្នុងនោះស្ថានទូតអឺរ៉ុបជាច្រើនបាន ហើយនិងកំពុងបើកកិច្ចប្រជុំជាមួយគ្រប់ភាគីពាក់ព័ន្ធ រួមទាំងគណបក្សនយោបាយ អង្គការសង្គមស៊ីវិល និងស្ថាប័នសាធារណៈដែលមានភារកិច្ចទទួលខុសត្រូវរៀបចំ និងដឹកនាំការបោះឆ្នោត ជាក់ស្ដែងដូចជា គ.ជ.ប ជាដើម។
សហភាពអឺរ៉ុប ថាខ្លួន និងស្ថានទូតនៃរដ្ឋជាសមាជិកនៅក្នុងប្រទេស នឹងបន្តចូលរួមជាមួយគ្រប់ភាគីពាក់ព័ន្ធទាំងអស់ និងដោះស្រាយរាល់បញ្ហាដែលអាចរួមចំណែកដល់ដំណើរការបោះឆ្នោតកាន់តែប្រសើរឡើងនៅក្នុងការបោះឆ្នោតនាពេលខាងមុខ។
ការលើកឡើងពីសហភាពអឺរ៉ុបនេះ ធ្វើឡើងបន្ទាប់ពីសមាជិកសហភាពអឺរ៉ុប ក្នុងនោះឯកអគ្គរដ្ឋទូតសហភាពអឺរ៉ុប អ្នកស្រី Carmen Moreno ឯកអគ្គរដ្ឋទូតបារាំង លោក Jacques Pellet ឯកអគ្គរដ្ឋទូតនៃសាធារណរដ្ឋឆេក លោក Martin Vávra ភារធារីស្តីទីនៃប្រទេសហុងគ្រី លោក István Bakos និងប្រធានការិយាល័យនៃស្ថានទូតស៊ុយអែត អ្នកស្រី Camilla Ottoson បានជួបប្រជុំជាមួយលោក ប្រាជ្ញ ច័ន្ទ ប្រធានគណៈកម្មាធិការជាតិរៀបចំការបោះឆ្នោត និងសមាជិក គ.ជ.ប ឯទៀតនៅថ្ងៃទី១៦ ខែឧសភា។
ទោះជាយ៉ាងណាក៏ដោយ មិនមែនតែសហភាពអឺរ៉ុបទេ អង្គការនិចហ្វិច ដែលតែងតែឃ្លាំមើលការបោះឆ្នោតកន្លងមក ក៏មិនដាក់អ្នកសង្កេតការណ៍ការបោះឆ្នោតក្រុមប្រឹក្សាឃុំ-សង្កាត់នៅថ្ងៃទី៥ ខែមិថុនា ឆ្នាំ២០២២ នេះទេ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ ខាងមុខនេះ ខណៈយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ នឹងចាប់ផ្តើមពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២ ហើយការបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខនេះមានគណបក្សនយោបាយចំនួន ១៧ចូលរួម។
ដំណាលពេលប្រទេសកម្ពុជាកំពុងរៀបចំដំណើរការបោះឆ្នោតនោះ កាលពីថ្ងៃទី៥ ខែឧសភា ឆ្នាំ២០២២ សមាជិកសភាអឺរ៉ុបតាមដានដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៥ ខែមិថុនា ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រនៅឆ្នាំ២០២៣ នៅកម្ពុជា ដោយហេតុថា បើសិនជារកឃើញថាការបោះឆ្នោតនេះប្រព្រឹត្តទៅគ្មានភាពសេរី ត្រឹមត្រូវ និងយុត្តិធម៌ទេ សភាអឺរ៉ុបនឹងស្នើឱ្យលុបចោលប្រព័ន្ធអនុគ្រោះពន្ធ EBA ទាំងស្រុងពីប្រទេសកម្ពុជាតែម្ដង។
ការព្រមានពីសហភាពអឺរ៉ុប ក្រោយពីស្ថានភាពនៃការគោរពសិទ្ធិមនុស្ស និងលទ្ធិប្រជាធិបតេយ្យនៅប្រទេសកម្ពុជាប៉ុន្មានឆ្នាំចុងក្រោយ បានធ្លាក់ចុះកាន់តែខ្លាំងចាប់តាំងពីតុលាការកំពូលប្រទេសកម្ពុជារំលាយគណបក្សសង្គ្រោះជាតិ៕